00:00:00 IGIHE NETWORK KN KINYARWANDA EN ENGLISH FR FRANCAIS

Uburenganzira bw’ingagi bushobora kuzitira ubucukuzi bwa Petelori hagati ya Uganda na Congo

Yanditswe na
Kuya 7 February 2017 saa 09:10
Yasuwe :

Umushinga wo gucukura Petelori iri muri pariki ya Bwindi (Bwindi Impenetrable National Park), ihuriweho na Uganda na Repubulika Ihaharanira Demokarasi ya Congo nturi kuvugwaho rumwe bitewe n’ubuzima bw’ingagi ziri muri iyo pariki zifatiye runini abaturage n’ubukungu bw’ibihugu byombi.

Ubu hari kwibazwa niba uyu mushinga uzakorwa maze ingagi zigashwiragizwa cyangwa ibihugu byombi bizumvikana ku buryo petelori yacukurwa ariko n’ubuzima bw’izo ngagi ntibuhunganywe.

Ingagi zisaga 800 ziri muri iyi pariki zinjiza asaga miliyoni 10 z’amadolari y’Amerika ku mwaka nk’uko inkuru ya New Vision ibisobanura.

Raporo yashyizwe ahagaragara mu 2013 y’ikigega mpuzamahanga gitera inkunga ibikorwa byo kurengera umutungo kamere, yagaragaje ko u Rwanda, Uganda na Congo ari byo bihugu bisigayemo ingagi. Ivuga ko zishobora kwinjiza amadolari asaga miliyoni 30 ku mwaka zikanahesha akazi ababarirwa mu bihumbi.

Abashinzwe kurengera ibidukikije baramagana uyu mushinga

Kugeza ubu, abashinzwe kubungabunga ibidukikije ntibifuza ko iyo petelori yacukurwa kuko byakwangiza amazi y’umugezi wa Nil bikagira ingaruka ku binyabuzima birimo amafi n’ibiguruka.

Leta zo zivuga ko atari ubwa mbere ubwo bucukuzi buzaba bukozwe.

Iyi miryango irasaba UNESCO, Uganda na Congo ko ibikorwa byo gusuzuma ingano ya petelori ihari no kuyicukura muri Virunga (Igice cya pariki ya Virunga, iyitiriwe umwamikazi Elizabeth n’impande y’ikiyaga cya Eduadrd) byahagarikwa ndetse n’ibyemezo byemerera abacukura n’abagenzura ingano yazo babyamburwa hakazakorwa ibindi bishya.

Kabagambe Kaliisa wahoze ari umunyamabanga wa Leta muri minisiteri ishinzwe ingufu avuga iyo Petelori yacukurwa ariko ko byakorwa mu bushishozi ku buryo bitangiza ibidukikije.

Kugeza ubu DRC yo ishobora kureka ubucukuzi bwa Petelori ikarinda ubuzima bw’inyamaswa n’ibindi biri muri pariki ya Virunga, ibi ngo bishobora gusiga igitutu ku mugambi wa Uganda.

Ubusanzwe, Pariki ya Virunga yagizwe iy’igihugu ahasaga mu 1925, mu 2008 nibwo yashyizwe mu murage wa Unesco.

Ibikorwa byo gucukura peteroli muri Pariki ya Bwindi bishobora guhungabanya ubuzima bw'ingagi bufatiye runini Uganda na Congo Kinshasa

Amategeko agenga imicungire y’ahantu nyaburanga yashyizweho na UNESCO ateganya ko bitemewe gukora ibikorwa ibyo aribyo byose bihangiza.

Mu mpera z’umwaka ushize nibwo ikompanyi y’Abongereza, SOCO,yatangiye gusuzuma niba mu kiyaga cya Eduard na Pariki ya Virunga harimo Petelori ariko ntiratangaza ibyagezweho.

Bitewe n’ukutabivugaho rumwe, SOCO yatangaje ko ibyo bikorwa nta burenganzira ibifitiye, ko biri mu nshingano za UNESCO zo kubungabunga ahantu nyaburanga harimo n’ingagi ziri muri aka gace.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .