Afreximbank igiye gutanga miliyari 3$ yo guhangana n’ingaruka za Coronavirus muri Afurika

Yanditswe na Habimana James
Kuya 25 Werurwe 2020 saa 03:09
Yasuwe :
0 0

Banki Nyafurika iteza imbere ubucuruzi (Afreximbank), yatangaje ko izatanga inkunga ya miliyari eshatu z’amadolari ya Amerika, yo gufasha ibihugu binyamuryango kuri uyu mugabane ngo bishobore guhangana n’icyorezo cya Coronavirus.

Iyi nkunga yemejwe n’ubuyobozi bw’inama y’ubutegetsi y’iyi banki, yateranye tariki 20 Werurwe 2020.

Umugabane wa Afurika ukomeje kwibasirwa na Coronavirus yibasiye Isi muri rusange, imibare igaragaza ko mu bihugu 54 bigize uyu mugabane, iki cyorezo cyamaze kugera mu bihugu 43, abantu barenga 1700 bamaze kwandura naho 56 bamaze gupfa.

Ibi byatumye ibihugu byinshi kuri uyu mugabane bifata ingamba zikomeye kugira ngo iki cyorezo kidakomeza gukwirakwira mu buryo bworoshye, harimo guhagarika ingendo z’indege n’ibindi bikorwa by’ubucuruzi.

Tariki 13 uku kwezi, Ikigo Nyafurika cy’ibarurishamibare (ECA), cyatangaje ko uyu mugabane uzahomba akayabo ka miliyari 65 z’amadolari ya Amerika kubera ihungabana ry’ibikomoka kuri peteroli na miliyari 101 z’amadolari kubera ibyo woherezaga mu mahanga muri uyu mwaka wa 2020.

Iyi banki ivuga ko iyi nkunga izakoreshwa mu gufasha ibihugu bigize Afreximbank mu bijyanye n’ingaruka iki cyorezo kirimo guteza, byaba mu by’ubuzima ndetse n’ubukungu.

Itangazo ryayo rivuga ko izafasha kandi banki nkuru z’ibihugu n’ibindi bigo by’imari, kubera ingaruka iki cyorezo cyabigizeho.

Izafasha kandi mu gushyira mu gushyira ku murongo ibijyanye n’amadevize, ikibazo cy’ibyinjizwa mu bihugu n’ibindi.

Ivuga ko izafasha ibihugu aho wasangaga ubukungu bwabyo bushingiye ku byo byohereza mu mahanga harimo nk’amabuye y’agaciro, ubu bikaba byarahuye n’isubira inyuma ry’amafaranga byavanagamo.

Ubu bufasha buzaza buciye mu nkunga zihabwa ibyo bihugu, mu nguzanyo, ingwate n’ubundi buryo.

Perezida wa Afreximbank, Prof. Benedict Oramah, yavuze ko icyorezo cya Coronavirus cyazanye akaga gakomeye n’ihungabana ry’ubukungu.

Yagize ati “Uretse ingaruka zikomeye kirimo kugira ku kiremwamuntu, iki cyorezo cyagize ingaruka ku bukungu bw’Isi, kizatuma kandi ubukungu buhungabana ku kigero cya 0.4%.”

Yavuze kandi ko ubukungu bw’Isi buzava kuri 2.9% bwariho mu 2019, bugere kuri 2.5% mu 2020.

Ati “Uburyo bwihuse bwo gufasha burakenewe mu guhangana n’iki kibazo kuri uyu mugabane, Afurika irimo kugira ihungabana rikomeye mu byo yakuraga mu bukerarugendo, isubira inyuma ry’amafaranga, ihindagurika ry’ibiciro by’ibiribwa n’ihungabana ry’ibyo bakoraga.”

Yavuze ko Afreximbank izakorana n’amabanki y’iterambere mu bihugu bisanzwe, kugira ngo ibi bihugu bishobore guhangana n’ingaruka zirimo guterwa n’iki cyorezo.

Afreximbank isanzwe ifite amateka mu gufasha ibihugu bya Afurika mu gihe havutse ikibazo cy’ihungabana ry’ubukungu.

Mu 2015 ubwo habaga ikibazo cy’ihungabana ry’ubukungu, iyi banki yatanze inkunga ya miliyari 10 z’amadolari ya Amerika ku bihugu binyamuryango.

Banki Nyafurika iteza imbere ubucuruzi yashinzwe mu 1993, ishingwa na za leta kuri uyu mugabane n’abikorera. Kuva mu 1994 imaze gutanga inkunga ya miliyari 67 ku bikorwa by’ubucuruzi, naho umutungo fatizo wayo ugera kuri miliyari 13 z’amadolari ya Amerika.

Afreximbank yiyemeje kugoboka umugabane wa Afurika mu guhangana n'ingaruka za Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza