00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo byugarije ubuhinzi bifitanye isano n’ubushakashatsi bwasubiye inyuma-Minagri

Yanditswe na

Jean Baptiste Nshimiyimana

Kuya 16 February 2016 saa 08:41
Yasuwe :

Minisitiri w’Ubuhinzi n’Ubworozi avuga ko bimwe mu bibazo bigaragara mu mwuga w’ubuhinzi muri iyi minsi bikomoka ku ruhererekane rw’ibintu byinshi birimo imihindagurikire y’ibihe n’ubushakashatsi muri iyi ngeri bwasubiye inyuma.

Miliyoni zisaga 11 zituye u Rwanda zitunzwe n’ibikomoka ku mwuga w’ubuhinzi n’ubworozi, kandi imibare igaragaza ko ababukora bari ku kigero cya 85%.

Kubera uruhare urwego rw’ubuhinzi n’ubworozi rufite mu mibereho y’ubuzima bwa benshi mu gihugu, byatumye yongererwa ingengo y’imari iva kuri miliyari 90 298 698 305 z’amafaranga y’u Rwanda mu 2013/14, igera kuri miliyari 102,870 277 395 mu mwaka wa 2015/2016.

Nyamara mu mwaka ushize, hakunze kugaragara udukoko twibasiye ibihingwa hirya no hino mu gihugu.

Minisitiri w’Ubuhinzi n’Ubworozi Dr. Gerardine Mukeshimana asobanura ko byinshi mu bibazo byibasiye uru rwego bikomoka ku mihindagurikire y’ibihe, aho hari kugenda havuka udukoko tutari tumenyerewe, tugakwirakwiza indwara haba mu buhinzi,ubworozi no mu buzima muri rusange.

Iyi mpamvu yiyongeraho kuba nyuma y’uko Ikigo cy’Ubushakashatsi mu by’Ubuhinzi (ISAR) isimbuwe n’Icyigo cy’Igihugu cy’Ubuhinzi n’Ubworozi (RAB), ubushakashatsi bwasubiye inyuma.

Yagize ati ” Ubushakashatsi bwabaye nk’ubugana hasi cyane. Ibibazo turi kubona byinshi ni umusaruro mucye wasigaye ku byo ISAR yasize. Bivuga ko RAB itabashije gutubura imbuto, ngo ikore imbuto nshya, ikore inyongeramusaruro, hanyuma inakore ubushakashatsi ku bibazo turi guhura na byo,bityo itange ibisubizo.”

Minisitiri Mukeshimana avuga ko bari gushyira imbaraga mu guteza imbere ubushakashatsi bugamije gukemura ibibazo byose, kuko ari wo musingi wo kongera umusaruro mu buryo burambye.

Ubushakashatsi bw’ Ikigo cy’Igihugu cy’Ibarurirashamibare ( NISR) bugaragaza ko mu myaka itanu agaciro k’umusaruro ukomoka ku buhinzi n’ubworozi kiyongeraho 65%, na ho Minagri ikavuga ko hanakenewe impinduka mu gutunganya umusaruro,hagatangirwa uburyo bwo kuwongerera agaciro.

Minisitiri w’Ubuhinzi n’Ubworozi Dr. Gerardine Mukeshimana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .