Minagri yashyizeho miliyoni 200 Frw zo gutera inkunga ubwishingizi mu buhinzi

Yanditswe na Jean Pierre Tuyisenge
Kuya 4 Nyakanga 2017 saa 11:11
Yasuwe :
0 0

Abahinzi mu bice bitandukanye by’igihugu bakunze guhura n’ibiza bikabangiriza imyaka inshuro itari imwe, birimo imyuzure, izuba ryinshi n’ibyorezo by’indwara n’ibindi ariko ugasanga nta bwishingizi ku buryo bagobokwa mu gihe barumbije.

Iki kibazo cyo kutagira ubwishingizi mu buhinzi Leta y’u Rwanda yagihagurukiye, Minisiteri y’Ubuhinzi n’Ubworozi (MINAGRI), igiye gutera inkunga abatanga ubwishingizi mu buhinzi. Yiyemeje gutanga miliyoni 200 Frw mu mwaka w’ingengo y’imari wa 2017/2018.

Nk’uko The New Times yabyanditse, Minagri yatangaje ko igice cya mbere cy’uwo mushinga kizatangira muri Nzeri uyu mwaka, aho abahinzi babishaka bazatangira guhinga imirima yabo yishingiwe.

Umunyabanga wa Leta muri Minagri ushinzwe ubuhinzi, Fulgence Nsengiyumva, yabwiye Abadepite ko umushinga wo gutera inkunga mu ubwishingizi mu buhinzi uzakorwa ku bufatanye n’ibigo by’ubwishingizi, aho bizanafasha abahinzi kumenya imirongo ngenderwaho mu gushyira mu bikorwa gahunda zizabafasha kurwanya ibiza.

Yagize ati “Banki zakomeje kugenda biguruntege mu gutanga inguzanyo ku rwego rw’ubuhinzi zivuga ko ruhura n’ibiubazo byinshi. Kuba hashyizzweho icyo kigega, zishobora gutangira kurutera inkunga bikarufasha mu gutera imbere. Ni yo mpamvu twafashe icyemezo cyo gutera inkunga umushinga uzafasha abahinzi gufata ubwishingizi bw’ibikorwa byabo.”

Imibare itangwa na Minisiteri ishinzwe gucyura impunzi no gukumira Ibiza, igaragaza ko mu 2016, hegitari zisaga 7,449 zangiritse mu giye amatungo asaga 2,959 nayo yagizweho ingaruka n’imihindagurikire y’ibihe irimo n’amapfa.

Iyo minisiteri igaragaza ko kuva uyu mwaka watangira, hegitari 2,225 z’imyaka zarangiritse naho amatungo 25 arapfa biturutse ku biza.

Raporo y’iyo minisiteri igaragaza ko uturere twa Nyagatare, Gatsibo, Kayonza, Kirehe na Ngoma mu Ntara y’Uburasirazuba ari tumwe mu twibasiwe n’amapfa, aho hegitari 23,448 z’imyaka zangiritse, amatungo menshi nayo arapfa, mu gihe imiryango 47,306 yahuye n’ikibazo cy’inzara.

Minisiteri ivuga ko 90% by’ibiribwa bituruka mu buhinzi bw’imbere mu gihugu, ikavuga ko ikintu cyose kibangamira umusaruro w’ubuhinzi gishobora gutera ibura ry’ibiribwa mu gihugu.

Usibye gufashwa mu bwishingizi, abahinzi banafashwa mu kuhira ku buso buto, guca amaterasi y’indinganire, guhabwa ifumbire, nkunganire, gufashwa kubonera amasoko umusaruro wabo no kubashishikariza gufata amazi kugira ngo bazayakoreshe kuhira mu gihe cy’izuba.

Minagri igiye gufasha ubwishingizi mu buhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza