00:00:00 IGIHE NETWORK KN KINYARWANDA EN ENGLISH FR FRANCAIS

Leta yashoye miliyari 14 Frw mu koroshya igiciro cy’ibikomoka kuri peteroli mu mezi abiri

Yanditswe na Rabbi Malo Umucunguzi
Kuya 30 June 2022 saa 08:10
Yasuwe :

Minisitiri w’Imari n’Igenamigambi, Dr Uzziel Ndagijimana, yavuze ko gutanga nkunganire ku bicuruzwa byazamuye ibiciro cyane birimo gutwara amafaranga menshi ariko bikorwa mu gukumira ko iri zamuka ryagira ingaruka ku bicuruzwa byinshi.

Kuri uyu wa Kane yagiranye ikiganiro n’abayamakuru, cyagarukaga ku ngengo y’imari iheruka kwemezwa y’umwaka wa 2022/2023 n’izindi ngingo zirebana n’ubukungu.

Dr Ndagijimana yavuze ko izahuka ry’ubukungu ryagaragazaga ko rizatuma ibiciro bitandukanye bizamuka, bihuhurwa n’intambara y’u Burusiya na Ukraine yatumye ibintu bituruka muri ako gace bibura ku isoko mpuzamahanga, bigahenda cyane.

Aho harimo nk’ibikomoka kuri peteroli, ifumbire mvaruganda, ibiribwa by’ibinyampeke n’ibindi.

Iri zamuka ry’ibiciro ku bicuruzwa bimwe ngo ryagiye rituma no ku bindi bizamuka, ibihugu bimwe bigafata ingamba zirimo gufunga ibicuruzwa runaka, ngo bizigamire isoko ry’imbere mu gihugu.

Yatanze ingero ku buryo nka Misiri yahagaritse kohereza mu mahanga ibinyampeke na Malaysia ihagarika kohereza hanze amamesa.

Ibyo byose ngo byakomeje ikibazo cy’izamuka ry’ibiciro, ku buryo u Rwanda ruteganya ko uyu mwaka uzarangira ibiciro bizamutseho 9,5%.

Muri Gicurasi 2022 ibiciro mu mijyi byiyongereyeho 12,6% ugereranyije na Gicurasi 2021, mu gihe muri Mata 2022 byiyongereyeho 9,9%.

Minisitiri Ndagijimana yavuze ko Guverinoma yafashe ingamba zo kugerageza kugabanya umuvuduko w’izamuka ry’ibiciro, ikoresheje uburyo bwa Nkunganire.

Yatanze urugero ku bikomoka kuri peteroli, ati "Leta rero hari inkunga ishyiramo ya Nkunganire kugira ngo ibiciro yego bizamuke kuko ntitwabibuza 100% ariko nibura bizamuke ku muvuduko udakabije, ku buryo hafi kimwe cya kabiri cy’izamuka ry’ibiciro leta iba yashyizemo amafaranga angana na cyo, kugira ngo umuguzi abone igiciro kiri munsi."

"Ni ibintu bihenze, nk’ibiciro muheruka kumva by’ukwezi kwa gatandatu n’ukwa karindwi, iyo nkunga yonyine kuri ayo mezi abiri iragera nko kuri miliyari 14 Frw."

Ni icyemezo ngo gituma ibiciro bihanitse bitagira ingaruka nyinshi ku muturage ariko bikanatuma hatabaho izamuka ryihuse ku bindi bicuruzwa.

Ati "Muzi ko ibikomoka kuri peteroli bigira ingaruka ku biciro bisigaye byose binyuze mu bwikorezi, cyangwa se no mu nganda."

Nkunganire kandi yashyizwe ku biciro by’ifumbire mvaruganda kugira ngo abaturage bakoreshe ihagije bityo n’umusaruro wiyongere.

Dr Ndagijimana yakomeje ati "Ikindi leta yakoze, muribuka ko ibiciro byo gutwara abantu byagumye hasi, mu gihe cya COVID-19 byasubijwe inyuma bijya no ku gipimo cya mbere ya COVID-19. Biracyakomeje n’ubungubu, ku buryo nanone hari ibyo leta yigomwa kugira ngo igiciro kigume hasi, ariko abatanga serivisi bo bishyurwe."

"Nanone hari amafaranga leta yishyura, kugira ngo umuturage yohererwe ariko Leta yo ikishyura."

Ni igikorwa kigiye kumara imyaka itatu.

Icyakora, Minisitiri Ndagijimana yavuze ko ubu buryo bwa Nkunganire ari ubw’igihe gito, mu gihe hakirebwa aho ibintu bigana bijyanye n’izahuka ry’ubukungu n’izamuka ry’ibiciro.

Mu minsi ishize nibwo Ikigo gishinzwe ibikomoka kuri Peteroli muri Kenya, cyatangaje ko guhera muri Kanama uyu mwaka, kizatangira gukura lisansi na mazutu muri Arabie Saoudite ku giciro gito kurusha ikiboneka ku isoko mpuzamahanga.

Ni ibintu bizatuma ibiciro by’ibikomoka kuri peteroli imbere mu gihugu bigabanuka.

Ni umwanzuro wa Guverinoma ya Kenya ukurikiye amasezerano yagiranye n’Ikigo cya Leta ya Arabie Saoudite gicuruza ibikomoka kuri peteroli, Aramco.

Minisitiri Ndagijimana yavuze ko ayo masezerano ashobora no kugirira u Rwanda akamaro.

Yagize ati "Abacuruzi batumiza ibikomoka kuri peteroli bo mu Rwanda bayigura haba muri Tanzania cyangwa se muri Kenya. Ni ukuvuga ngo peteroli yageze muri Kenya ku giciro cyiza, natwe bitugeraho ku giciro cyiza kuko abatumiza peteroli yacu nabo bapiganirwa kuri ayo masoko ya Dar Es Salaam na Nairobi."

"Igiciro baguriraho ni igiciro kiba cyaturutse aho peteroli ituruka. Yaje kuri make rero natwe ubwo turahendukirwa."

Yavuze ko u Rwanda rukomeje kubaka ibigega bya peteroli, ku buryo bizatuma rubasha guhunika nyinshi, igihe habaye ikibazo ku isoko mpuzamahanga ntigihite igira ingaruka ku bakenera ibikomoka kuro peteroli mu Rwanda.

Minisitiri w'Imari n'Igenamigambi Dr Uzziel Ndagijimana aganira n'abanyamakuru kuri uyu wa Kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .