BK mu biganiro bya nyuma byo kwegukana Sonarwa

Yanditswe na Rabbi Malo Umucunguzi
Kuya 29 Ugushyingo 2019 saa 09:27
Yasuwe :
0 0

BK Group Plc ikomeje ibiganiro n’ikigo cy’ubwishingizi cya SONARWA, bigamije ishyirwaho ry’ikigo kimwe gikomeye gitanga serivisi z’ubwishingizi ku isoko ry’u Rwanda.

Ubuyobozi bwa BK buheruka gutangaza ko nyuma y’uko 2017 hatangijwe ikigo gitanga ubwishingizi, BK General Insurance, cyateye imbere ku rwego rukomeye cyane ariko bidahagije ngo kibe ku isonga ku isoko ry’ubwishingizi mu Rwanda.

Ni isoko rihindagurika cyane kuko nko mu ntangiro z’uyu mwaka ikigo Sanlam cyo muri Afurika y’Epfo cyaguze imigabane ya SORAS, cyongeyeho iya Saham byombi bibyara ikigo kimwe cy’ubwishingizi. Ni nyuma y’uko SAHAM nayo yaherukaga kugura imigabane muri CORAR. Byahise bibyara Sanlam Rwanda.

Kuri uyu wa Kane nibwo BK Group Plc yatangaje inyungu yayo mu mezi icyenda ashize, aho bigaragara ko mu gihembwe cya gatatu BK General Insurance yabonye urwunguko rwa miliyari 1.039 Frw zivuye kuri miliyoni 559 Frw zabonetse mu gihe nk’icyo umwaka ushize, bingana n’izamuka rya 86%.

Umuyobozi Mukuru wa BK Group Plc, Dr Diane Karusisi yabwiye itangazamakuru ko nubwo bamaze kugira icyizere ku isoko ry’ubwishingizi mu Rwanda, kwihuza na Sonarwa ari ibintu bakirimo kuganiraho.

Yagize ati “Ni ibintu tukiganiraho, icyo tuzi ni uko tuzagirana ibiganiro biganisha ku mwanzuro wa nyuma mu byumweru biri imbere, tukazamenyesha itangazamakuru n’abaturage ibizavamo, ariko ni ibintu turimo gukoraho.”

“Ariko n’iyo urebye uburyo ikigo cyacu cy’ubwishingizi cyungutse, izamuka rya 86 ku ijana ugereranyije n’umwaka ushize mu rwunguko, tumaze kugira icyizere gikomeye no ku ruhande rwacu nka Banki ya Kigali, dushobora kuzamura ikigo cy’ubwishingizi kigahera hasi kikavamo ikigo cyihariye nibura 20 cyangwa 30 ku ijana by’isoko ry’ubwishingizi.”

Dr Diane Karusisi yavuze ko ibigo byose bigize BK Group Plc byakoze inyungu ishimishije mu mezi icyenda ashize

Imibare igaragaza ko BK General Insurance amafaranga yakiriye avuye mu misanzu y’abishinganisha nayo yazamutse, iva kuri miliyoni 456 Frw igera kuri miliyoni 796 Frw bingana n’izamuka rya 74%, ndetse umutungo mbumbe w’iki kigo uzamukaho 42% ugera kuri miliyari 12.4 Frw.

Sonarwa ni Sosiyete ya mbere nyarwanda yatangije ubwishingizi mu 1975, ishinzwe na Guverinoma y’u Rwanda ariko ibarwa nk’ikigo cyigenga. Itanga ubwishingizi burimo ubw’ubuzima, amashuri y’abana, kwizigama, ubw’ibinyabiziga, inkongi z’umuriro no kwishingira amafaranga muri banki.

BK Group Plc iri mu biganiro n’ikigo cy’ubwishingizi cya SONARWA, bigamije ishyirwaho ry’ikigo kimwe gikomeye gitanga serivisi z’ubwishingizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .