Kwizera Christelle yahawe ibihumbi $97 yo kwagura umushinga we wo gusakaza amazi meza

Yanditswe na Ishimwe Israel
Kuya 15 Ukuboza 2019 saa 04:09
Yasuwe :
0 0

Banki y’Abayisilamu Itsura Amajyambere (IsDB) yahaye Umushinga wo gukwirakwiza amazi mu gihugu “Water Access Rwanda” watangijwe na Kwizera Christelle inkunga ingana n’ibihumbi $97, akabakaba miliyoni 89 Frw, yo kwagura ibikorwa byawo.

Iyi nkunga yatanzwe na IsDB binyuze mu Kigega cyihariye gitera inkunga imishinga ya ba rwiyemezamirimo bato kizwi nka Science, Technology and Innovation Transform Fund (IsDB-STIF).

IsDB ni ikigo gitanga ubufasha mu by’imari kuva mu 1975, gifite icyicaro mu Mujyi wa Jeddah muri Arabie Saoudite, igihugu gifitemo imigabane myinshi mu bigera kuri 57 bigihuriyeho.

Imishinga gishyigikira ni iyifitemo udushya dutanga ibisubizo bijyanye n’ibikenewe kunozwa muri gahunda y’Intego z’Iterambere rirambye (SDGs).

Ikigega cya Transform gifasha imishinga igitangira n’iciriritse, ba rwiyemezamirimo bato n’ibigo byigenga kubona amafaranga y’ibanze yo kwagura ibitekerezo byayo no kubaka igenamigambi ry’ubucuruzi rihamye.

Iyo umushinga wahawe amafaranga witwaye neza nibwo ushobora guhabwa inguzanyo yo gukomeza ibikorwa byawo byo kuzamura imibereho myiza y’abaturage.

Umushinga Water Access Rwanda wemerewe inkunga y’ibihumbi $97 mu gikorwa cyabereye muri Sénégal mu kwezi gushize, aho Kwizera na ba rwiyemezamirimo basobanuye imiterere y’imishinga yabo imbere y’abayobozi bakomeye barimo na Perezida w’icyo gihugu, Macky Sall.

Kwizera yabwiye IGIHE ko inkunga yahawe izamufasha muri gahunda irambye yo kwagura ibikorwa byo gusakaza amazi.

Ati “Turashaka gukomeza kwaguka cyane muri Bugesera, mu Murenge wa Mwogo kuko ni ho hari abakeneye amazi yacu cyane. Ibyo tuzabikora mu mwaka utaha, tuzashaka umurenge tuwuzuze amazi mu kwerekana ko gahunda yacu ishoboka. Icyo gihe rero tuzashaka uko twashaka amafaranga yo gukwiza amazi aho amazi ya WASAC n’andi atagera. Ibi bizajyana no gutanga ibisubizo mu Mujyi wa Kigali ku buryo mu gihe amazi yabuze abantu batajya kure bayashaka.’’

Yavuze ko bifuza gutanga imigabane igera ku 10% kugira ngo bagure ishoramari rizahaza amazi meza mu Rwanda n’ahandi.

Ati “Turifuza kuzashinga uruganda ruzatanga ibisubizo muri Afurika yose ariko ruri mu Rwanda. Igisubizo cyacu tuzagikwiza mu Rwanda ariko tunatangire kwambuka imipaka, tujyane kiosk z’Inuma muri Angola, Congo na Cameroun n’ahandi.’’

Uhawe inkunga muri Transform Fund akayikoresha neza ashobora guhabwa miliyoni y’amadolari ndetse akaba yanagurirwa imigabane mu kigo cye.

Water Access Rwanda imaze gukora imiyoboro y’amazi igera kuri 35 iri mu turere twa Ngoma, Bugesera, Nyarugenge na Rusizi, iha amazi Abanyarwanda ibihumbi 57 ku munsi.

Ikigo cya Water Access Rwanda mu Ugushyingo cyahawe igihembo cya $100,000 muri gahunda ya Africa Netpreneur Prize Initiative, ANPI yatangijwe na Jack Ma Foundation y’umuherwe Jack Ma washinze Alibaba Group, agamije kuzamura ba rwiyemezamirimo bato bo kuri uyu mugabane.

Water Access Rwanda ikorera mu turere dukunze guhura n’ikibazo cy’amazi aho itanga afasha abaturage mu ngo n’ayifashishwa mu bindi bikorwa nko kuhira. Agezwa ku baturage hifashishijwe ahantu hasanzwe amasoko; iyo bamaze gucukura bakayageraho, bifashisha imiyoboro bacomeka ku ipompo ifatwa nka moteri ifasha kuzamura amazi.

Kwizera Christelle w'imyaka 25 yahawe miliyoni 89 Frw azamufasha kwagura ibikorwa bye by'umushinga “Water Access Rwanda” ugamije gukwirakwiza amazi mu gihugu. Ifoto yafashwe na Himbaza Pacifique ku wa 13 Ukuboza 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .