00:00:00 IGIHE NETWORK KN KINYARWANDA EN ENGLISH FR FRANCAIS

Mu mujyi wa Kayonza hagiye gukorwa ibirometero birindwi by’imihanda ya kaburimbo

Yanditswe na Hakizimana Jean Paul
Kuya 4 Gicurasi 2021 saa 10:03
Yasuwe :
0 0

Ubuyobozi bw’Akarere ka Kayonza bwatangaje ko mu Mujyi wa Kayonza uherereye mu Murenge wa Mukarange hagiye gushyirwa kaburimbo mu mihanda ireshya na kilometero 4,5 mu gihe ibindi birometero bitatu bizashyirwa mu isantere y’ubucuruzi ya Kabarondo.

Iki gikorwa cyatangijwe ku mugaragaro mu cyumweru gishize bikaba biteganyijwe ko iyi mihanda izarangizwa kubakwa mu Ukuboza uyu mwaka itwaye arenga miliyari eshanu.

Umujyi wa Kayonza ni umwe mu ihurirwamo n’imihanda iva Kigali yerekeza- Gatsibo na Nyagatare ndetse n’iyerekeza Ngoma na Kirehe, gusa aka Karere kari mu tutari dufite imihanda ya kaburimbo inyura mu Mujyi nyamara hakorerwa ubucuruzi mu buryo buteye imbere.

Kuri ubu iki kibazo kigiye gukemuka. Iyi mihanda izubakwa na kompanyi ebyiri arizo China Road and Bridge Corporation ifatanyije na NPD LTD binyuze mu Kigo cy’Igihugu gishinzwe Iterambere ry’Ubwikorezi RTDA.

Umuyobozi w’Akarere ka Kayonza wungirije ushinzwe Iterambere ry’Ubukungu, Munganyinka Hope, yabwiye IGIHE ko iyi mihanda niyuzura bayitezeho kwihutisha iterambere.

Ati “ Ni ibirometero birindwi n’igice bizubakwa, bine n’igice mu Mujyi wa Kayonza n’ibindi bitatu i Kabarondo bizarangira kubakwa mu Ukuboza. Iyi mihanda tuyitezeho kongera iterambere ry’Akarere kacu.”

Uyu muyobozi yasabye abaturage kuzabungabunga iyo mihanda nimara kubakwa kandi bakayifashisha mu iterambere.

Ati “ Icyo dusaba abaturage ni uko nk’ibi bikorwa remezo biba bije cyane cyane ari iby’iterambere ry’Akarere babigira ibyabo bakabibungabunga kugira ngo bitangirika, babigirire isuku kandi baniteze imbere kurushaho.”

Imwe mu mihanda igiye gushyirwamo kaburimbo harimo ujya ku biro by’Akarere ka Kayonza uturutse muri gare n’undi uvayo, hari undi unyura inyuma y’Umurenge wa Mukarange ukazenguruka igice cy’Umujyi. Mu isantere ya Kabarondo ho hazakorwa umuhanda uturuka Ruramira ukagera Kabarondo.

Uretse ibi birometero bizashyirwamo kaburimbo, aka Karere karanateganya gukora ibindi birometero 60 by’imihanda myiza aho bizakorwa hifashishijwe abaturage muri gahunda ya VUP.

Ubwo hatangizwaga ibikorwa byo kubaka imihanda mishya ya kaburimbo mu mujyi wa Kayonza yitezweho kwihutisha iterambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .