Betting: Inzira yo gukira cyangwa gukena?

Yanditswe na Cyprien Niyomwungeri
Kuya 13 Kanama 2020 saa 10:31
Yasuwe :
0 0

Hari ubwo waba urota kuba nk’Umwongereza, Steve Thomson, wacuruzaga ibinyamakuru akaza gutsindira miliyoni 150 z’ama-pound mu mikino y’amahirwe yari amaze imyaka 25 yariyeguriye.

Inzozi zawe zo guhindura ubuzima, ushobora kuba uzihuza n’iz’Abanyakenya, Florence Mochogu, wabashije gukangaranya SportPesa, ku myaka 60 akayirya akayabo ka miliyoni zirenga 30 z’amashilingi na Samuel Abisai wariye miliyoni $2 mu 2017.

Ingero ni nyinshi z’abahinduriwe ubuzima n’imikino y’amahirwe kuko no mu Rwanda, bahari kandi benshi. Urugero rwa hafi ni Hakizayezu Emmanuel wo mu Murenge wa Gatenga mu Karere ka Kicukiro, watsindiye miliyoni zisaga ebyiri z’amafaranga y’u Rwanda abikesheje gukina umukino uzwi nk’Ikiryabarezi.

Ku rundi ruhande ariko hari n’abatabarika baririra mu myotsi nyuma yo kumarwaho imitungo n’iyi mikino bagana bizeye kunguka birenze.

Imikino y’amahirwe yemewe mu Rwanda irimo; tombola, imikino yo muri Casino, imikino ikoresha imashini z’imikino y’amahirwe, imikino yo gutega n’imikino y’amahirwe yo kuri internet.

Hari abayivuga imyato ko ibagaburira, aho buri munsi nibura badashobora kubura amafaranga make yo kurya. Hari kandi n’abayibonyemo akazi basezera ku bushomeri burundu.

Niyonteze Jacques avuga ko imikino y’amahirwe yagabanyije ubushomeri mu gihugu, ituma hari ababona akazi.

Ati “Nkanjye nkoresha amafaranga runaka nshaka kubonaho nka 5000 Frw cyangwa 10 000Frw. Ku munsi ntabwo nabura ayo kurya kuko sinjya nshaka menshi y’umurengera”.

Avuga ko muri Betting y’amakipe iyo ujyanyemo amafaranga make ntacyo ubona. Iyi akaba ari yo mpamvu y’ubwihebe ku bantu bajyana ibiceri 200 bashaka kurya miliyoni runaka.

Ati “Umuntu iyo afashe 5000 Frw akagura ikipe eshanu abona ibihumbi 80 cyangwa 100 Frw”.

Ku rundi ruhande ariko avuga ko Betting iyo uyigize nk’akazi igusenyera, ariko ufashe 5000 Frw ukagura ikipe eshanu zikina mu minsi itandukanye amafaranga aboneka.

Niyonteze avuga ko amafaranga menshi yatsindiye muri Betting ari ibihumbi 650 Frw, kandi byamuhaye uburyo bwo gukina iyi mikino afite amafaranga agaragara.

Ati “Nshobora gushyiraho 5000 Frw nshaka 50 000 Frw nkayabona, iyo ushyizeho make ushaka menshi ntuyabona”.

Abakina imikino y’amahirwe bavuga ko urebye nka 5% ari bo bashobora kubigiriramo amahirwe, 95% bagahomba.

Hari abo Betting yasize iheruheru

Ibyishimo ni byinshi ku bariye akayabo mu mikino y’amahirwe ariko ku rundi ruhande hari n’imivumo y’abavuga ko basubijwe ku mazi n’iyi mikino, aho bamwe yabatindahaje, ikabatandukanya n’abo bashakanye, imitungo igatokombera kugeza ubwo batakigira n’aho barambika umusaya.

Nsengiyumva, ni umwe mu bavumira ku gahera imikino y’amahirwe irimo gutega ku mikino cyane cyane iy’umupira w’amaguru, gutega ku y’amafarashi n’indi yamenyekanye cyane bita ibiryaberezi. Yatangiye kuyikina mu myaka 15 ishize ahereye ku yitwaga Lotto.

Avuga ko yamuteye ubukene, ikamutandukanya n’umugore kuko yabaga azi ko yagiye ku kazi ari bugire icyo atahana nk’uko byari bisanzwe, agacyura agahinda amafaranga yose yariwe.

Ati “Nta mwana wiga, nta mugore tukigira n’umufite wese arataha mu rugo ntamuhindukiza kubera ibi bintu by’urusimbi.”

“Umugore wanjye yaragiye afitwe n’undi mugabo naramukoye, abana banjye ntibiga, uko banabayeho sinkuzi, umubyeyi wanjye azi ko afite umuhungu i Kigali ariko yabaye Kigali nini”.

Nsengiyumva yifuza ko iyi mikino y’amahirwe yacika bitewe n’ubukene, ubujura, amakimbirane n’ibindi ikomeje guteza.

Ati “Twarariwe, twabaye nk’abasazi, niba twaragiye mu kuzimu ntitubizi. Amafaranga nariwe nanjye ubwanjye sinzi umubare, uyu muzungu ayansubije yahomba”.

Mugenzi we utifuje ko amazina atangazwa muri iyi nkuru, avuga ko agitangira gukina imikino y’amahirwe izwi nka Betting n’ibiryabarezi, yashituwe na 500 Frw yashyizemo akarya 2000 Frw, agashyokerwa.

Gusa ngo iyi mikino imaze kumugeza habi kuko yabaye mu nzu zirenga 20 bamusohora yabuze ubwishyu kuko amafaranga yose aba yaririwe muri iyi mikino. Avuga ko n’ubu hari imyenda ye, matola, ibitanda byagwatiriye kubera imikino y’amahirwe yemeza ko yamubereye ikiyobyabwenge.

Ingo zarasenyutse kubera Betting

Hari abakina imikino y’amahirwe bavuga ko mu byo yabahombeje harimo no gusenyuka kw’ingo zabo kuko udufaranga duke babonye two kuzitunga batujyanayo bigatuma inshingano z’urugo zidindira.

Hari uwagize ati “Naje kuribwa n’ibi byuma, umugore akajya ambaza ngo urara he, nkamubwira ngo mba ndi mu kazi, kahe ko nari mu byuma hano. Nkatanga amafaranga mu byuma ngo ndagaruza, ntabwo ari ko byagenze”.

Mugenzi we ukina imikino y’amahirwe, IGIHE yamusanze aho bayikinira amaze kuribwa 20 000 Frw. Avuga ko yari atungiye umugore i Kigali, azi gushaka amafaranga akaboneka, urugo rwe arutunze neza ariko aho amenyeye iyi mikino byose byayoyotse.

Ati “Naje guhura n’ibibazo nkimara kubimenya. Nabikinnye ndi umusore umeze neza, nambaye inkweto nziza nashidutse nta pantalo ngira”.

“Naje kujya nserera n’umugore, yanyaka 2000 byo kurya kandi na 5000 narayatangaga buri munsi, nkayabura. Byaje kurangira n’ayo kwishyura inzu ndayabura. Umugore kumutungira i Kigali byarananiye burundu”.

Hari n’abavuga kandi ko imitungo irimo inzu, amasambu, moto n’iyindi yabashizeho kubera imikino y’amahirwe yabagize imbata.

Nzayisenga Gaspard avuga ko “Nk’uko baca ikiyobyabwenge cy’urumogi, na betting yagakwiye kujya mu bintu leta yigaho kuko ari ikiyobyabwenge”.

Akomeza avuga ko hari n’abantu usanga barara mu nzu z’imikino y’amahirwe, abiyahura, abirirwa barira kubera ibizwi nk’ibiryabarezi. Hari n’abavuga ko abajura biyongereye kubera ubwihebe n’inyota yo gushaka gukira vuba.

Ati “Abajura babaye benshi, umuntu arabona amafaranga akavuga ngo kugira ngo ntere imbere ni uko ndi buce muri betting, yahagera amafaranga bagahita bayarya, agahinduka inyamaswa”.

Kuki Betting ari ngombwa?

Kanimba François , wari Minisitiri w’Ubucuruzi n’Inganda, niwe watangiye gushyira mu bikorwa politiki igenga imikino y’amahirwe kuko yageze muri iyi Minisiteri yaramaze kwemezwa.

Mu kiganiro aheruka kugirana na IGIHE, yavuze ko iyi imikino y’amahirwe ku Isi ntaho itari, ahubwo ikibazo kijya kihaba ari iyo ubushobozi bw’inzego zigenzura imikorere yayo butarajyanamo imbaraga nyinshi, bityo bigashoboka ko usanga hari abinubira imikorere yayo.

Ati “Ntabwo ntekereza ko imikino y’amahirwe ari ikibazo ku bukungu bw’u Rwanda ahubwo tugomba kwiga neza uburyo bw’imikorere y’ababirimo, inzego zibagenzura, gushyiraho amategeko akakaye no gushaka uburyo akurikizwa kandi hakabaho no kwigisha Abanyarwanda”.

Kanimba avuga ko abanyarwanda bakwiye gukangurirwa ko ‘Niba ugiye muri iyo mikino [betting] ugomba kumenya ikigutegereje, ushobora kunguka cyangwa se ugahomba. Nuhomba ntuzavemo witotomba ngo abantu bazanye ibi bintu baraduhemukiye’.

Ati “Buriya n’iyo twakwibeshya tukavuga ngo imikino y’amahirwe tuyikuyeho, hari imikino y’amahirwe ikorerwa kuri internet, hari abantu benshi bayikina bakoresheje internet. Aho ngaho wababuza gute se?”.

Kanimba yerura ko igituma za Guverinoma akenshi zishyigikira imikino y’amahirwe ari uko ari uburyo bufasha Leta kubona amafaranga ashobora gukoreshwa mu bindi bikorwa by’iterambere.

Inyungu ku gihugu

Imikino y’amahirwe iyo ikinwe neza, ikagenzurwa, yinjiriza igihugu, abayicuruza n’abayikina bakunguka. Itanga akazi kandi ikanasora.

Urugero nko guhera mu 2013 kugeza 2017, miliyari ebyiri na miliyoni 800 z’amafaranga y’u Rwanda zari zimaze kwinjira mu gihugu mu buryo bw’imisoro, mu gihe miliyoni 260 Frw zari zimaze kwinjira nk’amafaranga yo gusaba impushya.

Icyo gihe asaga miliyoni 236 Frw yamaze gutangwa n’abakoresha mu kwishyurira ubwiteganyirize abakozi muri RSSB, mu gihe abakozi bakora mu bigo bikina imikino y’amahirwe bari bamaze kwishyurwa asaga miliyari y’amafaranga y’u Rwanda.

Imikino y’amahirwe kandi igira uruhare mu kunganira ubwisungane mu kwivuza ’Mituelle de Sante’.

Iteka rishya rigena inkunga ishyirwa mu bwisungane mu kwivuza, rigaragaza ko 10% by’amafaranga acibwa kuri serivisi zihabwa amasosiyete y’ubucuruzi akora ibikorwa by’imikino y’amahirwe azwi nka Betting, yishyurwa Minisiteri ifite ubucuruzi mu nshingano na yo azajya agenerwa kunganira ubu bwisungane.

Hari aho imikino y’amahirwe yaciwe

Muri bimwe mu bihugu, imikino y’amahirwe yarahagaritswe bitewe n’impamvu zitandukanye nk’imisoro ihanitse no kuba ikenesha abaturage n’izindi ngaruka.

Urugero rwa hafi ni muri Kenya, aho sosiyete zikomeye zacuruzaga imikino y’amahirwe, SportsPesa na Betin, zahagaritse ibikorwa byazo kubera umusoro uremereye wagiye ushyirwaho n’ubutegetsi ugera kuri 20% ku mikino yose yakinwe.

Uganda na yo yatangaje ko itazongerera igihe impushya za kompanyi z’imikino y’amahirwe mu rwego rwo kuyica. Ibi ni ukubera ingaruka mbi imikino y’amahirwe irimo kugira ku rubyiruko.

Gusa ku ruhande rw’u Rwanda, Minisiteri y’ubucuruzi n’inganda ivuga ko iteganya gukora ubukangurambaga ku buryo bwagutse hagamijwe ko ibijyanye n’imikino y’amahirwe byumvikana nk’uburyo bwo gukina ukaba wabona amafaranga cyangwa ugahomba.

Kugeza ubu mu Rwanda hari sosiyete z’imikino y’amahirwe 23.

Abakina imikino y'amahirwe baba bitegereza uko amakipe akubiye kugira ngo batege
Uko imikino irimo kugenda, abateze niko baba bareba niba ibyo bavuze bihuye n'ibiyivuyemo
Mu Rwanda kandi hari indi mikino y'amahirwe itari iyo gutega ku makipe gusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .