Daimler yamuritse Mercedes-Maybach S-Class nshya yitezweho kwigarurira isoko (Amafoto & Video)

Yanditswe na Umwali Zhuri
Kuya 20 Ugushyingo 2020 saa 02:10
Yasuwe :
0 0

Uruganda Daimler rubarizwamo ubwoko bw’imodoka za Maybach, rwatangaje ko rwiteze gukuba kabiri umubare w’izo rugurisha ku isoko, nyuma yo kubona isoko rinini mu bihugu birimo u Bushinwa, Korea n’u Burusiya.

Uru ruganda rwamuritse Mercedes-Maybach S-Class nshya, ije ku isoko isanga Mercedes-Maybach GLS, yo mu bwoko bw’imodoka ziba zigiye hejuru (SUV), yashyizwe ku isoko umwaka ushize.

Uru ruganda ari narwo rubarizwamo Mercedes-Benz, rwatangaje ko mu mwaka ushize rwagurishije imodoka 12.000 za Maybach, ari nawo mubare munini rwabashije gucuruza mu mwaka. Ni imodoka zifashishwa mu gutwara abanyacyubahiro cyangwa abanyabirori.

Ibiciro by’izi modoka za Maybach bihera ku 173.000$ miliyoni 170 Frw ku modoka ziheruka gushyirwa ku isoko, nk’uko BBC yabitangaje. Gusa gishobora kuzamuka kikagera ku 250.000$ (asaga miliyoni 246 Frw), bitewe n’ibintu by’umwihairko umuntu yasaba ko bamwongerera ku modoka akeneye kugura.

Iyi modoka nshya ya Maybach yubatswe hagendewe ku miterere n’ikoranabuhanga rya Mercedes-Benz S-Class, yitezweho guhangana ku isoko n’imodoka nshya zirimo gushyirwa ku isoko n’izindi nganda nka Bentley Flying Spur na Rolls-Royce Ghost.

Yanahawe umwihariko mu miterere y’imbere mu modoka, nk’ibintu mu gihe umuntu yicaye inyuma mu modoka ashobora gukora, nko kwinjira, yagera mu modoka agakanda ahantu urugi rukifunga.

Biteganywa ko mu masoko amwe, Mercedes-Maybach S-Class zizatangira kugurishwa mbere y’uko uyu mwaka urangira, mu gihe mu Budage ari mu mwaka utaha wa 2021.

Iyi modoka kandi ikozwe mu buryo iyo umuntu yinjiyemo, hari udutara tumurika gake duhita twaka tumuha ikaze, kandi ayo matara ashobora kwaka ku rwego nyir’imodoka yabigennye.

Izi modoka zinifitemo ikoranabuhanga rya MBUX Interior Assist, ryunganira umuntu igihe agaragaje ko hari ikintu ashaka gukora, kuko rifite ubushobozi bwo gusoma icyo umuntu akeneye, rigendeye ku bimenyetso akoresha amaboko, ku bantu bicaye mu myanya y’inyuma.

Nk’urugero, rishobora kohereza umukandara muremure, igihe bigaragaye ko umuntu ashaka kongera umukandara wo mu modoka, hagendewe ku byo arimo gukoresha amaboko. Harimo n’ikimenyetso giteguza umushoferi, igihe umugenzi w’inyuma mu modoka agaragaje ko ashaka kuvamo.

Izi modoka zinafite ikoranabuhanga rishobora gutuma mu gihe runaka, imodoka yunganira umuntu igihe yari agiye gukora impanuka, akagera aho agiye mu mutekano usesuye, hagira ikibazo kijya kubaho mu muhanda, uburyo imodoka ikoranye nabwo bugakumira ko hari ikintu imodoka yapfa kugonga.

Harimo uburyo buzwi nka DRIVE PILOT, bushobora gutuma imodoka ubwayo yitwara , ku buryo nko mu muhanda mwiza, DRIVE PILOT ishobora gutwara imodoka, ikabasha kunyura ku zindi itazigonze, igihe ariko umuntu yashyizeho umuvuduko utarenga 60 km/h.

Uretse Maybach ikomeje guhirwa ku isoko, n’izindi nganda nazo isoko ryifashe neza, aho nk’ikigo BMW ari nacyo uruganda rwa Rolls-Royce rubarizwamo, muri uku kwezi ruheruka gutangaza ko mu gihembwe cya gatatu inyungu yazamutse ku 10%, bitewe n’ubukenerwe bw’imodoka cyane cyane muri Aziya.

Ni ubwoko bw'imodoka zinyaruka cyane
Ushobora kubona Mercedes-Maybach S-Class mu ibara ushaka
Ni imwe mu modoka zigezweho z'umwaka wa 2021
Iyi modoka ni imwe mu zigezweho ku isoko
Bene izi modoka zikunze gukoreshwa mu gutwara abanyacyubahiro
Ni imodoka iteye amabengeza mu buryo igaragara, ikagira umwihariko mu ngufu ifite
Ni imodoka ikomeye kandi ifite moteri y'ingufu nyinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .