Kigali: Nyuma y’ivugururwa rya internet mu modoka, abagenzi barishimira imikorere ya Tap&Go WiFi

Yanditswe na Thamimu Hakizimana
Kuya 11 Gashyantare 2019 saa 09:53
Yasuwe :
0 0

Nyuma yaho umushinga wa interinet mu modoka zitwara abantu ugiriye ibibazo abakiriya bakayibura, Ikigo AC Group, muri kanama 2018 cyatangije undi mushinga wo kuwuvugurura wiswe Tap&Go WiFi.

Ubuyobozi bwa AC Group, yanazanye amakarita yo kwishyuriraho ingendo mu Mujyi wa Kigali azwi nka Tap&Go, bwatangarije IGIHE ko nta kibazo cy’abagenzi bijujutira interinet mu mudoka zibatwara kizongera kubaho.

Ushinzwe gahunda yo gushyira internet mu modoka mu kigo AC Group, Munezero Christa, yemeza ko mbere ikibazo cya interinet cyagaragaraga mu modoka zitwara abagenzi cyaterwaga n’uko ahanini bari bakiri mu igerageza.

Yagize ati “Interinet twatangiye kuyishyiramo muri Kamena 2018 dutangirana n’imodoka 100 ariko aho bwari mu buryo bw’igerageza. Nyuma twagiye duhabwa amakuru n’abagenzi bagaragaza ko bishimiye iyo serivisi noneho dutangira gutekereza uko twazishyira mu modoka zose.”

Yongeyeho ko ubu interinet imaze gushyirwa mu modoka zose ziri muri kigali kandi ikora neza ndetse bari kwiga uko bazanashyiramo porogaramu izajya ifasha abantu gusoma ibitabo n’ibindi kugira ngo igihe bari mu rugendo bibafashe.

Munezero yakomeje avuga ko interinet yo mu modoka yitabirwa cyane kuko mu Ukuboza 2018 basanze abantu ibihumbi 300 aribo bayikoreshaga ku munsi.

Umuturage witwa Bizumuremyi Fidèle, avuga ko yishimiye cyane kuba ikibazo cya interinet yo mu modoka cyakemutse.

Yagize ati “Ubu ibintu ni byiza kuko noneho interinet iri gukora nta kibazo, naho mbere baratubwiraga ngo irakora kandi idakora mu gihe byahoraga bivugwa ko mu mafaranga y’urugendo umuntu ariha haba harimo n’aya Interinet.”

Mukeshimana Zawadi we yagize ati “Twabyishimiye cyane kandi wumve ngo cyane kubera ko nk’ubu urabona ko mpugiye kuri Facebook mu mwanya imodoka itarahaguruka muri gare, mbere wategerezaga ko yuzura ukarambirwa kuko ntacyo wabaga uhugiyeho."

Ubuyobozi bwa AC Group bunemeza ko buri gukemura utundi tubazo duke twagiye tugaragara mu minsi ishize turimo utw’abashoferi bishyurwaga mu ntoki, ku buryo ubu bugiye no gushyira Camera mu modoka zose zitwara abagenzi kugira ngo hajye hamenyekana amakuru yose yabereye muri ibyo binyabiziga.

Umugenzi ugiye kwinjira mu modoka arabanza akishyura akoresheje ikarita ya Tap&Go
Ku modoka hari ikirango cyerekana ko mu modoka harimo internet ya Tap&Go Wifi
Umugenzi arimo kugenda mu modoka akoresha Internet

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza