00:00:00 IGIHE NETWORK KN KINYARWANDA EN ENGLISH FR FRANCAIS

Urukiko ruburanisha Kabuga Félicien rwahawe Perezida mushya

Yanditswe na Rabbi Malo Umucunguzi
Kuya 28 Kamena 2022 saa 03:33
Yasuwe :

Urwego rwasigariyeho inkiko mpuzamahanga mpanabyaha (IRMCT) rwahawe perezida mushya, umucamanza Graciela Gatti Santana ukomoka muri Uruguay, asimbuye Carmel Agius.

Kuri uyu wa Mbere nibwo Umunyamabanga Mukuru w’Umuryango w’Abibumbye, António Guterres, yashyizeho umucamanza Santana nka Perezida w’Urwego muri manda y’imyaka ibiri, izatangira ku wa 1 Nyakanga 2022.

Santana umaze imyaka isaga icumi muri uru Rwego, mu mirimo ye akaba yaraburanishije imanza zitadukanye ndetse ari no mu nteko y’abacamanza igomba kuburanisha Félicien Kabuga uregwa ibyaha bya Jenoside.

Urukiko ruheruka kwemeza ko Kabuga afite ubushobozi butuma aburanishwa, ndetse ko agomba kuguma i La Haye mu Buholandi, ku buryo mu minsi ya vuba urubanza rwe rushobora gutangira.

Umucamanza Santana afite uburambe mu mwuga w’ubucamanza, yinjiriyemo muri Uruguay mu 1992. Ni we mugore wa mbere uhawe inshingano za Perezida w’Urwego.

Umucamanza Graciela Gatti Santana yabaye umugore wa mbere ugiye kuyobora IRMCT

Asimbuye umucamanza Carmel Agius ukomoka muri Malta, wayoboraga Urwego guhera muri Mutarama 2019. We yagiyeho asimbuye Umunyamerika Theodor Meron.

Umucamanza Agius yamenye umusimbura we ari mu Rwanda

Umucamanza Agius urimo gusoza inshingano ze, kuri uyu wa Kabiri yasoje uruzinduko rwe mu Rwanda, rwafatwaga nko gusezera ku nzego z’ubutabera bafatanyaga.

Muri urwo ruzinduko yahuye n’abayobozi barimo Minisitiri w’Ububanyi n’amahaga, Dr Vincent Biruta, Umushinjacyaha Mukuru Aimable Havugiyaremye na Perezida w’Urukiko rw’Ikirenga, Faustin Ntezilyayo.

Yanahuye kandi n’abarimo Perezida wa Ibuka, Egide Nkuranga na bamwe mu barokotse Jenoside yakorewe Abatutsi mu 1994.

Baganiriye ku ngingo zitandukanye zirimo intambwe zimaze guterwa mu rubanza Ubushinjacyaha buregamo Félicien Kabuga, ibijyanye no kurangiza ibihano n’ibindi.

Rwari uruzinduko rwa kabiri Perezida Agius agiriye mu Rwanda nyuma yo gushyirwaho, aho urwa mbere rwabaye muri Mata 2019.

Uru ruzinduko rwagombaga kuba muri Mata 2020, ariko ntirwashoboka kubera amabwiriza yakumiraga ingedo kubera ubukana bw’icyorezo cya COVID-19.

Mu gihe yitegura gutanga ibiro, Agius aheruka kuvuga ko bibabaje kuba asoje manda hakiri ibibazo birimo Abanyarwanda baherukaga kujyanwa muri Niger ikabirukana, ubu badafite aho berekeza.

Ni ijambo yagejeje ku Kanama k’Umuryango w’Abibumbye gashinzwe umutekano, ku wa 14 Kamena.

Harimo batanu bagizwe abere n’abandi bane bahamijwe ibyaha bya Jenoside barangije ibihano, bafunguwe bakanga gutaha mu Rwanda kubera impamvu bita iz’umutekano wabo, bakabura n’ikindi gihugu cyabakira.

Yagize ati "Ikimbabaje, ngarutse muri iki cyumba mu Ukuboza umwaka ushize natangarijemo ko ikibazo cy’abantu bagizwe abere cyangwa barangije ibihano cyakemutse, noneho kuvuga ko atari ko bikimeze, ko amasezerano yasinywe hagati y’Umuryango w’Abibumbye na Niger yo kwimurira abo bantu ku butaka bwa Niger atubahirijwe."

"Ubwanditsi bw’urwego bukomeje gukora ibishoboka byose mu gushaka uko twasohoka muri iki kibazo kitoroshye."

Mu barimo gusiragira harimo abari abanyapolitiki Protais Zigiranyirazo wayoboye Perefegitura ya Ruhengeri akaba na muramu wa Juvenal Habyarimana, Ntagerura André wabaye Minisitiri w’Ubwikorezi na Mugiraneza Prosper wabaye Minisitiri w’abakozi ba Leta.

Mu basirikare harimo Colonel Alphonse Nteziryayo wanayoboye Military Police, Colonel Nsengiyumva Anatole wayoboye iperereza rya gisirikare, Lieutenant Colonel Tharcisse Muvunyi wayoboye Ecole des Sous Officiers (ESO) i Butare, Major François-Xavier Nzuwonemeye na Captain Sagahutu Innocent.

Umucamanza Carmel Agius yamenye ugomba kumusimbura ari mu ruzinduko mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .