Abicwa na Malariya bagabanutseho 32% mu mwaka umwe: Imiterere y’urugamba rwo kuyirandura mu Rwanda

Yanditswe na Akayezu Jean de Dieu
Kuya 21 Mata 2021 saa 11:49
Yasuwe :
0 0

Malariya ni imwe mu ndwara zihangayikishije ikiremwamuntu kuko iri mu zitwara ubuzima bw’abantu benshi, iterwa n’agakoko gakwirakwizwa n’umubu w’ingore witwa ‘Anophele’. Ni indwara ishobora kwirindwa kandi iravurwa igakira.

Ishami ry’Umuryango w’Abibumbye ryita ku Buzima, OMS, rigaragaza ko nibura mu minota ibiri Malariya iba ihitanye umuntu mu gihe nibura abantu barenga miliyoni 200 ku Isi aribo bayandura buri mwaka.

Mu 2019, OMS yagaragaje ko abanduye iyi ndwara mu mwaka bari miliyoni 229, mu gihe umubare w’abo yahitanye wari ibihumbi 409.

Abana bari munsi y’imyaka itanu nibo bagaragaye nk’abafite ibyago byo kurwara Malariya kuko mu 2019, abagera kuri 67% [ibihumbi 274 mu bihumbi 409 by’abo yishe bose hamwe ku Isi] by’abishwe na Malariya bari abana bari munsi y’imyaka itanu.

Afurika niwo mugabane ugirwaho ingaruka zikomeye na Malariya, aho nibura mu 2019, abantu bose barwaye n’abishwe na Malariya ku Isi harimo 94% bo muri Afurika.

Muri uwo mwaka kandi umubare w’amafaranga Isi ishora mu guhangana na Malariya wageze kuri miliyari eshatu z’amadorali ya Amerika. Umusanzu utangwa na za Guverinoma mu guhashya iyi ndwara ungana na miliyoni 900 z’Amadorali ya Amerika, ni ukuvuga 31% by’amafaranga yose akoreshwa mu rugamba rwo guhangana na Malariya ku Isi.

Abahanga bagaragaza ko nko mu Rwanda mu bihe by’amezi ajyana n’umukamuko w’imvura aribwo Malariya iba yiganje. Ayo mezi arimo Mata na Kamena, ikongera kugaruka mu Ukwakira na Ukuboza.

Imibu itera Malariya yororoka mu buryo bworoshye binyuze mu bigunda byegereye ahari ingo z’abaturage, ibidendezi by’amazi n’ibindi.
Nibura agafuniko ka Fanta [kamwe gapfundikira icupa rya Fanta] ushobora kukajugunya ahantu kakirekamo amazi noneho hashira icyumweru ya mazi arimo, iyo habonetse umubu umwe uje utaremo amagi [kuko umwe ushobora gutera hagati ya 100 na 150 inshuro imwe], birashoboka ko ya magi ashobora gukurira rimwe cyangwa kimwe cya kabiri cyayo.

Ibi bishatse kuvuga ko aya magi yakura akavamo imibu ari nayo izororoka ikaba imibu myinshi. Iyi niyo mpamvu abahanga batanga inama zo kwirinda ikintu cyose cyatuma amazi yireka ahantu by’umwihariko mu bihe by’imvura ari nabyo imibu ikunze kororoka cyane.

Mu Rwanda, hari icyizere cyo guhashya Malariya

Malariya yatangiye kugera mu Rwanda mu myaka ya 1900, aho kuva icyo gihe itahwemye kwica abanyarwanda ahanini biturutse ku makuru make babaga bayifiteho ndetse nta na gahunda zihamye zo kuyirinda cyangwa uburyo bwo kuyivura.

Mu myaka mike ishize, nibwo Guverinoma y’u Rwanda yashyizeho uburyo bwihariye bwo kurwanya Malariya ndetse inzego zitandukanye z’igihugu zinjira mu bukangurambaga bwo gutera umuti wica imibu ikwirakwiza agakoko gatera Malariya.

Hagiye kandi hatangwa inzitiramibu ku baturage by’umwihariko ababyeyi n’abana ndetse n’izindi ngamba zikomatanyije zakomeje kuba imbarutso yo kuba uyu munsi abarwayi n’abahitanwa n’iyi ndwara bagenda bagabanyuka.

Imibare y’Ikigo cy’Igihugu gishinzwe Ubuzima mu Rwanda, RBC, igaragaza ko nibura abantu babaruwe barwaye malariya mu 2019, bari miliyoni 3,6 mu gihe abayirwaye mu 2020, bageze kuri miliyoni 1,8. Ni igabanyuka rikomeye cyane kuko nibura bigaragara ko abarwayi ba Malariya baganyutseho 50% mu mwaka umwe.

Ibi kandi bijyana n’igabanyuka ry’abagize Malariya y’igikatu, ni ukuvuga ko aha akenshi abantu baba batinze kwivuza noneho iyi ndwara ikabazahaza ndetse akenshi bikaba byabaviramo urupfu. Aba barwayi rero mu 2019, bari 6000 mu gihe baje kugabanuka mu 2020 bagera ku 3000. Ni ukuvuga ko aha habaye igabanyuka rigera kuri 45%.

Umuyobozi w’Ishami rishinzwe kurwanya Malariya muri RBC, Dr Mbituyumuremyi Aimable, yavuze ko iryo gabanyuka ry’abarwaye iyi ndwara rijyana n’igabanyuka ry’abahitanwa nayo kuko mu myaka ibiri ishize habayeho igabanyuka rigaragara.

Dr Mbituyumuremyi avuga ko nko mu 2019, abari bishwe na Malariya bari 218 mu gihe abo yahitanye mu 2020 bari 148. Ni ukuvuga ko habayeho igabanyuka rya 32%.

Ati “Uwo rero ni umusaruro w’ingamba zikomatanyije cyane cyane zo gutera umuti wica imibu ikwirakwiza udukoko dutera Malariya imbere mu mazu y’abantu.”

Avuga ko mu myaka ibiri ishize hari uturere 12 tw’igihugu twiganje mu Burasirazuba, Umujyi wa Kigali n’Amajyepfo twagaragayemo cyane Malariya ahahise hafatwa ingamba zo gutera umuti wica udukoko tuyikwirakwiza mu ngo z’abaturage.

RBC igaragaza ko mu gihugu hose nibura 70% hafi bya Malariya iri mu gihugu ituruka muri utwo turere 12 two muri izo ntara z’Uburasirazuba, Amajyepfo n’Umujyi wa Kigali.

Dr Mbituyumuremyi yabwiye RBA, ko izindi ngamba zafashwe ari ugutanga inzitiramibu mu baturage aho nibura mu mwaka ushize hatanzwe izigera kuri miliyoni esheshatu ari nabyo byagize uruhare mu gutuma imibare y’abarwara Malariya igabanyuka.

Akomeza agira ati “Ariko ntitwakwirengagiza uruhare rw’Abajyanama b’Ubuzima kuko bagiye badufasha mu kuvura Malariya hakiri kare mu rwego rw’Imidugudu, ibyo bigatuma abantu bicwa na Malariya ndetse n’abazahazwa nayo baragabanyutse cyane.”

RBC igaragaza ko nibura 56% by’abarwaye Malariya bose mu gihugu bakirwa n’Abajyanama b’Ubuzima bakabavura bagakira batageze ku Bigo Nderabuzima cyangwa Ibitaro.

Muri Mata 2018 nibwo u Rwanda rwiyunze kuri gahunda y’ibihugu bikoresha Ururimi rw’Icyongereza, Commonwealth, mu kugabanya kabiri ibibazo bishingiye kuri malariya mu myaka itanu iri imbere kugeza mu 2023.
Intego za OMS kuri malariya uhereye mu 2016 kugeza mu 2030, ni ukugabanya abarwara iyo ndwara n’abo ihitanaho 40 %, ugereranyije n’uko byari bihagaze mu 2015.

Kurara mu nzitiramubu ni imwe mu nzira nziza zo kurwanya Malariya
Ingabo z'u Rwanda zagize uruhare mu gutera umuti wica imibu itera malariya mu bishanga no mu bihuru, mu bukangurambaga bwatangijwe muri Kamena 2018
Mu guhangana na Malariya, mu 2018 u Rwanda rwamuritse amavuta umuntu yisiga ntarumwe n'imibu itera
Aha ni i Gisagara aho abaturage bari bahurijwe hamwe mu 2018, bigishwa uko bakwirinda Malariya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .