Minisante yiseguye ku bantu bapimwa Sida batabibwiwe

Yanditswe na IGIHE
Kuya 20 Ukwakira 2019 saa 02:57
Yasuwe :
0 0

Minisiteri y’Ubuzima yavuze ko abarwayi bakwiye kujya basobanurirwa buri kizamini cyose bagiye gukorerwa mu gihe bagiye kwivuza aho kugira ngo bifatwe batabizi.

Abantu batandukanye ku mbuga nkoranyambaga bagarutse ku buryo abaganga hari ubwo bafata ibizamini bya Sida umuntu wagiye kwivuza indwara idafite aho ihuriye n’iki cyorezo, kandi ntaho ihuriye n’ikibazo afite.

Uwitwa Nasra Bishumba yifashishije urukuta rwe rwa Twitter, maze abaza ikintu kigenderwaho kugira ngo umuntu apimwe agakoko gatera Sida.

Ati “Mperutse gupimwa agakoko gatera Sida ubwo nari ngiye kwisuzumisha malaria. Ntabwo ngomba kubanza nabazwa mbere? Ubwo nari mbajije, muganga yarasetse arangije arambwira ngo icyiza ntayo ufite.”

Uwitwa Isabelle nawe yunzemo ati “Ntibari bakwiye [avuga gupima Sida umurwayi atabizi]. Ubusanzwe muganga usaba ko hakorwa ikizamini cy’amaraso, agomba kuvuga ibyo agiye gupima. Ikizamini cy’agakoko gatera Sida gikorwa igihe umuntu atwite cyangwa se akekwaho iki cyorezo. Ibyo mbizi kuko ntanga ibizamini buri tariki ya 01 Ukuboza ku bitaro bitandukanye kandi nkabaza uburyo bwiza bwo kubikora.”

Fiona Mbabazi nawe yunze mu bavuze ko iki kizamini gifatwa umuntu atabizi, avuga ko ‘bimaze kuba nk’umugenzo … nanjye byambayeho. Umuganga yaravuze ngo ntabwo ushaka kumenya niba uri muzima?”

Nkunda Nelly nawe ati “nanjye byambayeho mu kwezi gushize, nagiye kwisuzumisha malaria birangira ntanze ibizamini by’agakoko gatera Sida. Bisa n’ibimaze kuba ibintu rusange.”

Rutembesa ati “ Ariko uziko n’umuntu aguhaye amafaranga ku ngufu nabyo ari icyaha? Nkanswe kugupima HIV utabisabye, si HIV gusa ni buri kimwe utatanze uburenganzira, nka Kenya aho nkunze kujya ugiye ucyeka malaria urababwira bagahera kuri malaria, bayibura bakakubwira izindi.”

Minisiteri y’Ubuzima yasubije abari bifashishije urukuta rwa twitter bagaragaza ko batishimiye uburyo iyi serivisi itangwa, maze ivuga ko bigendanye n’uburyo bwayo bw’imitangire ya serivisi “abagana amavuriro bafite uburenganzira bwo guhabwa amakuru. Turisegura ku kuba ikizamini cy’agakoko ka sida cyarafashwe mutabizi”.

Yaboneyeho isaba kumenyeshwa amakuru arambuye y’aho byabaye kugira ngo itangire kubigenzura byimbitse.

Umuyobozi w’ibitaro La Croix du Sud, Dr.Nyirinkwaya Jean Chrysostome, yavuze ko ibyo minisiteri yavuze aribyo, ko bidakwiye ko Sida bayipima ‘utabanje kubibwira umurwayi ko ugiye kuyimupima’ kuko atari ikizamini gisanzwe.

Yavuze ko kuba hari abaganga bamwe bafata iki kizamini batabibwiye abarwayi, biterwa no kutubahiriza amahame agenda umwuga wabo.

Ati “Ariko buriya n’abaganga, mu mashuri batwigisha indwara ariko ugasanga kenshi ibintu bita iby’amahame agenda umwuga ugenda ubyigira mu kazi, cyangwa ugasanga abantu barabyigishijwe ariko ntibabishyiremo imbaraga, bakagenda babibonera mu kazi.”

Ku rundi ruhande, Dr Nyirinkwaya yavuze ko hari impamvu zishobora gutuma umurwayi apimwa Sida mu gihe yagiye kwivuza malaria cyangwa ibicurane.

Ati “Igituma rimwe na rimwe muganga yavuga ati reka uyu muntu musabe ibizamini by’agakoko gatera Sida, uzasanga umurwayi atakubwiye byose, ushobora gusanga ari wa murwayi uhora kwa muganga, yivuza yaba ibicurane n’ibindi. Umuganga akibaza ati uyu muntu uhora arwaragurika.”

Gusa ariko nubwo byaba bimeze bityo, ngo ‘muganga yabanza akamubaza akabimubwira’.

Yakomeje agira ati “Kera imiti ya malaria itaraboneka, abantu bari baranduye benshi twagiye tubimenya kuko twagendaga tubona nko mu kwezi yarwaye inshuro esheshatu maralia, kurwaragurika ugasanga ari iyo mpamvu. Kuva imiti yaboneka, bene abo barwayi ntabwo twongeye kubabona.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza