Ni ryari umwana ashobora kuganirizwa ku bijyanye n’ubuzima bw’imyororokere?

Yanditswe na Thamimu Hakizimana
Kuya 20 Mutarama 2020 saa 09:07
Yasuwe :
0 0

U Rwanda ruhanganye mu buryo bukomeye n’ikibazo cy’inda ziterwa abana, aho imibare ya Minisiteri y’Ubuzima n’iy’Uburinganire n’Iterambere ry’Umuryango igaragaza ko kuva mu 2016 kugeza muri Kanama 2019, abangavu basaga ibihumbi 70 basambanyijwe banaterwa inda.

Guhera muri Mutarama 2019 kugera muri Kanama imibare y’abangavu batewe inda yari imaze kugera ku 15 596.

Imwe mu mpamvu ikomeye ituma iki kibazo gikomeza kugira ubukana ni ukubura ubumenyi ku buzima bw’imyororokere, kudakurikiranirwa hafi n’ababyeyi cyangwa abarezi babo.

Bamwe mu bakobwa batewe inda bagaragaza ko iyo baza kuba barabonye ababaganiriza ku buzima bw’imyororokere batari kwishora mu busambanyi kuko babikoze badasobanukiwe ingaruka babikuramo.

Ku rundi ruhande ariko ababyeyi bavuga ko bigoye kuganiriza umwana ibijyanye n’imibonano mpuzabitsina n’ubuzima bw’imyororokere muri rusange, bitwaje ko mu muco nyarwanda bishobora kuba bitakirwa neza.

Kuba bamwe mu babyeyi badasobanukiwe igihe baganiriza abana babo ku bijyanye n’imibonano mpuzabitsina n’ubuzima bw’imyororokere, byatumye IGIHE iganira n’abakurikiranira hafi iby’iyi ngingo kugira ngo imenya igihe umwana yayiganirizwaho.

Umwana aganirizwa ibijyanye n’imibonano afite imyaka ingahe?

Mu kiganiro IGIHE yagiranye n’ushinzwe itumanaho mu kigo cy’ubuzima n’uburenganzira (HDI), Uwamariya Diane, yasobanuye ko igihe icyo ari cyo cyose umwana ashobora kuganirizwa ku ngingo y’imibonano mpuzabitsina bitewe n’imyaka afite.

Ati “Ni ukuvuga ngo nko mu myaka itatu cyangwa ine igihe umwana aba yatangiye gukura no gushaka gusobanukirwa byinshi ku mubiri we. Hari ibimenyetso agenda agaragaza agatangira gukina niba ari umukobwa agatangira gukina n’umuhungu ashaka kumenya ibyo umuhungu afite we adafite n’umuhungu agakina ashaka kumenya ibyo umukobwa afite we adafite”.

Iyo umwana ageze muri ibyo bihe, umubyeyi we amusobanurira ibice bigize umubiri we ariko ntamubwire amazina y’igitsina kugira ngo ayo magambo atazajya amuhoramo ahubwo agakoresha andi magambo yo kuzimiza.

Uwamariya atanga urugero rw’uko wabwira umwana uti “Nujya ukina n’umwana w’umuhungu ntukamukore ku ku myanya y’ibanga kuko uba wayimusobanuriye iyo ariyo.”

Urugero nk’abana bari hagati y’imyaka irindwi na 10 umubyeyi yigisha abana b’abakobwa ko muri icyo gihe bashobora kujya mu mihango akabigisha ibijyanye n’isuku no kuyigira ku mubiri.

Yongeyeho ko umwana iyo amaze kugira imyaka umunani kuzamura umubyeyi we aba akwiye kumubwira ibintu byose ntacyo amuhishe.

Ati “Rero iyo amaze kugera mu myaka umunani gutyo yatangiye kujya ku ishuri abonana n’abandi, nibwo atangira kumenya amakuru ku buzima bw’imyororokere atandukanye n’ayo umubyeyi amubwirara, aho hari abo usanga bakubaza ngo ese umwana ava he? bigenda gute kugira ngo avuke? ibintu nk’ibyo.”

Umwana wageze muri iki kigero umubyeyi we amubwira ibintu hafi ya byose bijyanye n’uko agenda akura niba ari umuhungu akamubwira ko hari igihe azaniga ijwi akaniroteraho, umukobwa akamubwira ko azamera amabere akanajya mu mihango n’ibindi.

Uko umwana yakwitwara muri ibyo biganiro

Uwamariya yemeza ko bitewe n’uko umwana aba afite amatsiko, iyo ari kuganirizwa ku bijyanye n’imibonano mpuzabitsina agahabwa umwanya agenda yirekura akavuga uko yumva ibyo abwirwa.

Ati “Iyo wamuteze amatwi ukamwumva ukamuha umwanya, ni naho akubwira ibyo azi noneho ukabasha gusobanukirwa bya binyoma byose baba bamubwira n’ibintu byose bamubwira byamurangaza kuko atinyuka akakubwira”.

Igihe umubyeyi yumvishe umwana amubajije ikibazo gikomeye kandi kimutunguye, ntakwiye kumukanga cyangwa kumureba igitsure ahubwo akwiye kumuha umwanya kugira ngo amuyobore mu nzira nziza yakuriramo.

Uwamariya avuga ko umwana aganirizwa bitewe n’ikigero arimo kuko nk’umwana w’imyaka ine atahabwa inyigisho z’umwana ugeze mu bugimbi n’ubwangavu.

Noneho hejuru y’imyaka 10 nibwo ababwira ibijyanye n’inda zitifuzwa ku bangavu no gukoresha agakingirizo.

Icyo gihe akoresha imvugo zimeze nk’amarenga akavuga akanyoni cyangwa agatabi, agapipi n’ibindi mu gihe umaze kugira imyaka iri hejuru ya 11 akwiye kubwirwa amagambo yose yewe n’amazina y’igitsina ntacyo bitwaye.

Mu 2017, Umuryango Imbuto Foundation wasohoye agatabo kitwa “Tuganire mwana wanjye” karimo inyigisho zose zifasha umubyeyi kuba yaganiriza umwana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .