Abandi bantu batandatu basanganywe Coronavirus, barindwi barayikira

Yanditswe na Ishimwe Israel
Kuya 20 Gicurasi 2020 saa 07:55
Yasuwe :
0 0

Minisiteri y’Ubuzima yatangaje ko mu Rwanda habonetse abantu batandatu basanganywe Coronavirus mu bipimo 982 byafashwe uyu munsi mu gihe abagera kuri barindwi bakize.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye ku butaka bw’u Rwanda, hamaze kuboneka abantu 314 bayanduye mu bipimo 53 317.

Muri bo harimo abantu 216 basezerewe mu bitaro nyuma yo kuvurwa bagakira. Aba barimo barindwi bakize kuri uyu wa 20 Gicurasi 2020.

Ku wa Kabiri, hari hagaragaye abarwayi 11 bashya ndetse bose ni abashoferi b’amakamyo yambukiranya imipaka n’abo bakorana. Aba bakigera mu Rwanda bashyizwe mu kato ndetse ni naho bapimiwe.

  • Abanduye ni 314 (barimo batandatu bashya)
  • Abakize ni 216 (barimo barindwi bashya)
  • Abakirwaye ni 98
  • Nta muntu uritaba Imana
  • Ibipimo bimaze gufatwa ni 53 317 (birimo 982 bishya)

Kugeza ubu ibitaro byita ku barwayi ba Coronavirus bibarizwamo abantu 98, bari kwitabwaho ndetse bameze neza. Mu Rwanda nta murwayi uraremba cyangwa ngo ahitanwe na Coronavirus yibasiye Isi.

Ishami ry’Umuryango w’Abibumbye ryita ku Buzima (OMS) ryemeje ku wa 11 Werurwe 2020 ko Coronavirus ari icyorezo cyugarije Isi bitewe n’ubwiyongere bw’abayandura.

Kuva Coronavirus igaragaye bwa mbere mu Mujyi wa Wuhan mu Bushinwa, abantu 5 039 517 bamaze kuyandura, yahitanye 326 530 mu gihe 1 994 012 bayikize.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Abantu batandatu basanganywe Coronavirus mu Rwanda, umubare w'abamaze gukira wiyongereyeho barindwi uba 216

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .