00:00:00 IGIHE NETWORK KN KINYARWANDA EN ENGLISH FR FRANCAIS

Abarwariye Covid-19 mu ngo basabwe kuguma mu byumba byabo

Yanditswe na Akayezu Jean de Dieu
Kuya 20 Nyakanga 2021 saa 07:25
Yasuwe :
0 0

Minisiteri y’Ubuzima yagiriye inama abarwayi ba Covid-19 by’umwihariko abarwariye mu ngo zabo, kuguma iwabo mu ngo birinda kwegerana n’abo babana ariko bikaba akarusho bagumye mu byumba byabo.

Ni inama zatanzwe nyuma y’uko bitangajwe ko mu Rwanda hari Covid-19 yihinduranyije izwi ku izina rya ‘Delta’ aho yandura mu buryo bworoshye kandi igahitana abantu ku buryo budasanzwe.

Muri ibi bihe umubare w’abandura n’abahitanwa na Covid-19, ukomeje gutumbagira, hari benshi barwariye mu ngo zabo, bakaba bagirwa inama yo kwitwararika kugira ngo batanduza abo bari kumwe.

Minisiteri y’Ubuzima [Minisante] yavuze ku mu nama zigirwa abarwariye mu ngo zabo Covid-19, harimo “Kuguma mu rugo iwabo”.

Minisante kandi ivuga ko ari byiza ko “umurwayi wa Covid-19 uri mu rugo aguma mu cyumba cye ntasangire n’abo babana.”

Izindi nama harimo kwambara neza agapfukamunwa igihe cyose asohotse mu cyumba cye, kwirinda kwegerana n’abo mu rugo no gusangira ibikoresho nabo, gukaraba intoki buri gihe akoresheje amazi meza n’isabune cyangwa ‘Hand sanitizers’.

Minisante kandi isaba abarwariye Covid-19 mu ngo zabo kwipimisha nyuma y’iminsi 10 kugira ngo barebe uko bahagaze, ibi kandi ni nako bisabwa ababana na bo. Ku wakenera ubufasha ahamagara kuri 114.

Ibimenyetso bizakwereka ko ufite ‘Delta Variant’

Minisiteri y’Ubuzima igaragaza ko ufite iyi virusi yihinduranya ya Delta agaragaza ibimenyetso birimo gucibwamo cyangwa se diyare, kugira isesemi no kuruka, kubabara imikaya, kubabara cyane umutwe, gucika intege, ibicurane no kumagara mu muhogo.

Kuva Delta yatahurwa mu mpera za 2020, imaze kugera mu bihugu birenga 100 birimo n’u Rwanda.

Ubu habarwaga ko 99% by’abandura mu Bwongereza ari yo bafite; 51,7% by’abandura muri Leta Zunze Ubumwe za Amerika ni yo basanganwaga, mu Bufaransa abandura 50% ni yo bafite, naho mu Buhinde aho yahereye bivugwa ko 70% by’abanduye mu nkundura ya kabiri y’icyorezo ubwo cyahitanaga ibihumbi buri munsi mu ntangiriro za 2021 ari yo basanganywe.

Ni yo ihangayikishije kurusha izindi zose bitewe n’uko ikwirakwira bwangu ugereranyije na zo. Ubushakashatsi buheruka bwerekanye ko yandura kurusha iyo mu bwoko bwa Alpha ku gipimo cya 60%.

Abarwayi bayo baremba mu buryo bwihuse akenshi bakajyanwa mu bitaro, kandi yica vuba.

Ku bijyanye n’inkingo, ubushakashatsi bw’Abongereza bwerekanye ko uwahawe dose ebyiri za Pfizer nyuma y’ibyumweru bibiri aba afite ubwirinzi bwa 88% imbere ya Delta, mu gihe uwahawe AstraZeneca aba arinzwe 60%.

Ni mu gihe mu byumweru bitatu nyuma ya dose ya mbere ubwirinzi buba ari 33% kuri izo nkingo zombi imbere yayo.

Bigaragara ko ifite uburyo bwo kwihagararaho imbere yazo kuko Pfizer ubusanzwe uwayihaweho dose ebyiri aba afite ubwirinzi bwa 95%, mu gihe AstraZeneca yo buba ari 76%.

Icyakora hagaragazwa ko izo nkingo zigifite ububasha buri hejuru bwo kurwanya abarwarira kwa muganga kubera Delta, aho Pfizer ifite 96% naho AstraZeneca ikagira 92%.

Raporo yo ku wa 18 Nyakanga 2021 igaragaza ko mu Rwanda hamaze kuboneka abanduye Covid-19 bagera ku 57.322 barimo 2.773 babonetse mu masaha 24. Muri bo hakize 40.041, abagera kuri 649 imaze kubahitana, naho 16.632 barimo 72 barembye ni bo bakirwaye.

Abarwariye Covid-19 mu ngo basabwe kuguma mu byumba byabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .