Abashoferi 11 b’amakamyo basanganywe Coronavirus, abakize bageze kuri 209

Yanditswe na Ishimwe Israel
Kuya 19 Gicurasi 2020 saa 09:38
Yasuwe :
0 0

Minisiteri y’Ubuzima yatangaje ko abantu 11 basanganywe Coronavirus mu bipimo 1217 byafashwe uyu munsi mu gihe abagera kuri batandatu basezerewe mu bitaro.

Itangazo rya Minisante ryo ku mugoroba wo kuri uyu wa Kabiri, tariki ya 19 Gicurasi 2020, rigaragaza ko mu ‘bipimo 1217 byafashwe, habonetse abarwayi bashya 11, batandatu bakize mu gihe nta wari wapfa.’

Abarwayi bashya bagaragaye ni abashoferi b’amakamyo yambukiranya imipaka n’abo bakorana.

Kuva mu minsi ishize iki cyiciro cyatangiye kubonekamo abarwayi benshi ndetse byanatumye hakazwa ingamba zo gupima no kwita ku bakora mu bwikorezi bw’ibicuruzwa n’ibikoresho byambukiranya imipaka.

Kuva umurwayi wa mbere agaragayeho Coronavirus mu Rwanda ku wa 14 Werurwe 2020, abantu 308 bamaze kuyisanganwa mu bipimo 52 335 bimaze gufatwa, muri bo abagera kuri 209 basezerewe mu bitaro.

Kuri ubu ibitaro byita ku barwayi ba Coronavirus biri kubarizwamo abantu 99 bakiri kwitabwaho n’abaganga.

Kuri uyu wa Kabiri kandi Minisiteri y’Ubuzima yakiriye robots eshanu zahawe amazina ya Akazuba, Ikirezi, Mwiza, Ngabo n’Urumuri, zizakoreshwa by’umwihariko mu gupima umuriro no gukurikirana abarwaye Coronavirus no kubika amakuru yabo.

Ni uburyo bw’ikoranabuhanga bwiyongera ku bundi u Rwanda rurimo kwifashisha mu rwego rw’ubuvuzi, nko gukoresha indege nto za drones mu kugeza amaraso ahabwa indembe mu bitaro bitandukanye, kuzifashisha mu gutera imiti yica imibu itera malaria no gutanga amakuru ajyanye no kwirinda Coronavirus.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 956 725 bamaze kuyandura ku Isi yose, barimo 323 095 yahitanye na 1 941 288 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune cyangwa gukoresha alukoro yabugenewe, kwambara udupfukamunwa n’amazuru igihe cyose umuntu agiye aho ahurira n’abandi.

Abantu 11 basanganywe Coronavirus, abakize biyongeraho batandatu baba 209

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .