Batatu b’i Rwamagana bishwe na Coronavirus, 61 biganjemo abo muri gereza barayandura

Yanditswe na Ishimwe Israel
Kuya 15 Ugushyingo 2020 saa 10:34
Yasuwe :
0 0

Abantu batatu bo mu Karere ka Rwamagana bishwe na Coronavirus, bituma umubare w’abo imaze guhitana mu Rwanda uba 45, mu gihe abayanduye biyongereyeho 61 bakaba 5455.

Kuva umurwayi wa mbere wa COVID-19 iterwa n’agakoko ka Coronavirus agaragaye mu Rwanda ku wa 14 Werurwe 2020, ni ubwa mbere hatangajwe umubare munini w’abitabye Imana mu munsi umwe.

Itangazo rya Minisiteri y’Ubuzima ryo kuri uyu wa 15 Ugushyingo 2020 ryerekana ko abitabye Imana ari abagabo batatu bo muri Rwamagana bafite imyaka 36, 62 na 85.

Akarere ka Rwamagana kari mu twibasiwe cyane na Coronavirus bijyanye n’umubare w’abakarwariyemo yica kuko muri iki cyumweru gusa, abantu umunani yarabahitanye.

Minisante yatangaje ko kuri iki Cyumweru kandi habonetse abarwayi 61 basanganywe Coronavirus mu bipimo 1449 mu gihe uwakize ari umwe.

Abarwayi bashya barimo abakuwe muri Kigali:55 mu bapimwe muri Gereza ya Nyarugenge, Bugesera:4, Nyamagabe:1 na Rwamagana:1.

Muri iyi minsi hakomeje kuboneka ubwandu bushya mu mfungwa n’abagororwa bari muri gereza zitandukanye zirimo iya Nyarugenge iri mu Murenge wa Mageragere yari yagaragayemo abanduye 27 ku wa 11 Ugushyingo 2020 ndetse n’iya Muhanga yakuwemo abantu 36 ku wa 13 Ugushyingo, yongera kubonekamo 30 ku wa 14 Ugushyingo 2020.

Mu Rwanda hamaze gufatwa ibipimo bya Coronavirus 586 989, hasanzwemo abantu 5455 banduye. Muri bo 4995 basezerewe nyuma yo gupimwa bagasangwa nta bwandu bagifite mu gihe 415 bakiri kwitabwaho.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .