OMS yagaragaje ubusumbane bukabije muri gahunda yo gukwirakwiza inkingo za Covid-19

Yanditswe na Akayezu Jean de Dieu
Kuya 10 Mata 2021 saa 12:10
Yasuwe :
0 0

Ishami ry’Umuryango w’Abibumbye ryita ku Buzima (OMS), ryagaragaje ubusumbane bukabije mu gukwirakwiza inkingo za Coronavirus hagati y’ibihugu bikize n’abakene.

Kugeza ubu OMS itangaza ko nibura dose zisaga miliyoni 38 zimaze gutangwa mu bihugu birenga 100 binyuze muri gahunda ya Covax yo kugeza inkingo hirya no hino ku Isi by’umwihariko mu bihugu bikennye.

Ubuyobozi bw’uyu muryango butangaza ko intego bwihaye yo gukwirakwiza inkingo za Covid-19, muri buri gihugu cyo ku Isi itazagerwaho mu gihe ibihugu bikize bikomeje kwigwizaho inkingo.

Umuyobozi Mukuru wa OMS, Tedros Adhanom Ghebreyesus, yabwiye itangazamakuru kuri uyu wa Gatanu ko mu bihugu bikize, nibura umuntu umwe muri bane yabonye urukingo mu gihe mu bikennye ari umwe mu barenga 500.

Yagize ati “Haracyari ubusumbane bukabije mu gukwirakwiza inkingo ku isi. Ugereranyije, mu bihugu byinjiza amafaranga menshi, umuntu umwe kuri bane yabonye urukingo rwa Covid-19. Mu bihugu bikennye cyane ni umwe mu bantu 500.”

Binyuze muri gahunda ya Covax, OMS yihaye intego y’uko nibura abantu barenga miliyari ebyiri bo mu bihugu 190, bagomba kuba bahawe inkingo za Covid-19, mu gihe kitarenze umwaka. By’umwihariko, irashaka ko ibihugu 92 bikennye bizahabwa inkingo icya rimwe n’ibihugu bikize.

Ni mu gihe ariko binyuze muri iyi gahunda, byari byitezweho ko nibura dose miliyoni 100 zagombaga kuba zashyikirijwe ibihugu bikennye mu mpera za Werurwe, ariko kugeza ubu izimaze gutangwa ni miliyoni 38.

OMS yagaragaje ubusumbane muri gahunda yo gukwirakwiza inkingo za Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .