Abakora muri serivisi zo kuvura Ebola bagiye guhabwa urukingo rwayo ruri mu igeragezwa

Yanditswe na Emma-Marie Umurerwa
Kuya 4 Gashyantare 2019 saa 08:39
Yasuwe :
0 0

Minisiteri y’ubuzima mu Rwanda, itangaza ko abakora muri serivisi z’ubuvuzi babyifuza cyane cyane abakora mu bijyanye na Ebola, bagiye guhabwa urukingo rwayo ruri mu igeragezwa mu bihugu bitandukanye bya Afurika birimo na Repubulika Iharanira Demokarasi ya Congo.

Mu bihugu bimwe na bimwe byo muri Afurika y’Iburengerazuba ndetse no muri Repubulika Iharanira Demokarasi ya Congo, abaturage bamaze iminsi bahabwa urukingo rwa Ebola ruri mu igeragezwa.

Mu Kiganiro ‘Sobanukirwa’ cyanyuze kuri Televiziyo y’u Rwanda kuri iki cyumweru, Umunyamabanga wa Leta ushinzwe ubuzima bw’ibanze muri Minisiteri y’Ubuzima, Dr Ndimubanzi Patrick, yavuze ko uru rukingo ruzanahabwa abanyarwanda babyifuza.

Ati “Murabizi ko mu gihugu cy’abaturanyi cya Congo hari indwara ya Ebola, hari urukingo abantu bari gukoresha rwakoze no muri Afurika y’Iburengerazuba. Uru rukingo ntabwo ruremezwa burundu ruracyari mu igeragezwa, ariko ukuntu imibare ibigaragaza ni uko rurinda abantu kwandura ebola.”

Yarakomeje ati “Iyo urukingo rukiri mu igeragezwa gutyo turutera umuntu wabyemeye tumaze no kumusobanurira tumubwira icyo turuziho, ingaruka zagaragaye nicyo rushobora kumurinda. Niba abyemeye akarufata. Ibyongibyo tugiye gutangira kubyigisha hirya no hino […] twirinde ko icyorezo cya ebola cyagera mu gihugu n’urwo rukingo ababyifuza babe bashobora kuba baruhabwa.”

Abazahabwa uru rukingo ni abakora muri serivisi zituma bashobora guhura byoroshye n’umuntu urwaye ebola bityo akaba yabanduza, nk’abakora mu kigo cyagenewe kwita by’umwihariko ku bafashwe n’iyo ndwara.

Abajijwe niba hari inkingo zindi zijya zihabwa abanyarwanda ziri mu igeragezwa, Dr Ndimubanzi yavuze ko kugeza ubu inkingo zose zikoreshwa mu Rwanda by’umwihariko izihabwa abana, ari inkingo zemejwe n’Ishami ry’Umuryango w’Abibumbye ryita ku buzima n’ibigo mpuzamahanga byita ku buzima.

Ubushakashatsi ku mibereho y’Aturage “DHS” bwakozwe mu 2015, bwagaragaje ko abana 93% bavuka mu Rwanda bahabwa inkingo 12 zose, kuva umwana akivuka kugeza ku mwaka umwe n’igice.

Hari n’rukiko rwa kanseri ifata inkondo y’umura ruhabwa abana b’abakobwa bafite hagati y’imyaka 10 -12.

Umunyamabanga wa Leta ushinzwe ubuzima bw’ibanze muri Minisiteri y’Ubuzima, Dr Ndimubanzi Patrick, yavuze ko uru rukingo ruzanahabwa abanyarwanda babyifuza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza