Abasaga 200 bamaze kwandura virusi itaramenyekana mu Bushinwa

Yanditswe na IGIHE
Kuya 20 Mutarama 2020 saa 07:54
Yasuwe :
0 0

Amagana y’abaturage akomeje kwandura virusi itaramenyekana mu bice bitandukanye by’u Bushinwa, aho byavuye mu Mujyi wa Wuhan bikaba byakwirakwiye mu yindi mijyi minini.

Ubu imibare ihari iravuga ko abantu basaga 200 aribo bamaze kwandura abenshi bakaba batuye mu Mujyi wa Wuhan, gusa hamaze kugaragara abandi bantu bafite ibimenyetso nk’iby’abanduye iyo virusi mu yindi Mijyi nka Beijing, Shanghai na Shenzhen.

Abantu batatu ni bo bimaze gutangazwa ko bapfuye bazize iyo virusi ifite ibimenyetso nk’iby’umusonga.

Iyi ndwara bikekwa ko iri kwandura, itangiye gukwirakwira mu gihe habura iminsi mike Abashinwa bakajya mu birori by’umwaka wabo mushya.

Abashinzwe ubuzima bavumbuye bwa mbere iyo virusi mu gace ka Wuhan mu Ukuboza umwaka ushize. Ni virusi igaragaramo uruhurirane rw’udukoko dushobora kwanduza abantu n’inyamaswa. Bavuga ko iyo virusi yateje icyorezo cy’umusonga ariko nta byinshi biramenyekana kuri yo.

Iyi virusi yabaye yiswe 2019-nCoV, igizwe n’uruhurirane rwa virusi zibasira imyanya y’ubuhumekero ya muntu ariko inzobere zivuga ko ari ubwa mbere babonye ubwo bwoko bw’iyo virusi.

Hari hasanzwe ubwoko butandatu bw’izo virusi buzwi, ubwo bwaje buramutse bwemejwe bwaba bubaye ubwa karindwi.

Abashakashatsi bavuga ko ubusanzwe iyo virusi yakwirakwizwaga ahanini n’inyamaswa ziyanduza abantu, icyakora ngo bijya bibaho ko n’abantu bayanduzanya.

Ibimenyetso byayo harimo umuriro, kugira ibibazo umuntu ahumeka, gukorora, guhumeka gahoro n’ibindi.

Abaturage bagiriwe inama yo kwirinda gukora ku nyamaswa batikingiye haba mu guteka inyama, amagi no kwirinda guhura n’abafite ibimenyetso by’ibicurane.

Abayobozi bo mu Mujyi wa Wuhan uri rwagati mu Bushinwa, ukaba utuwe n’abagera kuri miliyoni 11, kuri uyu wa Mbere bavuze ko abantu 136 aribo bagaragaweho iyo virusi mu mpera z’icyumweru gishize gusa.

Kuri iki Cyumweru, abayobozi bavuze ko hari abantu 170 bari mu bitaro byo muri Wuhan bavurwa iyo virusi harimo icyenda barembye.

Hari abandi bantu bane bagaragaweho ibimenyetso by’iyo virusi hanze y’u Bushinwa barimo babiri muri Thailand, umwe mu Buyapani n’umwe muri Koreya y’Epfo.

Umuryango Mpuzamahanga wita ku Buzima (OMS) wavuze ko utaratanga amabwiriza ku ngendo cyangwa ibikorwa by’ubucuruzi, icyakora ngo uri gutanga inama ku bihugu ku buryo bwo guhangana n’iyo virusi.

Abasaga 200 bamaze kwandura virusi itaramenyekana mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza