Igituntu ku isonga mu ndwara zandura zihitana benshi ku Isi

Yanditswe na IGIHE
Kuya 24 Werurwe 2020 saa 02:19
Yasuwe :
0 0

Ishami ry’Umuryango w’Abibumbye ryita ku buzima (OMS), ryatangaje ko igituntu ari yo ndwara yica cyane ku Isi mu zandura, aho abarenga miliyoni imwe bapfa ku mwaka.

Kuri uyu wa Kabiri tariki 24 Werurwe 2020, ubwo hizihizwa umunsi mpuzamahanga wahariwe kurwanya igituntu, OMS, yatangaje ko ababarirwa muri miliyoni 1.5 bishwe n’indwara ziterwa n’udukoko twa bacteries mu 2018.

Nibura abagera kuri miliyoni 10 bandura igituntu buri mwaka, gusa bake nibo bagira amahirwe yo kwitabwaho bakabona ubuvuzi bukwiye. Buri munsi abarenga 4000 bicwa n’igituntu.

Umuyobozi wa OMS, Tedros Adhanom Ghebreyesus, yavuze ko icyorezo cya Coronavirus, cyerekana uburyo abafite ibihaha bitameze neza cyangwa abadafite ubudahangarwa bw’umubiri bukomeye ari bo barimo kuzahazwa n’iki cyorezo.

Tedros Adhanom Ghebreyesus avuga ko igituntu ari indwara yangiza cyane ibihaha.

Umuyobozi w’Urwego rurwanya igituntu mu Budage, Burkard Kömm, yagize ati “Kuri miliyoni z’abarwaye igituntu, Coronavirus ibatera ibibazo bikomeye kuko ibihaha byabo biba byaramaze gucibwa intege n’igituntu, ubuzima bwabo muri rusange buba bufite imbaraga nke kubera ubukene ndetse ntibafite n’uko bagerwaho na serivisi z’ubuzima zikwiye”.

Muri Aziya na Afurika niho hari abarwayi benshi b’igituntu bashobora kwicwa cyane na Coronavirus.

Igituntu ni indwara ishobora kuvurwa igakira. Umuntu umwe ufata imiti y’igituntu gisanzwe, ayifata mu gihe cy’amezi atandatu.

Igituntu ni indwara yangiza cyane ibihaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza