Niyigena wo muri Baho International Hospital yasobanuye byinshi ku ndwara y’ibikanu

Yanditswe na Uwiduhaye Theos
Kuya 23 Nzeri 2020 saa 07:55
Yasuwe :
0 0

Ntabwo benshi bakunze kuyifata nk’indwara ikomeye kuko baba bumva ko iyo umuntu abababaye ibikanu, ari ibintu bisanzwe ndetse byikiza nta yandi mananiza.

Abazi iby’imiti ya Kinyarwanda iyo byanze kwikiza niyo bitabaza, naho abasirimu bo bakirukira muri pharmacie batazi neza uburwayi bw’ukuri bafite mu bikanu byabo ndetse n’icyabiteye.

Gusa ibi byose si byiza ku buzima bw’ibikanu by’umuntu kuko bishobora kubigiraho ingaruka zitari nziza, zatuma nyirabyo amarana igihe ubu burwayi bushobora no kugera aho bugakaza umurego.

Mu kiganiro IGIHE yagiranye n’inzobere mu bugororangingo muri Baho International Hospital [BIH], Niyigena Marie Solange, yavuze ko iyi ndwara ifata abantu bose ariko cyane ikibasira abageze mu za bukuru kubera ko ingingo zabo ziba zitangiye gusaza.

Ati “Indwara y’ibikanu akenshi igaragara ku bantu bari ku myaka 40 kuzamuka ariko bitabujije ko n’abantu bari munsi yayo bashobora kuyigira bitewe n’impamvu runaka. Abantu bakuze bakunze kwibasirwa kuko iyo umuntu agenda akura ingingo ze zigenda zisaza, uko zisaza hari ibigabanuka mu mubiri.”

Avuga ko indwara y’ibikanu ishobora guterwa n’impanuka cyane ko ijosi riba rifashe ibiro byose by’umuntu by’umutwe ndetse kandi no gusaza kw’ingingo z’ijosi biri mu bishobora gutera iyi ndwara.

Bimwe mu bimenyetso by’iyi ndwara avuga ko harimo gutumbira ahantu hamwe mu gihe uri gukoresha mudasobwa cyangwa telefoni, kumva ubabara mu gice cy’inyuma ku ijosi no mu ntugu, kumva ibitugu biremerewe ndetse hari n’igihe umuntu yumva ibinya bimanuka mu maboko rimwe na rimwe akaribwa n’umutwe.

Niyigena avuga ko uru rugingo ari ngombwa kurubungabunga kuko ari rumwe mu zifitiye akamaro umubiri w’umuntu.

Ati “Igikanu gifatanye n’ingingo zifite aho zihuriye n’ubwonko, rero ni ngombwa kubungabunga ubuzima bw’igikanu kuko bishobora kugutera ibibazo birimo kuba warara udasinziriye kubera ububabare.”

Inama umuntu ashobora gukurikiza mu kubungabunga ubuzima bw’igikanu, harimo kwirinda kumara amasaha menshi imbere ya mudasobwa, aha umuntu asabwa kuruhuka buri gihe nyuma y’isaha nibura nk’iminota itanu ndetse abantu basabwa kutavugira kuri telefoni bayishyize hagati y’umutwe n’igikanu.

Mu gihe umuntu arwaye igikanu asabwa kwikorera ubutabazi bw’ibanze akoresheje barafu ariko byakomeza gukomera akaba yagana abaganga bamwegereye.

Iyi nzobere ivuga ko umuntu ashobora gufata icyemezo cyo kujya kwa muganga mu gihe Ibintu byose yabigerageje ariko bikanga.

Iti “Ufata icyemezo cyo kujya kwa muganga mu gihe ufite ibimenyetso bimaze iminsi hagati y’itatu n’irindwi. Umuntu akenera kujya kwa muganga mu gihe yakoresheje uburyo bwo gushyiraho ibishyushye n’ibikonje ntibigire icyo bitanga. Uko utinda kujya kwivuza n’uburwayi butinda gukira.”

Agira inama abantu yo kwirinda kunaniza ibikanu ndetse no gukora imyitozo itandukanye yatuma ibikanu by’umuntu bigira ubuzima buzira umuze.

Yavuze ko yigeze kwakira umurwayi wari umaze umwaka yumva abababara, ndetse kwivuza biza gutimda kuko yamaze amezi abiri.

Ushaka kumenya byinshi kuri iyi ndwara cyangwa ushaka izindi serivisi muri Baho Internatonal Hospital wahamagara kuri +250 788 125 035 cyangwa +250 788 125 036.

Niyigena Marie Solange wo muri Baho International Hospital yagiriye inama abantu yo kudakerensa uburwayi bw'ibikanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .