U Rwanda rurateganya gutanga urukingo rwa Ebola

Yanditswe na IGIHE
Kuya 13 Ukwakira 2019 saa 11:25
Yasuwe :
0 0

U Rwanda rurateganya igikorwa cyo gukingira abakuze, urubyiruko n’abana b’imyaka ibiri bo mu bice byegereye ahavugwa icyorezo cya Ebola mu rwego rwo guhangana nacyo.

Mu nama y’Abaminisitiri yo ku wa 10 Ukwakira, Minisitiri w’Ubuzima yamenyesheje ko u Rwanda ruteganya “gutangiza ubukangurambaga bugamije gukingira icyorezo giterwa na Virusi ya Ebola (EBV). Hazakingirwa abantu bakuru, ingimbi n’abangavu ndetse n’abana bafite imyaka ibiri batuye hafi y’aho icyo cyorezo cyagaragaye.”

Kugeza ubu, ntiharatangazwa umubare w’abazahabwa urukingo cyangwa ibice bizatangirirwaho n’igihe ibi bikorwa bizabera.

Muri Mata, Minisiteri y’Ubuzima yakoze igikorwa cyo gutanga urukingo rwa Ebola rwitwa “rVSV-ZEBOV” ku bajyanama b’ubuzima n’abandi bakozi bakira abarwayi mu duce twegereye imipaka ya Repubulika Iharanira Demokarasi ya Congo (RDC) dushobora gukwirakwiramo icyorezo cya Ebola kurusha utundi.

Urukingo rwa Ebola nta bibazo ruteza ku mubiri w’uwaruhawe usibye gucika intege no kugira umuriro uringaniye kimwe n’inkingo z’iseru n’izindi.

Inkingo 3000 nizo byari biteganyijwe ko zitangwa mu turere 15 turimo utwo mu Burengerazuba, Amajyaruguru, Iburasirazuba n’Umujyi wa Kigali, tugeramo abava muri RDC berekeza mu nkambi n’ahandi. Utu turere ni Nyarugenge, Gasabo, Kicukiro, Rubavu, Rutsiro, Nyamasheke, Musanze, Nyabihu, Burera, Gicumbi, Nyagatare, Karongi, Bugesera, Nyanza na Rusizi.

Inkingo za rVSV-ZEBOV ni inkunga y’Ikigo cy’Abanyamerika gikora imiti cya Merck & Co. ari na cyo cyahaye u Rwanda iza kanseri y’inkondo y’umura ihabwa abangavu b’imyaka 12.

Ikigo gikora inkingo cyemererwa gukora mu gihe gifite ingengo y’imari ya miliyari 1 y’amadolari.

Izi nkingo ntiziremezwa burundu ngo zitangire gucuruzwa ariko zagaragaje ubwirinzi kuri Ebola aho zakoreshejwe mu Ntara ya Equateur muri RDC hagati ya Gicurasi na Nyakanga 2018. Abagera ku bihumbi 100 bamaze gukingirwa Ebola muri RDC n’ibihugu biyikikije.

Urwaye Ebola agira umuriro, ababara umutwe, aribwa mu ngingo, mu muhogo, agacika intege, agahitwa, akaruka cyane kandi kenshi. Mu bindi bimenyetso agaragaza harimo kuribwa mu nda no kuva amaraso ahantu hose hari umwenge ku mubiri. Yandura ku muntu ukoze ku murwayi wayo adafite ubwirinzi.

Ebola yibasiye cyane Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza