Byinshi kuri Ruzagayura, inzara yashegeshe u Rwanda igahitana abasaga ibihumbi 300

Yanditswe na Nsanzabera Jean de Dieu
Kuya 1 Mata 2020 saa 02:23
Yasuwe :
0 0

Ruzagayura ni inzara yanditse amateka mu Rwanda, iba ikimenyabose ku buryo hari n’ibibondo biyimenya bitarajya mu ishuri. Ni inzara yamaze imyaka ibiri mu Rwanda, ariko yangiza ibitagira ingano.

Iyo inzara yatangiye ahagana mu Ukwakira 1942, itewe n’amapfa yamaze imyaka ibiri. Ayo mapfa yatangiye muri Nzeri 1941, yongera kubaho nyuma gato y’itumba ryo mu 1942.

Igitabo “Imizi y’u Rwanda” cy’Umusizi Nsanzabera Jean de Dieu, kigaragaza ko iyo nzara yenyegejwe yatewe n’igabanyuka ry’ibiribwa ryaturutse ku ndwara y’ibirayi bita “mildiou/mildew”, ndetse no ku ndwara y’ibishyimbo bita “chortophila”. N’ibijumba muri ibyo bihe byari byibasiwe n’indwara bita “rhizoctonia/rhizoctonie”.

Inzara ya Ruzagayura yongerewe ubukana kandi n’intambara ya kabiri y’isi yose, ndetse n’uko icyo gihe Abanyarwanda bagombaga guha umusanzu abakoroni b’Ababiligi bari bahanganye n’ingabo za Adolf Hitler mu ntambara ya kabiri y’isi yose . Uwo musanzu wari ugizwe n’ibiribwa n’amatungo.

Icyo gihe imbuto gakondo z’Abanyarwanda, ari nazo zari zishoboye guhangana n’ibihe n’uburwayi bw’ibihingwa, zari zimaze gucika, bazisimbuje ibirayi, imyumbati, soya n’ibindi.

Abanyarwanda batangaga inka, ibishyimbo, amasaka, amashaza byo kugaburira abasirikare b’abanyekongo ndetse n’abakozi bo mu birombe byo muri Congo. Usibye ibiribwa n’amatungo, umusanzu w’Abanyarwanda muri iyo ntambara wari ugizwe n’imirimo y’agahato irimo guharura imihanda, kubumba amatafari, gutwara imizigo y’abakoloni, gukora mu birombe bya zahabu, Gasegereti na Wolufuramu, guhinga ibireti byakoreshwaga mu gutunganya umuti wica udukoko .

Inzara ya Ruzagayura yiswe amazina menshi bitewe n’ubukana yagiye igaragaza mu turere dutandukanye tw’u Rwanda. Mu majyepfo yiswe “Ruzagayura”. Mu duce dutandukanye tw’Iburasirazuba yiswe Rujukundi, Rwanyirarushenyi, Rwakinyebuye cyangwa se Rwakabetezi.

Mu Majyaruguru mu bice bya za Rubavu, Nyabihu , Burera na Musanze yiswe amazina nka Rudakangwimishanana, Rugaragazabadakekwa na Nyirahuku. Hagati mu gihugu ndetse n’Amajyaruguru y’Iburasirazuba yari izwi nka Matemane naho mu Burengerazuba yitwa Gahoro.

Iyo nzara yagize ubukana bwinshi mu Majyaruguru, mu Burasirazuba no mu Majyepfo y’igihugu. Mu bice bya Rusizi na Nyamasheke, niho honyine hatigeze hahura n’iyo nzara ku mpamvu z’ikirere cyaho. Ikindi, iyo ntara yari yegeranye na Congo Mbiligi ku buryo itari kugira ikibazo cyo kubura ibiribwa. Ahubwo yakiraga abantu bavuye mu zindi ntara nka Astrida (Butare) na Gisenyi.

Mu gihe cya Ruzagayura, uduce tw’imisozi ihanamye, uduce tw’ubutaka busharira, uduce turangwamo isuri nitwo twababaye cyane kurusha utundi. Muri utwo duce kimwe n’ahandi, abaturage barazahaye ku buryo benshi bamaraga iminsi ibir cyangwa se itatu badakoze ku munwa. Benshi inzara yarabicaga. Abaryaga, wasangaga barya inguri (imizi y’insina), imizi y’ibiti, amareberebe, umutsima uvuye mu ifu ya barakatsi (acacia) cyangwa se y’intembe y’insina. Iyo ndyo idasanzwe nta gushidikanya ko nayo yishe abantu benshi muri ibyo bihe.

Abafite agatege barasuhukaga bakajya gushaka aho bakura ibiribwa cyangwa se aho bagurana ibikoresho byabo n’ibiribwa. Benshi wasangaga barananutse nk’uko bigaragara ku mafoto y’icyo gihe. Babitaga ingarisi kubera uko babaga barashizemo. Ni nako bitaga imirambo y’abo yahitanye. Iyo mirambo yasangwaga hafi y’imihanda, mu mirima, mu mashyamba, ku nkengero z’inzuzi n’ahandi henshi.

Nyuma y’uko hafashwe ingamba zinyuranye zo kurwanya inzara ya Ruzagayura, abaturage babishishikarijwemo n’abategetsi b’abakoloni ndetse n’abatware bahinganye ubwira.

Guhera mu ntangiriro zo mu wa 1944, Abanyarwanda bahinze ibishyimbo, amashaza, ibirayi, imyumbati n’ibijumba. Kubera uburumbuke bw’imvura yaguye mu buryo buhagije, umusaruro wariyongereye, ibigega byongera guhunikwamo, abari barasuhutse bagaruka mu ngo zabo. Ubwo abamisiyoneri bahagaritse gutanga amafunguro. Inkambi z’ingarisi zirafungwa.

Ahagana muri Nyakanga 1944, abategetsi b’abakoloni bahagaritse kohereza amakamyo y’ibiribwa mu Rwanda yavaga muri Kongo. Mu mpera z’umwaka wa 1944, aba aribwo hatangazwa ko inzara yarangiye mu gihugu.

Nubwo inzara ya Ruzagayura yamaze igihe gito, yahitanye abantu benshi cyane. Abamisiyoneri b’abagatolika batangaje muri raporo ngarumwaka yo hagati yo mu wa 1939-1945, ko u Rwanda rwatakaje abantu bagera ku 300. 000, harimo n’abasuhukiye mu bindi bihugu nka Tanganyika, Uganda na Congo Mbiligi. Muri iyo raporo bavugaga ko abasuhutse bageraga ku 75, 000.

Ababaruraga hari ubwo bibagirwaga rimwe na rimwe kubara abana, abagore, abarwayi n’abasheshe akanguhe bapfuye cyangwa se bahunze iyo nzara ku buryo abo yahitanye bashobora kurenga.

Inzara ya Ruzagayura yangije kandi byinshi, itera n’ubujura bukabije mu gihugu. Ubwo bujura bwakwiye mu turere twose tw’u Rwanda, cyane cyane utwari twarayogojwe n’inzara. Bwakorwaga n’ingeri zose z’Abanyarwanda.

Mu turere tumwe na tumwe tw’u Rwanda, nko muri teritwari ya Gisenyi, ubwo bujura bwafashe indi ntera kugera aho abaturage batatinyaga gutega ku nzira bagenzi babo bavuye kuri za misiyoni bakabagusha mu gico cyabo ,maze bakabambura ibiribwa bahawe.

Izo ngaruka za Ruzagayura, zateje umutekano muke mu gihugu, bizana urwikekwe n’umujinya mwinshi mu Banyarwanda. Ahanini, uwo mujinya waturukaga ku bukarihe bw’inzara no ku buremere bw’umusanzu watangwaga n’Abanyarwanda.

Abaturage bagiye bagobokwa n'imfashanyo z'ibiribwa mu gihe cya Ruzagayura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .