00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye ku Munyafurika wavumbuye Amerika mbere ya Christophe Colomb

Yanditswe na Zigiranyirazo Bajecteur
Kuya 19 May 2022 saa 09:33
Yasuwe :

Hashize imyaka irenga 500 bivugwa ko Umutaliyani, Christophe Colomb ari we wavumbuye Amerika. Kuva icyo gihe ayo makuru yazanywe n’Abanyaburayi ni yo yigishwa hirya no hino mu mashuri, icyakora kuri ubu hari andi makuru ku muntu nyakuri waba waravumbuye uyu mugabane aho havugwa umwami Mansa Abubakari II mu 1312.

Ibn Fadi Al-Umari, ni Umunya-Misiri wanditse igitabo mu 1342 maze agaragaza ko mbere y’urugendo rwambuka inyanja ya Atlantique rwakozwe na Christophe Colomb ajya muri Amerika, hari harabayeho izindi ngendo ebyiri kandi zombi zikaba zarakozwe ku bwa Mansa Abubakari II wabaye Umwami wa Mali hagati yo mu 1300 no mu 1312.

Urubuga rukunda kugaruka cyane ku mateka ya Afurika, The African History rwerekana ko mu myaka ya kera, abaturage bo mu Bwami bwa Mali, bizeraga ko impera y’Isi ari inkombe y’Inyanja ya Atlantique ariko ibi uwari Umwami wabo, Mansa Abubakari II akaba atarajyaga yemeranwa nabyo na gato.

Ku bw’ububasha yari afite, yashatse kwimara amatsiko maze yohereza ubwato buto bugera kuri 200, asaba abasare kugashya bakambukiranya Inyanja ya Atlantique bakamumenyera ikiri hakurya yayo. Uru rugendo ntirworoshye na gato kuko muri ubwo bwato bwose bwoherejwe amakuru avuga ko bumwe bwonyine ari bwo bwabashije kugaruka.

Umuyobozi w’ubwo bwato bumwe bwabashije kugaruka kubara inkuru, yavuze ko yabonye andi mato arimo kwangirikira mu nyanja umusubizo agahita afata icyemezo cyo gukata akagaruka atabashije guheza inyanja.

Umwami yateze amatwi yumva ubuhamya ahawe n’umuyobozi w’ubwo bwato, ntiyashirwa ku buryo ahubwo byarushijeho kumuzamurira inyota yo gushaka kumenya by’ukuri ikiri inyuma y’inyanja.

Mu gihe cy’Ingoma ya Abubakari II mu kinyejana cya 13, Mali ni yo yari ifite kaminuza ya kabiri (Timbuktu) imaze igihe kinini kurusha izindi ku Isi ndetse yari inafite abanyeshuri benshi kurusha Kaminuza ya New York.

Kaminuza ya Timbuktu yari ifite amashami atandukanye yaba ay’amasomo nk’imibare, ubumenyi bw’Isi, amateka, iby’ubumenyi bw’ikirere n’isanzure, ubutabire ndetse n’amasomo arebana n’idini ya Islam. Uretse ibyo kandi muri icyo gihe Mali yafatwaga nk’igicumbi cy’ubucuruzi gihuza abavuye mu mihanda itandukanye y’Isi.

Umwami Abubakar yakoranyije abubatsi b’ubwato bo muri Mali n’abo mu Misiri, abahuriza mu gace kitwa Senegambia kari mu Burengerazuba bwa Mali ahubakiwe ubwato bugera mu bihumbi bibiri ku bwo kutava ku izima kwe, intego ye kwari ukugera ku iherezo ry’inyanja ya Atlantique.

Mu 1311, Abubakar yatangaje Mansa Musa nk’uzamukorera mu ngata ku ngoma, maze muri bwa bwato bwubatswe afatamo ubugera ku 1000 anateganya ko buri bwato buzaba buziritseho ubundi buzifashishwa igihe ubundi bugize ikibazo.

Yahamagaje kandi abapfumu, abaganga, abasare n’abandi yabonagamo ubushobozi bwo kumuherekeza mu rugendo rumuganisha ku kwesa umuhigo we.

Kuko yateganyaga ko urugendo rushobora kuzamara imyaka ibiri, bwa bwato bundi 1000, babupakiyemo ibyo kurya, imiti, imbuto n’ibinyobwa maze Abubakar abasha kugera ku nkombe y’inyanja mu mwaka wakurikiyeho wa 1312.

Bimwe mu bifatwa nk’ibimenyetso simusiga byerekana ko uyu mwami yageze ku nkombe y’Inyanja ya Atlantique, ni amazina y’uduce twaho, afite aho ahuriye na Mali, nk’Icyambu cya Mandinga (Mandinga Port) , Ikibaya cya Mandinga (Mandinga Bay) ndetse n’aho basize bise Sierre de Mali, udu duce twose tukaba duherereye mu gihugu cya Haiti.

Kuba Mansa Abubakari II, yarabashije kugera ku Mugabane wa Amerika mu 1312 hanyuma Christophe Colomb akahagera mu 1492 bigaragaza ko hari ikinyuranyo kigera ku myaka 180 ndetse binavugwa ko kugira ngo uyu Mutaliyani abashe kwambuka inyanja, byamusabye kwiyambaza Umunyafurika witwa Pedro Alonso Nino wari usanzwe umenyereye ingendo zo mu mazi.

Colomb yavuze ko aho yahingukiye yahasanze Abirabura anahabona inyubako zimeze nk’imisigiti ku buryo bivugwa ko ari izubatswe n’Abanya-Mali bari barahageze mbere ye.

The African History, ivuga ko gutangaza ibi bitagamije gutesha agaciro Christophe Colomb, icyakora nubwo yubaha ibyo uyu Mutaliyani yagezeho byose n’izina riremereye mu mateka y’abavumbuzi, iki kinyamakuru cyemeza ko ibyo kuvumbura Amerika byagezweho bwa mbere n’Umwami wa Mali, Mansa Abubakari II.

Christophe Colomb hari amakuru avuga ko atari we wavumbuye Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .