Imyaka 20 irashize Paul Kagame atorewe kuyobora u Rwanda

Yanditswe na Ferdinand Maniraguha
Kuya 17 Mata 2020 saa 04:34
Yasuwe :
0 0

Imyaka 20 irashize Perezida Paul Kagame atorewe kuba Perezida w’u Rwanda. Ni imyaka yaranzwe n’iterambere rigaragara haba mu mibereho myiza y’abaturage, umutekano, ibikorwa remezo n’ibindi.

Tariki 17 Mata 2000 nibwo Perezida Kagame yatowe n’Inteko Ishinga Amategeko ndetse n’abagize Guverinoma ngo asimbure Pasteur Bizimungu wari umaze ibyumweru bibiri yeguye.

Umuryango FPR Inkotanyi niwo wari ufite inshingano zo gushaka Perezida usimbura uwari umaze kwegura, ryitoyemo abakandida babiri bagombaga gushyikirizwa Inteko Ishinga Amategeko y’inzibacyuho kugira ngo itoremo uba Perezida.

Mu bakandida batanzwe hari harimo General Major Paul Kagame wari Visi Perezida na Charles Muligande wari Umunyamabanga Mukuru wa FPR Inkotanyi.

Mu badepite n’abagize Guverinoma 86 batoye, Gen Maj Paul Kagame yagize amajwi 81, naho Charles Muligande agira amajwi atanu.

Inteko Ishinga Amategeko yari igizwe n’abadepite 70 naho Guverinoma igizwe n’abaminisitiri 18.

Tito Rutaremara, Umuyobozi Mukuru w’Urwego rw’Igihugu Ngishwanama rw’Inararibonye yabwiye IGIHE ko nta mpungenge bari bafite niba Gen Maj Kagame aremera kuba Perezida, kuko bari bamaze kubimusaba yabyemeye.

Ati “Byari byaganiriwe mu nama ya FPR twabimusabye yabyemeye ariko bigomba kunyura mu Nteko kuko na Perezida wundi Inteko niyo yari yamukuyeho.”

Perezida Kagame yatorewe kuyobora u Rwanda ari umwuka utari mwiza muri politiki kuko mu mezi atatu yari ashize, uwari Perezida na Minisitiri w’intebe bari bamaze kwegura bashinjwa imikorere mibi.

Kuwa 22 Mata 2000 nibwo Perezida Paul Kagame yarahiriye kuba Perezida nyuma yo kwemezwa n’urukiko rw’ikirenga. Yongeye gutorerwa kuba Perezida mu matora rusange yo kuwa 25 Kanama 2003, aho yatsinze ku majwi 95 %.

U Rwanda rwari rutegereje kuguma hasi cyangwa kubyuka

Perezida Paul Kagame yatowe hashize iminsi mike hasojwe inama ziswe izo mu ‘Rugwiro’, zahuje abanyarwanda b’ingeri zose hakaganirirwamo ahazaza h’igihugu. Ibyavuyemo nibyo byaje kugenderwaho mu cyerecyezo cyiswe ‘2020’.

Ibyari bikubiye muri icyo cyerecyezo byasaga n’inzozi ukurikije aho igihugu cyari kiri nyuma y’imyaka itandatu kivuye muri Jenoside yakorewe Abatutsi. Ni igihugu cyifuzaga kumvisha amahanga kurekera aho kukirebera mu ndorerwamo ya Jenoside, ahubwo kigafatwa nk’igihugu cyiteje imbere nk’ibindi bihugu bya Afurika.

Tito Rutaremara avuga ko hari hakenewe umuyobozi ufata ibyo byifuzo byose akabihindura ingiro.

Ati “Ibyo bitekerezo byashakaga umuntu ubishoboye wabishyira ku murongo. Abo mu Rugwiro baravugaga bati rwose nyuma y’imyaka 20 dukwiriye kuba twarahindutse turi nk’ibindi bihugu byo muri Afurika. Bakavuga bati hazajyeho Leta igendera ku mategeko, abaturage bazegerezwe ubuyobozi, tuzandike amateka y’igihugu cyacu uko akwiriye kumera n’ibindi”.

Mu by’ingenzi u Rwanda rwari rukeneye cyane, hari hariho gushyiraho Itegeko Nshinga, kubaka inzego z’ubuyobozi, guteza imbere ubukungu, uburezi, imibereho myiza y’abaturage, ubuzima n’ibindi.

Rutaremara avuga ko iyo hataba umuyobozi ushoboye, byari kuguma mu bitekerezo gusa. Ati “Twari tuvuye mu nzibacyuho, tugira Imana tubona umuyobozi mwiza ufite icyerecyezo. Burya biba byiza iyo uvuye mu nzibacyuho ugatangira kubaka neza, ukagira umuyobozi mwiza ubishoboye.”

Yakomeje avuga ko mu gutora Perezida Kagame nta mpungenge nyinshi bari bafite, kubera ko bari bamwizeye kandi bakabona nta handi habi u Rwanda rushobora kugera harenze Jenoside yabaye.

Ati “Twari twaravuye ahabi nta handi twashoboraga kujya handi. U Rwanda rwageze habi cyane icyari gisigaye ni ukubyuka. Iyo uri hasi nta handi wajya, wenda waguma aho, icyari gisigaye rero ni ukugumayo cyangwa kubyuka. Kubyuka rero kandi bikihuta twagize Imana tubona umuyobozi ubishoboye.”

Kubaka u Rwanda nyuma y’umwaka wa 2000 byakozwe mu byiciro. Icyiciro cya mbere cyari kuva mu 2000 kugeza mu 2010 cyarimo gushyiraho amategeko, no kubaka inzego z’ubuyobozi. Ikindi cyari icya 2010 kugeza 2020 cyo kubaka inzego z’ubukungu bw’igihugu no guteza imbere imibereho myiza y’abaturage ku buryo bugaragara.

Kugeza ubu u Rwanda rufatwa nka kimwe mu bihugu bike bya Afurika bifite ubukungu buzamuka ku gipimo cyo hejuru, aho kiri ku mpuzandengo ya 7 % buri mwaka uhereye mu 2000.

Mu 1990 umusaruro ku muturage ku mwaka wari amadolari 374, mu 1994 yari amadolari 146 mu 2000 yari 225 $. Mu 2010 yari 579 $, mu 2015 yari 728 $, mu 2017 yari 774 $ naho mu 2018 yari 788$ ku mwaka

Ingengo y’imari y’igihugu yikubye inshuro 14, mu gihe ingengo y’imari ituruka imbere mu gihugu yo yazamutse inshuro 20 mu myaka 20 ishize.

Perezida Paul Kagame ubwo yasohokaga mu ngoro y'Inteko Ishinga Amategeko kuwa 17 Mata 2000 amaze gutorwa n'Inteko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .