Uko Kofi Annan yasuye u Rwanda mu 1998, abayobozi bakuru bose bakanga kumwakira

Yanditswe na Ferdinand Maniraguha
Kuya 10 Mata 2020 saa 11:07
Yasuwe :
0 0

Inyamaswa idakenga yishwe n’umututizi! Ubwo yari akiri Umunyamabanga Mukuru wa Loni, Kofi Annan, yaje mu Rwanda yabanje kuburirwa ko akwiriye kwitwararika no kwibombarika cyane imbere y’Abanyarwanda bari bamaze imyaka itatu gusa bavuye mu bihe bibi bya Jenoside yakorewe Abatutsi.

Uruzinduko rw’iminsi itatu yagiriye mu Rwanda rwamubereye agahomamunwa, atahana ipfunwe.

Ibikomere byari bikivirirana haba mu mutima no ku mibiri. Icyo gihe kuri lisiti y’abantu Abanyarwanda batari bishimiye, Kofi Annan yari mu ba mbere. Impamvu ni uko ubwo Abatutsi bicwaga hakabura gitabara Annan ari we wari ukuriye ibikorwa byo kugarura amahoro ku Isi muri Loni.

Ingabo za MINUAR ubwo zahambiraga utwazo zigasiga Abatutsi ku Kicukiro mu maboko y’Interahamwe, Annan ni umwe mu bafashe icyemezo bashize amanga cyo kugenda kwazo, abo zatereranye basigara bicwa uruhondogo.

Kofi Annan yari umugabo ucisha make, wiyoroshya cyane mu mvugo ndetse wari wubashywe ku rwego mpuzamahanga biri no mu byamuhesheje kuyobora Loni. Umurage we wononwe n’icyasha yiteye kubera kutagira icyo akora ngo ahagarike Jenoside yakorewe Abatutsi n’ubwicanyi bwakorewe muri Bosnia na Herzegovina.

Annan yaje mu Rwanda yumva ari nka rumwe mu ngendo nyinshi yakoreraga hirya no hino ku Isi, yumva ari bukoreshe amagambo asize umunyu amwe y’abanyapolitiki ariko Abanyarwanda bamubera ibamba.

Muri urwo ruzinduko rw’iminsi itatu, yabanje guhagamwa n’abadepite mu Nteko, avuyeyo umugoroba wo kumwakira ku meza abayobozi bakuru mu Rwanda barimo Perezida, Visi Perezida na Minisitiri w’Intebe birangira batawitabiriye, mu gitondo agiye guhura n’abacitse ku icumu banga kumwitaba.

Umunsi wa mbere wamubereye ihurizo

Kofi Annan yageze mu Rwanda kuwa Gatatu tariki 6 Gicurasi 1998. Yaje nyuma y’igitutu amahanga yashyiraga kuri Loni, agaragaza ko ntacyo yakoze ngo itabare Abatutsi bicwaga mu Rwanda kandi byari mu bushobozi bwayo.

Yageze mu Rwanda hashize iminsi ibiri ikinyamakuru The New Yorker cyanditse inkuru icukumbuye, yagaragazaga uburyo tariki 11 Mutarama 1994 hari ubutumwa Major General Roméo Dallaire wari ukuriye ingabo za Loni mu Rwanda, yandikiye Kofi Annan n’abandi bari bamukuriye abamenyesha ko Leta ya Habyarimana iri gutegura Jenoside ariko ntibabihe agaciro.

Ngo ayo makuru Major General Roméo Dallaire yari yayahawe n’umuntu wamuhaga amakuru y’imbere muri Leta, wahoze ari mu bashinzwe umutekano wa Habyarimana. Uwo muntu ajya kumenera ibanga Dallaire, ngo yari yasabwe n’ishyaka rya Habyarimana gukora urutonde rw’Abatutsi no gutoza Interahamwe zari bwice Abatutsi bari baruriho.

Inkuru ya The New Yorker yaciye igikuba muri Loni, iza habura umunsi umwe ngo Kofi Annan ahaguruke aze mu maso y’abo ashinjwa kwanga gutabara.

Loni yamaganye ayo makuru ariko ntibyagira icyo bitanga kuko abayatanze banafotoye Fax Dallaire yohereje muri Loni bakanga kumwumva.

Mu Rwanda naho abayobozi basaga nk’abadashishikajwe n’uruzinduko rwa Kofi Annan ndetse hari umuyobozi umwe wabwiye The New Yorker, ati“Abantu benshi mu gihugu cyanjye ntabwo bishimiye Annan. Niwe wari ukuriye ibijyanye n’ubutumwa bw’amahoro muri Loni kandi ingabo za Loni nizo zatumye Jenoside ikomeza. Mumureke ariko aze azabyiyumvire imbonankubone.”

Umunsi wa mbere Annan yari amaze kwibonera akababaro k’Abanyarwanda. Ku gicamunsi cy’umunsi yagereyeho mu Rwanda yagiye mu Nteko Ishinga Amategeko, abadepite bamwima agahenge.

Ubwo Ibiro Ntaramakuru by’Abanya-Canada [ntibikiri iby’Abongereza], Reuters byandikaga ku ruzinduko rwa Annan mu Rwanda, byagize biti “Annan yeretswe uburakari mu ruhame na Minisitiri w’ububanyi n’amahanga, yibasirwa n’abadepite, asananirwa n’abayobozi bakuru b’igihugu, yimwa amatwi n’abarokotse Jenoside.”

Mu Nteko Ishinga Amategeko, Annan wari kumwe n’umufasha we, abadepite bakomezaga kumwibutsa ko afite uruhare muri Jenoside yakorewe Abatutsi yabyanga yabyemera.

Nyuma yo kubona ko atishimiwe, Annan ntibyamuciye intege yarakomeje ageza ku badepite ijambo ry’umunsi yari yateguye ari naryo ryasembuye uburakari kurushaho.

Mbere yo gutangira ijambo rye, yagize ati “Ntabwo naje hano kujya mu mpaka kandi muzi ko hari umugani uvuga ngo umushyitsi buri gihe ahora ari imbohe y’umusangwa.”

Muri iryo jambo rye, yavuze ko icyamuzanye mu Rwanda ari ukomora ibikomere n’amacakubiri byari bigishegeshe igihugu ndetse no kwizeza ubufasha bw’Umuryango w’Abibumbye mu gushakira u Rwanda amahoro n’iterambere.

Annan yavuze ko ibyabaye ari “Amakuba yaturutse imbere, akukumba imiryango. Ni amakuba yasigiye abarokotse ihungabana ritavugwa.”

Yakomeje agira ati “Turemera ko Isi yatereranye u Rwanda mu gihe ikibi cyari kirwugarije. Isi ikwiriye kwihana ntizongere gutsindwa gutya. Ubu noneho tuzi ko ibyo twakoze bitari bihagije mu gutabara u Rwanda, ntabwo twahesheje agaciro amahame yatumye Loni ishingwa.”

Mu ijambo ryose yavuze, ntaho Kofi Annan yigeze agaragaza uruhare rwe mu kudatabara u Rwanda nk’uwari uhagarariye ibikorwa byo kugarura amahoro muri Loni. Ntacyo yavuze ku nkuru ya The New Yorker yari imaze kumushinja kwirengagiza ibyabaga mu Rwanda kandi yarabibwiwe.

Kofi Annan yavuze ko kudatabarwa k’u Rwanda byatewe n’ubushake buke bwa politiki mpuzamahanga, aho kuba Loni ubwayo.

Ijambo yavugiye mu nteko ryasubije ibintu irudubi!

Yarinze ava mu Nteko Ishinga Amategeko uwo mugoroba abadepite batanyuzwe. Ijambo yavugiye mu Nteko ryo ryasubije ibintu irudubi. Abari biteze ko nibura asaba imbabazi basubije amerwe mu isaho.

Uretse kudasaba imbabazi, yari yongereyeho ikindi ko Jenoside ari ‘Amakuba yaturutse imbere’, bivuze ko ari ibyago Abanyarwanda biteye, nta ruhare rw’amahanga.

Ubuyobozi bw’u Rwanda bwatangiye gushinja Kofi Annan ubwirasi agihari, anagayirwa kutava ku izima ngo asabe imbabazi.

Ni uruzinduko rwaranzwe ahanini n’ibimenyetso bikomeye bigaragaza uburyo u Rwanda rutari rwiteguye kwakira Kofi Annan utari busabe imbabazi ku bw’uruhare rwe muri Jenoside. Iburizwamo ry’umuhango wo kwakirwa ku meza n’uwari Perezida wa Repubulika, Visi Perezida na Minisitiri w’Intebe ryatunguye benshi icyo gihe.

Uwari Umuvugizi wa Guverinoma, Joseph Bideri yabwiye Reuters ko babikoze bashaka kwamagana ‘ubwirasi’ buri mu ijambo Kofi Annan yagejeje ku Nteko Ishinga Amategeko.

Bukeye tariki 7 Gicurasi, Kofi Annan yagombaga kuganira n’itsinda ry’abarokotse Jenoside kuri ETO Kicukiro ariko ubwo abari bamuherekeje bahageraga nta muntu n’umwe bahasanze. Ntabwo icyatumye abarokotse Jenoside batahagera cyatangajwe ariko cyari ikindi kimenyetso cy’uko ijambo rye mu Nteko ryari ryagawe bikomeye.

Kofi Annan amaze kubura abantu kuri ETO Kicukiro, yakomeje urugendo ajya ku rwibutso rwa Nyanza ya Kicukiro. Aho ku rwibutso yashyize indabo ku mva, atemberezwa mu nzu y’amabati yari irimo imibiri y’abazize Jenoside itarashyingurwa mu cyubahiro.

Imbere y’abarokotse Jenoside i Nyanza yemeye ko ‘iyo baza guha Dallaire ingabo zihagije, aba yaratabaye abicwaga.”

Mbere yo kuva mu Rwanda yerekeza muri Uganda, Kofi Annan abanyamakuru bamubajije uko yakiriye uburakari Abanyarwanda bamugaragarije, avuga ko yabiganiriye n’abayobozi b’u Rwanda bakiyunga.

Yavuze ko Abanyarwanda bamugejejeho ibibazo bafite, kandi ko byerekeye Loni muri rusange aho kuba we ku giti cye.

Ibinyamakuru bitandukanye byanditse ko uruzinduko rwa Annan mu Rwanda ari rumwe mu zamukojeje isoni mu buzima bwe muri Loni ndetse ko rwahinduye uburyo Loni yafataga imyanzuro ku bibazo bihari.

Tariki 7 Mata 2004 ubwo hibukwaga imyaka 10 Jenoside yakorewe Abatutsi ibaye, Kofi Annan yarashyize asaba imbabazi za Loni nawe ubwe ku giti cye kuko batatabaye Abanyarwanda.

Yagize ati “Njye ubwanjye nk’uwari umuyobozi w’ishami rya Loni rishinzwe kugarura amahoro ku isi, nasunitse ibihugu byinshi ngo bitange ingabo. Nyuma ya Jenoside naje kubona ko hari ibindi nashoboraga gukora. Uru rwibutso rubi rwatwaje imitekerereze yanjye n’imyanzuro mfata nk’Umunyamabanga Mukuru.”

Isomo ry’ikimwaro yatewe no kudatabara muri Jenoside yakorewe Abatutsi ryakomeje gutuma Kofi Annan yigengesera cyane. Mu 2012 yeguye ku mwanya w’intumwa idasanzwe mu gushakira umuti intambara yo muri Syria. Ngo uwanga amazimwe abandwa habona! Kofi Annan yavuze ku mugaragaro ko yatabaje akanama ka Loni gashinzwe umutekano n’umuryango mpuzamahanga bakamwima amatwi, ahitamo kwegura.

Ku myaka 80, tariki 18 Kanama 2018 nibwo hamenyekanye inkuru y’urupfu rwa Kofi Annan.

Ubwo Kofi Annan yasuraga urwibutso rwa Nyanza ya Kicukiro muri Gicurasi 1998
Aha Perezida Pasteur Bizimungu yaramukanyaga na Kofi Annan
Kofi Annan nyuma ya 1998 yakunze kujya aza mu Rwanda mu gukosora amakosa yakozwe ubwo Loni yangaga gutabara u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .