00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe amarushanwa ku basizi, abanditsi n’abakinnyi b’ikinamico Nyarwanda

Yanditswe na Ferdinand Maniraguha
Kuya 4 Werurwe 2021 saa 01:49
Yasuwe :
0 0

Inteko y’Umuco yateguye amarushanwa yo gushimira abasizi, abanditsi n’abakinnyi b’ikinamico Nyarwanda bahiga abandi, mu rwego rwo guteza imbere ubwo buvanganzo.

Ni amarushanwa yateguwe mu rwego rwo kwizihiza Umunsi w’Ubusizi ndetse n’Umunsi w’Ikinamico yose izizihizwa muri Werurwe.

Ku wa 21 Werurwe 2021 ni bwo u Rwanda ruzizihiza Umunsi w’Ubusizi. Uyu mwaka ukaba uzizihizwa ku nshuro ya 21 ku rwego rw’Isi. Ni umunsi washyizweho n’Ishami ry’Umuryango w’Abibumbye ryita ku Burezi, Ubumenyi n’Umuco (UNESCO) mu Ugushyingo 1999.

Mu rwego rwo kwizihiza uyu munsi wahariwe Ubusizi no kwimakaza umurage w’Abanyarwanda ubitsemo, Minisiteri y’Urubyiruko n’Umuco ibinyujije mu Nteko y’Umuco ku bufatanye na Minisiteri y’Uburezi binyuze muri Komisiyo y’Igihugu Ikorana na UNESCO/CNRU, yateganyije gushimira binyuze mu irushanwa abasizi n’abatahira bazaba bahize abandi. Ibi bikaba biri mu nshingano z’Inteko y’Umuco yo kugira uruhare mu iterambere ry’ubuhanzi, ubuvanganzo n’ubugeni bishingiye ku muco.

Insanganyamatsiko y’uwo Munsi w’Ubusizi igira iti “Twimakaze ubusizi bubungabunga umurage wacu”.

Inteko y’Umuco mu itangazo yashyize hanze, yavuze ko uwemerewe kwitabira ayo marushanwa y’Ubusizi agomba kuba ari Umunyarwanda, Umuvugo/igisigo n’izina ry’inka bigomba kuba ari umwimerere w’umuhanzi atari ugusubiramo iby’abandi; umuvugo/igisigo n’izina ry’inka bigomba kuba bikoresha Ikinyarwanda kinoze kandi cyuje ikeshamvugo; Umuhanzi agomba kuba asiga ku giti cye, ariko yemerewe abamwakira bibaye ngombwa.

Mu bindi bisabwa, umuvugo cyangwa igisigo bigomba kuba byibanda ku ruhare rw’abasizi mu bukangurambaga bwo kwirinda cyangwa kurwanya icyorezo cya Covid-19. Abatahira bo ntibarebwa n’iyi ngingo.

Uburebure bw’umuvugo, igisigo cyangwa izina ry’inka bugomba kuba butari munsi y’iminota itanu kandi butarengeje iminota icumi, kuba umuvugo cyangwa igisigo n’izina ry’inka bitarigeze bijyanwa mu yandi marushanwa cyangwa ngo bibe byarahimbwe bisabwe cyangwa bitewe inkunga n’urwego runaka.

Imivugo, ibisigo n’amazina y’inka mu majwi cyangwa mu majwi n’amashusho bizohererezwa Inteko y’umuco na Komisiyo y’Igihugu Ikorana na UNESCO/CNRU bitarenze ku wa 10 Werurwe 2021 mu buryo bw’ikoranabuhanga hatangwa umurongo “link” (Youtube, Sound Cloud,…) w’igihangano kimwe kuri [email protected], [email protected]

Hagomba kandi koherezwa inyandiko ya buri gihangano n’umwirondoro mugufi (CV) wa nyiracyo.

Hazashimirwa batatu ba mbere mu busizi na batatu ba mbere mu batahira. Uwa mbere azahabwa 300.000 Frw n’igikombe, uwa kabiri ahabwe 200.000 Frw naho uwa gatatu ahabwe 100.000 Frw.

Amarushanwa ku ikinamico

Ubusanzwe, Umunsi Mpuzamahanga w’Ikinamico wizihizwa ku Isi yose kuva mu mwaka wa 1961, ukaba wizihizwa buri mwaka ku wa 27 Werurwe. Washyizweho n’Ikigo Mpuzamahanga cy’Ikinamico mu wa 1961 ku bufatanye n’Ishami ry’Umuryango w’Abibumbye ryita ku Bumenyi, Uburezi n’Umuco (UNESCO).

Minisiteri y’Urubyiruko n’Umuco ibinyujije mu Nteko y’Umuco yateguye amarushanwa y’abakina n’abandika ikinamico. Insanganyamatsiko y’uwo Munsi igira iti “Duteze imbere ikinamico mu bukungu bushingiye ku nganzo”.

Abashaka kwitabira amarushanwa, ku banditsi b’ikinamico basabwa kuba ari Umunyarwanda; ikinamico igomba kuba ari umwimerere w’umuhanzi; kuba ikinamico itarigeze ijyanwa mu yandi marushanwa, itaratangajwe cyangwa ngo ibe yaranditswe bisabwe cyangwa bitewe inkunga n’urwego runaka.

Igomba kuba kandi ari ikinamico itari uruhererekane (igomba kuba irangiye); ikinamico igomba kuba yanditse mu Kinyarwanda kinoze kandi igomba kuba atari ngufi (sketch).

Inteko y’Umuco yatangaje ko umwanditsi w’ikinamico yakwandika ku ngingo yihitiyemo idatokoza ingangagaciro n’umuco w’u Rwanda.

Ku bijyanye n’abakinnyi b’ikinamico, ujya mu marushanwa agomba kuba ari Umunyarwanda; kuba yarakinnye mu ikinamico yaciye mu bitangazamakuru bizwi kandi bikora ku buryo bwemewe n’amategeko (radiyo, televiziyo) cyangwa yaratangajwe ku yindi mirongo (Youtube…).

Agomba kugaragaza izina ry’umukinnyi ndetse n’umukinamico (charactor/personnage) yigana; kohereza ikinamico imwe mu majwi cyangwa amajwi n’amashusho akinamo ari mu bakinnyi b’ingenzi; ikinamico akinamo igomba kuba iri mu Kinyarwanda kinoze kandi idatokoza umuco w’Abanyarwanda.

Ku bujuje ibisabwa, inyandiko z’ikinamico (ku banditsi) cyangwa imirongo (link) y’ikinamico abakinnyi bakinamo bizohererezwa Inteko y’Umuco bitarenze ku wa 13 Werurwe 2021 mu buryo bw’ikoranabuhanga kuri [email protected]

Hagomba kandi koherezwa umwirondoro mugufi (CV) w’umwanditsi cyangwa umukinnyi. Abazaba batsinze, hazashimirwa batatu ba mbere mu banditsi na batatu ba mbere mu bakinnyi.

Uwa mbere azahabwa 300.000 Frw, uwa kabiri ahabwe 200.000 Frw naho uwa gatatu ahabwe 100.000 Frw.

Abanditsi n'abakinnyi b'ikinamico nyarwanda bazahiga abandi bazahembwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .