00:00:00 IGIHE NETWORK KN KINYARWANDA EN ENGLISH FR FRANCAIS

Hateguwe amarushanwa agamije kugaragaza ubuhanga n’umuco by’abanyafurika mu mafoto

Yanditswe na Ferdinand Maniraguha
Kuya 11 Werurwe 2021 saa 07:44
Yasuwe :
0 0

Hateguwe amarushanwa ngarukamwaka agamije kugaragaza isura nyayo ya Afurika no gushishikariza abafotozi Nyafurika kugaragaza ubuhanga bwabo bifashishije internet, mu guhangana n’amakuru yagiye agaragaza umugabane nk’udashoboye.

Ni amarushanwa yateguwe binyuze muri gahunda y’Irushanwa ryiswe Wiki Loves Folklore ritegurwa n’Umuryango Wikimedia, Ishami ry’u Rwanda, hagamijwe guhuriza hamwe amafoto n’amashusho (video) bigaragaza umuco wo mu bice bitandukanye ku Isi.

Uyu mwaka hazibandwa ku mafoto yafashwe cyane cyane mu bijyanye n’amaserukiramuco, imbyino gakondo, umuziki gakondo, imikino gakondo, indyo gakondo, imyambaro gakondo, ubuvanganzo gakondo burimo imigani, ibitekerezo, indirimbo, imikino, ubugeni n’ibindi.

Uwitabira iri rushanwa agomba kuba afite uburenganzira ku mafoto yatanze. Amafoto azemerwa ni ayafashwe igihe icyo ari cyo cyose ajyanye n’amabwiriza yatanzwe kandi nyirayo akaba ayafitiye uburenganzira.

Abateguye amarushanwa bavuze ko utanga amafoto nyirayo agomba kuba yemera ko ashobora gukoreshwa n’abandi bantu ku nyungu rusange.

Ifoto ya mbere izatoranywa nyirayo azahembwa amadolari 200, uwa kabiri ahembwe amadolari 100 naho uwa gatatu ahembwe amadolari 50.

Nyinawumuntu Jeannette ushinzwe gutegura Irushanwa rya Wiki Loves Folklore mu Rwanda yavuze ko kuryitabira ari ugukomeza kumenyekanisha u Rwanda n’umuco warwo ku ruhando mpuzamahanga binyuze kuri internet.

Muri uyu mujyo kandi hateguwe irindi rushanwa rizwi nka Wiki Loves Africa, aho abanyabugeni b’Abanyafurika bashishikarizwa kohereza amafoto, amashusho (video) bafashe mu bihe bitandukanye ajyanye n’insanganyamatsiko y’ubuzima n’imibereho myiza (Wellness) muri Afurika, hagamijwe gukora ububiko bwabyo bugaragaza uwo mugabane.

Ayo mashusho n’amafoto bigomba kuba bishobora no kwifashishwa na Wikipedia ndetse no mu yindi mishinga y’Umuryango Wikimedia Foundation, Ishami ry’u Rwanda.

Uyu mwaka abazitabira bashishikarizwa kohereza amashusho cyangwa amafoto bigamije guteza imbere ubuzima n’imibereho myiza y’abatuye Afurika mu buryo bwa Kinyafurika, nyuma y’umwaka w’ibibazo Isi yahuye nabyo bishingiye ku cyorezo cya COVID-19.

Boris Bahire Kabeja ushinzwe gutegura Irushanwa rya Wiki Loves Africa yagize ati “Gufata amafoto muri ziriya nzego byongera kugaragara k’u Rwanda kuri internet. Inyungu ni uko na we uba utanze umusanzu ariko byiyongereyeho iyo uri gukoresha ya mafoto wandika inkuru, uba ukarishya ubumenyi bwo kwandika.”

Intego ya Wikimedia ni ugusangiza abandi ubumenyi ku buntu (free open knowledge sharing) hagamijwe gukomeza kubaka Isi nziza.

Kabeja avuga ko amarushanwa nk’aya arushaho kumvisha abantu akamaro ko gusangiza abandi ubumenyi kandi ngo bimaze gutanga umusaruro.

Yagize ati “Byibura amafoto agera hafi ku 1,000 amaze gushyirwa kuri Wikimedia. Ikindi aya marushanwa amaze gutuma abantu basoma inyandiko zireba u Rwanda kuri Wikipedia kuko hamaze kwiyongeraho byibura 15%.”

Uwa mbere muri iki cyiciro azahembwa amadolari 170, uwa kabiri ahembwe amadolari 100 naho uwa gatatu ahembwe amadolari 50. Muri iki cyiciro kandi hazahembwa umuntu umwe wagaragaje gukoresha amafoto meza mu mishinga ya Wikimedia, akazahembwa amadolari 30.

Wiki Loves Africa ni irushanwa ngarukamwa rimaze imyaka irindwi rigamije kugaragaza isura nziza ya Afurika, bitandukanye n’iyo abanyamahanga bakunze kugaragaza kuri uwo mugabane haba mu binyamakuru no mu bundi buryo.

Amafoto, amashusho cyangwa amajwi bigomba koherezwa guhera tariki 15 Werurwe kugeza tariki 15 Mata 2021.

Kwiyandikisha wakanda hano cyangwa hano

Irushanwa rigamije kugaragaza isura nziza ya Afurika itajya ivugwa cyane/ Ifoto: Wikimedia
Umugabane wa Afurika ufite ibyiza byinshi cyane cyane ahantu nyaburanga/ Ifoto: Wikimedia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .