Ibitazibagirana mu gitero cyiswe icy’Imigogo u Rwanda rwatsinzemo abanyankore

Yanditswe na Nsanzabera Jean de Dieu
Kuya 22 Werurwe 2020 saa 12:32
Yasuwe :
0 0

Buri bitero byose u Rwanda rwagabye mu mahanga, byagiye bibamo ibikorwa by’ubuhangange bitazibagirana muri buri gitero. Igitero cyiswe icy’imigogo ni kimwe mu bitazibagirana umwami Kigeli Rwabugili yagabye ku ngoma ya Nkore.

Igitabo “Intwari z’imbanza, zubatse u Rwanda rugahamya igitinyiro’’ cyanditswe n’Umusizi Nsanzabera Jean de Dieu, kigaragaza ko muri Gashyantare 1894 ubwo Rwabugili yafataga umwanzuro wo kugaba igitero muri Nkore Abahinda b’Abanyankore, bari batangiye guhangara u Rwanda bitwaje agashya k’imbunda bahawe n’Abongereza.

Ibyateye umujinya Rwabugili, ni igitero Ntare V Rugingiza rwa Migereka Umwami wa Ankole yari yagabye mbere ahengereye Rwabugili ari i Bunyabungo aza kunyaga inyambo z’u Rwanda atwika ingoro y’i Rutaraka hafi ya Nyagatare.

Mu kwihimura, abanyarwanda bagabye igitero muri Nkore batamitse umuheto, imyambi ivuza ubuhuha, inkota zihogera.

Abanyankore batangiye gupfa mu buryo bubatunguye, babaga bahagararanye ari babiri cyangwa se barenze, barimo gukokinga ( gushyira amasasu mu mbunda), umwe akabona mugenzi we aravuza induru n’umwambi mu gituza wamwinjiye.

Mu gihe nawe akibaza ibibaye, akumva nawe bamufashe mpiri bambambuye imbunda bamucumita n’inkota mu gituza, abandi barimo kubaca imitwe, noneho imiriro n’urusaku rw’amasasu, rurahagarara humvikana induru z’abarimo gupfa n’abarimo guhunga batabaza.

Rwabugili n’Ingabo ze babonye ko umugambi wabo urimo kugera ku ntego, yahise asaba ingabo zose guhindura uburyo bwo kurwana, bose bagafata umurongo umwe wo kwirukankana Abanyankore barimo guhunga, ubundi bakaboherezamo urufaya rw’imyambi n’amacumu atagira ingano n’inkota zihogera bica uwo bafashe mpiri.

Gusubira mu buryo bwa gakondo, nuko aribwo bari bamenyereye, kandi bwihuta butanahusha umuntu uhunga, kandi bari bamaze kubona ko ntawe urasa ahunga. Abanyankore barashishaga imbunda bahiye ubwoba barimo guhunga. Ikindi kandi n’ubwo Abanyarwanda bari bamaze kwambura imbunda Abanyankore, ntabwo bari bafite ubumenyi n’ubuhanga bwo kuzirashisha. Bituma bazihorera bikoreshereza ubumenyi bwabo gakondo bw’imirwano.

Amateka agaragaza ko muri icyo gitero Rwabugili yagabye mu Nkore yagitsinze mu buryo budasubirwaho, anyaga Abanyankore imbunda zigera ku Bihumbi Bibiri, ari nazo Musinga n’Ingabo ze bifashishije barwana n’Abadage nazo zikabananira, bakarashisha imiheto bakanatsindwa burundu, Abadage bagatangira gukoroniza u Rwanda.

Rwabugili n’ingabo ze barakomeje baratanya bagana mu Majyaruguru y’i Burengerazuba bw’ingoma ya Nkore, bagera ku mugezi wa “Rwizi” ubabera inzambi mu kuwambuka ngo bakurikirane inkirirahato z’Abanyankore zarokotse inzara z’umuheto w’inkotanyi cyane. Bitewe nuko ikiraro cyambuka uwo Mugezi Abanyankore bari bagiciye kugira ngo Ingabo z’u Rwanda zitabakurikira, Rwabugili nabo bari kumwe, bahise biga ubucakura bukomeye, bwo gushaka icyo batindisha uwo mugezi ngo bagomere amazi yawo babone uko bawambuka ngo bakurikirane inkirirahato z’Abanyankore.

Rwabugili wari ufite ishyaka ryinshi no kunyaruka mu mitekerereze, yahise yigira inama yo kurunda imirambo yose y’Abanyankore muri uwo mugezi ngo babakoreho ikiraro babone uko bambuka kuko ibyo gutema ibiti byari kubatinza bagasanga Abanyankore babacitse. Nuko barunda imirambo y’Abanyankore itagira ingano muri uwo mugezi wa Rwizi nk’abarunda amasiteri y’ibiti, bakora ikiraro gikomeye cyane, maze barambuka, bajya guhigisha uruhindu Umunyankore aho yari yahungiye hose.

Icyo gitero kiswe icy’Imigogo, cyabaye icyorezo mu Banyankore, cyaguyemo abatagira ingano, abamenyekanye ni umuhungu wa Ntare witwaga Rumukwe wari umutasi wa Nkore, akarashisha n’imbunda ifite amadarubindi kandi ikarasa kure.

Ingabo z’u Rwanda zikimara kumwica, Rwabugili yahise afata iyo mbunda ye, atangira kuyirashisha kugeza amasasu ashizemo. Ni imwe mu zabaye iminyago bakuye mu ngoma ya Nkore bayizana ibwami, usibye ko yahiriye mu nzu mu bihe by’intambara yo ku Rucunshu.

Abongereza barahurujwe n’Abanyankore ngo baze kubatabara, umwongereza wari ugaragiwe n’ingabo zikomeye n’intwaro nyinshi z’ikirenga, ageze i Nyagakoni Abanyankore bakunze kwita Nkoni abona imirambo y’Abanyankore inyanyagiye hirya no hino mu gihugu, ashya ubwoba, ku mutima ati “Aba bantu bishe ingabo bene aka kageni, ni nde wabikorereza?”, bahitamo kwisubirira inyuma urugamba ararureka.

Igitero cya Rwabugili yagabye muri Nkore, cyabaye inkomoko y’insigamugani n’amarenga yabaye kimomo mu Rwanda no mu mahanga, aho bagira bati “ Kanaka yagaritse ingogo” Byo kuvuga ko yishe abantu batagira ingano.

Uburyo bushya bw’imirwano uko ari butati nibwo bwatumye Abanyarwanda barushaho gutangarirwa n’Amahanga, bunatanga umusaruro ugaragara maze bagiriza Abanyankore babagusha ruhabo. Ubwo buryo burimo ubwo gukusha, kurashisha amano aribwo bakunze kwita “Kurasa umugaramirizo” no gukambakamba ushaka gufata mpiri umwanzi ngo umwambure intwaro.

Bamwe mu ngabo z’ibihangange zazengereje amahanga ku ngoma ya Rwabugili harimo Kamananga ka Sebajura umwuzukuru wa Rwakagara, warasaga umwambi ugahitana batanu, Nyamuhenda wa Kejeje, umwega w’Umuhenda, Umutekereza karundura w’ubucakura mu mirwano yo muri Nkore, Bisangwa bya Rugombituri, Umugaba w’imitwe y’Ingabo yose ku ngoma ya Rwabugili, akaba n’umuyobozi wigirira Icyizere nk’icya Sebuja Rwabugili, akaba umutware w’ingabo z’Ingangurarugo.

Hari kandi Rwanyonga rwa Mugabwambere wari umugaba w’Ingangurarugo Indwanyi idahusha wivuganye Kabego umwami wo ku Ijwi. Baramu ba Rwabugili barimo Kabare ka Rwakagara, wari umuhanga cyane mu kurwanira mu mazi mu bwato bwe bwitwaga “Imbabazi” Cyigenza cya Rwakagara watwaraga Ingoma za Rwabugili mu bwato bwitwaga ‘Ishyaka’ na Ruhinankiko wari indwanyi by’akaburarugero.

Abongereza bageze aho urugamba rwabereye baje gutabara, bakubise amaso imirambo y'abanyankore batinya abanyarwanda, bisubirirayo
Umwami Rwabugili yafashe imbunda yambuye abanyankore arayirashisha
Abanyarwanda bageze ku mugezi wa Rwizi, bafashe imirambo y'abanyankore bayikoramo ikiraro ngo bambuke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .