00:00:00 IGIHE NETWORK KN KINYARWANDA EN ENGLISH FR FRANCAIS

Imbyino gakondo zahawe umwihariko muri gahunda ‘Amateka Series’ ya Werurwe 2021

Yanditswe na Uwiduhaye Theos
Kuya 18 Werurwe 2021 saa 08:27
Yasuwe :
0 0

Ibiganiro ngarukakwezi byiswe ‘Amateka Series’ bigamije kwigisha urubyiruko ibijyanye n’umuco n’amateka by’u Rwanda; bigiye kuba hibandwa ku mbyino zitandukanye za gakondo.

Igikorwa cy’uku kwezi cyateguwe n’abatangije ‘Amateka Series’ ku bufatanye na Ikiringo Africa yatangije umushinga wiswe Ikiringo Project ugamije kumenyakanisha imico gakondo muri Afurika binyuze mu mbyino. Igikorwa cy’uku kwezi kizaba hifashishije ikoranabuhanga nk’ibisanzwe, kuri uyu wa Gatandatu tariki 20 Werurwe 2021 guhera saa tatu za mu gitondo.

Hazifashishwa amateka atandukanye ya mbere y’ubukoloni mu mbyino. Uretse kuba abazakurikira iki gikorwa bazagenda biga ndetse bakanihera ijisho imbyino zitandukanye za Kinyarwanda, bazanasobanurirwa byimbitse imbyino zitandukanye n’icyo zivuze.

Igikorwa cya ‘Amateka Series’ cyaherukaga kuba tariki ya 6 Gashyantare 2021, cyabanjirijwe n’ikiganiro cyari cyatumiwemo abantu batandukanya barimo Umunyamabanga wa Leta muri Minisiteri y’Urubyiruko n’Umuco, Bamporiki Edouard, umuhanzikazi Mariya Yohana Mukankuranga, Jules Sentore, Jean Paul Niyonzima uri mu rubyiruko ruba Perth muri Australia n’abandi.

Cyabaye hifashishijwe internet kinyura ku mbuga nkoranyambaga zose za Amateka Series (Twitter, Facebook, Instagram na YouTube) ndetse na Youtube ya IGIHE.
Abatumiwe muri iki gikorwa baganiriye ku nsanganyamatsiko igira iti “The Genesis of Rwanda: As told through many stories” cyangwa se “Inkomoko y’u Rwanda nk’uko twabibwiwe binyuze mu nkuru nyinshi.”

Iy’uku kwezi iragira iti “The Genesis of Rwanda: As told through the dance.”

Kuva mu Ukwakira na Ukuboza 2020, nibwo hatangijwe umushinga witwa ‘Amateka Series’, ukubiyemo ubukangurambaga bwatangijwe n’urubyiruko ruba mu mahanga hagamijwe kwigisha bagenzi babo, yaba ababa hirya no hino mu mahanga ndetse n’abari mu Rwanda, ibijyanye n’amateka y’u Rwanda hamwe n’ubugeni mu ngeri zitandukanye.

Ubu bukangurambaga bukubiyemo ibiganiro bizajya bitumirwamo impuguke zitandukanye mu by’umuco, inararibonye zizafasha mu kwigisha urubyiruko ibijyanye n’amateka, abahanzi mu ngeri zitandukanye n’abandi.

Ushaka kuzakurikira igikorwa giteganyijwe kuri uyu wa Gatandatu wakanda hano: https://www.amatekaseries.com/

Mu mateka Series kuri uyu wa Gatanda hazibandwa ku mbyino gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .