Imiryango ikomeye yakomotse ku muryango w’umwami Cyilima II Rujugira

Yanditswe na Nsanzabera Jean de Dieu
Kuya 17 Gashyantare 2020 saa 08:49
Yasuwe :
0 0

Mu mateka y’abakurambere bafashije u Rwanda kuba igihangange, hari imiryango yagiye ihamya ibigwi n’ibirindiro, ikagira amavugwa ku bw’ibigwi n’ibirindiro babaga barakoreye igihugu, hagati mu muryango mugari bakomokamo.

Cyilima Rujugira ni umwami wayoboye u Rwanda ahagana mu 1675 kugeza mu 1708, akaba umwe mu bakomotsweho imiryango myinshi kandi yagiye ikomera mu Rwanda.

Ni umwami wa 19 mu bami 28 bategetse u Rwanda, akaba n’umwami wa 19 mu bantu 34 bagize uruhare mu mushinga wo kubaka u Rwanda. Izina rye ry’ubutwari ryari “Impeshakurama’’.

Nk’uko tubikesha igitabo “Iyororoka ry’Abanyarwanda, inkomoko y’imiryango migari ’’ ndetse n’igitabo “Intwari z’imbanza, zubatse u Rwanda rugahamya igitinyiro’’ byombi dukesha Umusizi Nsanzabera Jean de Dieu, Cyilima II Rujugira ni mwene Yuhi Mazimpaka za Mibambwe Gisanura, Umwami w’umunyiginya wo mu nzu y’Abaganzu na Kirongoro cya Kagoro, ukomoka mu muryango mugari w’Abega.

Amateka atugaragariza ko Umwami Rujugirwa rwa Mazimpaka, yabyaye abana benshi biganjemo Abahungu basaga batandatu barimo Gihana Nyamihana, Baziga, Mudenge, Gashikazi, Sharangabo na Ndabarasa ari nabyo byatumye inzu zimukomokaho ziba nyinshi.

Umuryango w’umwami Cyilima Rujugira wabayemo ingabo z’ibikongote ku ngoma ye n’iy’umuhungu we Kigeli Ndabarasa wamuzunguye ku ngoma. Banabaye abagaba b’ingabo z’intahusha mu gihe cye. Imitwe y’Ingabo yatwarwaga n’abana be harimo Abakemba batwarwaga na Sharangabo ya Cyilima Rujugira, Imvejuru zatwarwaga na Sharangabo ya Cyilima Rujugira, Indirira( Rugamba) zatwarwaga na Muciye ya Serutaro rwa Mukuku wa Mazimpaka, Abarima batwarwaga na Mitunga ya Cyilima Rujugira n’umugabo we Seruhuga, Abatanyagwa batwarwaga na Gihana cya Cyilima Rujugira, Intarindwa zatwarwaga na Ndabarasa ba Cyilima Rujugira, Ababito batwarwaga na Ndabarasa ba Cyilima Rujugira, Indara zatwarwaga na Cyilima Rujugira rwa Yuhi Mazimpaka n’Ababanda batwarwaga na Cyilima Rujugira rwa Yuhi Mazimpaka

Mu muryango w’igihangange wa Cyilima Rujugira niho ahakomoka umutabazi w’Umucengeri Gihana Nyamihana wari umuhungu w’imfura ye, akaba n’umugabo wa Nyiratunga waje kuba umugabekazi wa Yuhi Gahindiro, wemeye kumena amaraso ye kugira ngo u Rwanda rutsinde igitero cy’ibihugu bine byari byishyize hamwe ngo bihanagureho u Rwanda, aribyo u Burundi, i Gisaka, u Bugesera na Ndorwa. Igitero cyagabwe ahasaga mu wa 1691.

Aba bagabo b’Intarumikwa bafite inkomoko kwa Cyilima Rujugira, nibo babaye inkomoko y’inzu z’imiryango zo kwa Rujugira zikomoka mu muryango mugari w’Abanyiginya.

Inzu z’imiryango zikomoka kwa Cyilima Rujugira zirimo Abanyiginya b’Abadenge bakomoka kuri Mudenge wa Cyilima Rujugira; Abanyiginya b’Abakore bakomoka kuri Kanyankore ka Kanyoni ka Baziga ba Cyilima Rujugira; Abangiginya b’Abahabanyi bakomoka kuri Bihabanyi bya Gashikazi ka Cyilima Rujugira; Abanyiginya b’Abamo bakomoka kuri Rwamo rwa Gihana cya Cyilima Rujugira; Abanyiginya b’Abanana bakomoka kuri Munana wa Gihana cya Cyilima Rujugira; Abanyigiya b’Abasharangabo bakomoka kuri Sharangabo ya Cyilima Rujugira; Abanyigiya b’Abarasa bakomoka kuri Ndabarasa ba Cyilima Rujugira;

Izindi nzu zihamye mu mateka y’u Rwanda zikomoka kwa Cyilima Rujugira, harimo n’izo kwa Kigeli Ndabarasa umuhungu we w’ubuheta nawe wabaye umwami. Mu nzu z’imiryango zamukomotseho harimo Abanyiginya b’Abanyemina bakomoka kuri Nyemina ya Kigeli Ndabarasa; Abanyiginya b’Abahebera bakomoka kuri Bihebera bya Semugaza wa Kigeli Ndabarasa; Abanyiginya b’Abarabyo bakomoka kuri Burabyo bwa Kigeli Ndabarasa; Abanyiginya b’Abanyabiguma bakomoka kuri Rwanyabiguma rwa Kigeli Ndabarasa; Abanyiginya b’Abaryinyonza bakomoka kuri Baryinyonza ba Kigeli Ndabarasa; Abanyiginya b’Abazenga bakomoka kuri Kazenga ka Kigeli Ndabarasa; Abanyiginya b’Abamanuka bakomoka kuri Kimanuka cya Kigeli Ndabarasa;

Ngaho iyo mwama mukuru wa Cyilima Rujugira mu mizi yanyu mikuru.

Umwami Cyilima Rujugira ni umwe mu bakomotsweho n'imiryango ikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .