Uko u Rwanda rwahuye n’ibyorezo by’inzara, ibisebe n’indwara z’amatungo ku ngoma ya Mutara Semugeshi

Yanditswe na Nsanzabera Jean de Dieu
Kuya 25 Werurwe 2020 saa 10:05
Yasuwe :
0 0

Mu myaka isaga 477 (1543-2020) ishize, u Rwanda rwahuye n’ibyorezo birimo umuze ukomeye, ibisebe by’umufunzo, ibyorezo by’inzara, indwara z’abantu n’amatungo, byoretse imbaga y’abatagira ingano.

Ibyorezo bikomeye u Rwanda rwahuye nabyo, byabimburiwe n’icyatangiye ku ngoma ya Mutara Semugeshi mu ntango y’urwimo rwe ahasaga mu wa 1543.

Muri ibyo bihe Ruganzu Ndoli yatanze atunguranye ubwo yicwaga n’umuhinza Bitibibisi. Kubera amakimbirane yari ibwami umugabekazi Nyirarumaga yaranze kurekura ubugabekazi, Semugeshi yabuze umwiru wamwimika akamuha Inyonga ( Ibimenyetso by’ubwami) ngo abe umugenga w’ingoma y’u Rwanda. Mpande ya Rusanga wari umwiru mukuru w’ingoma ya Ndoli, niwe wafashe iya mbere mu kugumura abandi Biru mu kwanga kugaragaza aho bahagaze mu kwimika Semugeshi na Nyina Nyirakabogo.

Semugeshi agisha nyina inama, nyina aramusubiza ati “So Ruganzu Ndoli, yari yaranywanye na Mutaga Nyamubi umwami w’u Burundi, none genda aguhe Abiru baze bakore imihango yo kukwimika. Ubundi utware ingoma ya so, kuko nta wundi wo kuyizungura uhari”.

Semugeshi ashyira nzira yitabaza Mutaga Nyamubi umwami w’u Burundi amuha abiru bimitsi barimo Nyamwonda wa Rurenge na Gahenda ka Nyabayobya. Imihango yo kwimika Semugeshi yabereye i Mwaka wa Rukoma muri Mushubati ( ubu ni mu Karare ka Muhanga mu Murenge wa Nyarusange), imihango irakorwa, bamuha izina ry’ubwami rya Bicuba I Semugeshi.

Nyuma y’iyimikwa rya Bicuba Semugeshi, yahuye n’akaga gakomeye cyane arwara ijisho rirabyimba, ryitambikwamo n’ikintu kimeza nk’umwashi n’inkingi. Mu gisenge cy’inzu ye hitambikamo ikintu kimeze nk’ukwezi. Abaturage b’u Rwanda nabo, ntibabonye amahwemo, bahuye n’amahano y’umuze utarigeze ubaho bokamwa n’inzara n’indwara z’ibinyoro n’ibisebe by’umufunzo.

Abantu ba hafi ya Semugeshi baje kumubwira bati “Bariya Biru Mutaga yakoherereje ntibazi imihango y’iyimikabami ry’I Rwanda, mubwire akoherereze abandi, bakureho iyi miziro yatumye uberama igakururira rubanda rw’umwami umuze n’amapfa”.

Nuko Semugeshi atuma kuri Mutaga Nyamubi umwami w’u Burundi amwoherereza umuvuzi gakondo we ngo atange umuhamuro w’ibyo biza, na we amwoherereza Kiniga cya Rumanura ngo aze ahoshe ayo mahano. Kiniga cya Rumanura asesekara ibwami kwa Semugeshi, asanga ibintu byacitse, ibinyoro n’ibisebe by’umufunzo n’ibindi bigeze banyarwanda habi! Abantu ba hafi ba Semugeshi bari aho, bati “Nimushake Mpande ya Rusanga, aduhe umuzi n’umuhamuro w’izi manza zagwiririye u Rwanda”.

Umwami Semugeshi atuma abantu be ngo babaririze aho Mpande ya Rusanga yaba aherereye, basanga yaragiye kure cyane ahitwa: I Cyotamakara cy’I Buhanga ( ubu ni mu Murenge wa Ntyazo wo mu karere ka Nyanza), ari umusaza wa cyane, yarakennye bitavugwa inzara imugeze kure.

Ubwo Mpande ya Rusanga asubiza abantu bari boherejwe na Semugeshi ati “Ndashaje, ndashonje, nambaye ubusa, nahinguka nte imbere y’umwami?’, bajya kubibwira umwami Semugeshi, afata inka ebyiri z’imbyeyi, imyambaro ikoze mu mpu n’ingobyi yo ku muheka, bamujyana ibwami.

Kera kabaye Mpande ya Rusanga arashyira agera ibwami, akigera ibwami akabona ibirimo kuhabera. Nuko aramubaza ati “Wimitswe na ba nde?” Semugeshi ati “Ni Abiru b’i Burundi barimo Nyamwonda wa Burenge na Nyagahenda ka Nyabayobya.” Mpande ya Rusanga ati “Wimikiwe he?” Semugeshi ati “Nimikiwe i Mwaka wa Rukoma”.

Mpande ya Rusanga abwira Semugeshi ati “Bariya Biru b’i Burundi bakwimitse, nta kiza bashakira u Rwanda. Kukwimikira i Mwaka ugasohokera ku Ntosho, ni ikimenyetso cy’uko Abanyarwanda babaroze kwicwa n’inzara ikomotse ku mapfa bakazajya birirwa bahonda inguri z’ibikoro n’amateke bashaka amaramuko. Gushokera inka z’amashashi, ni ikimenyetso cyo kutagira uburumbuke bw’abantu, imyaka n’amatungo mu gihugu. Gusohokana igicuba cyaramvuwe mu Mutake, ni ukwifuriza Abanyarwanda guhora bataka nta kugoheka n’amahoro muri bo. Gusohokera mu Mutobo, ni ukurwara ibinyoro n’ibisebe by’imifunzo bizabahitana igihugu kikaba umwirare.”

Mpande ya Rusanga abwira Nyirarumaga ati “Impamvu igihugu cyahuye n’akaga k’iriya mize n’amapfa akaze, ni ariya marira ya Nyirakabogo urara arira ko wanze kurekura ingoma, kandi Ruganzu yaraguhaye umuhungu we Semugeshi ngo umubere umujyanama, none kugira ngo igihugu gikire nuko amarira ya Nyirakabogo yakama, kuko nta mugisha wo guhora umugabekazi aririra mu gihugu, fata inzira uhunge uve mu gihugu ujye i Burundi ubise Nyirakabogo n’umuhungu we Semugeshi bime ingoma.”

Nyirarumaga ashorera inka ze ashyira nzira n’abaja be bacikira i Burundi. Nyirarumaga akigera ku cyambu, haje inkuba itagira imvura irivovota, nyuma haza imirabyo iramukubakuba iramuyora imujyana mu kirere aburirwa irengero. Nuko Mpande ya Rusanga wari wabaherekeje ngo abambutse, abonye ibyo bibaye, abwira abakobwa ba Nyirarumaga ati “Nimuhumure buriya Nyirarumaga asanze Ruganzu Ndoli, mujye muri ubu bwato n’inka zanyu mwambuke mwigire i Burundi mu Rwanda nta mwanya mukihafite”.
Mpande ya Rusanga ageze ibwami ahamagara Abiru bose n’abakuru bari barigumuye, bakora inama yo kohera ayo mahano yagwiririye igihugu, akaba amaze kugitsembamo abenegihugu. Nuko batangira inzira yo gukora imihango n’imigenzo y’ubwiru bw’iyakorwaga mu kohera amahano yabaga yagwiririye igihugu.

Mbere yuko batangira imihango yo kweza igihugu no gukiza ubwandure bw’abaturage babanje kubakira Semugeshi urugo I Bunyogombe ngo abe ariho atura bamugangahure, bamutera ibyuhagiro n’imitsindo y’ingoma y’u Rwanda, kuko mbere yaho yari atuye mu rugo rwa se Ruganzu Ndoli rwari I Ruhashya. Kandi umwami yagombaga gukorerwa imihango yose ari mu ngoro ye nshya.

Kugira ngo umuhango wo kohera ayo mahano ukorwe, bitabaje amazi y’Ubuhoro yo mu mariba ya Rwezangoro ( mu Murenge wa Muhima), ayo mu iriba rya Shaki, ayo mu iriba rya Kabuye ka Jabana, ayo mu iriba rya Mbizi, amariba yavomwagaho amazi y’ubuhoro, akiza ubwandure agahumanura abahumanye. Yose bayahuriza hamwe mu iriba rya Kabyaza ryari munsi y’umusozi wa Nyamweru nuko bayakoreraho imihango yo kwiyeza no kweza igihugu, ngo abaturage bakire ubwandure, bagire ubuhoro n’amahoro, bagire uburame n’ubuziramuze.

Nyuma y’iyo mihango Mpande ya Rusanga yahise ahakorera imihango y’ubwimitsi yimika Semugeshi, amwambura izina yari yahawe n’Abiru b’I Burundi rya Bicuba, amuha izina ry’ubwami rya Mutara Nsoro. Niko gukurizaho kwitwa Mutara Nsoro Semugeshi. Mu gihe bakiri muri ibyo, nibwo babonye ikirere gihindutse, igicu kirakuba babona imvura iraguye, icyorezo gicika mu Rwanda, amapfa arazima, Abanyarwanda bava ibuzimu bajya ibuzima.

U Rwanda rwahuye n'ibyorezo bikomeye ku ngoma ya Mutara Semugeshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza