00:00:00 IGIHE NETWORK KN KINYARWANDA EN ENGLISH FR FRANCAIS

Uko Umwami Rwabugili yifuje guhaka abakoloni ngo bajye bamudodera imyenda

Yanditswe na Zigiranyirazo Bajecteur
Kuya 15 Mata 2021 saa 01:24
Yasuwe :
0 0

Kigeli IV Rwabugili wanamenyekanye ku izina ry’Inkotanyi Cyane ni we Mwami w’u Rwanda wahuye bwa mbere n’abera b’Abanyaburayi, anafatwa nk’umwami wa nyuma wabashije gutegeka u Rwanda atavugirwamo n’abazungu b’abakoloni kugeza ubwo mu mizo ya mbere yanifuje kubahaka ngo bajye bamubohera imyenda.

Kigeli IV Rwabugili ni mwene Mutara II Rwogera wayoboye u Rwanda mu kinyejana cya 19 agatanga mu 1853 nyuma yo kwizihiza Umuganura wo muri uwo mwaka muri Kamena. Yasimbuwe n’umuhungu we Rwabugili wabaye umunyabigwi ku ngoma ye kuko yakoze ibitero n’intambara nyinshi bituma Abanyarwanda basingiza ubutwari n’intsinzi zitari nke yabagejejeho. Ku ngoma ye ni ho hashimangiwe imvugo igira iti “Imana yirirwa ahandi igataha i Rwanda.”

Yimye ingoma akiri muto hagati y’imyaka irindwi na 12 ku mazina ya Kigeli IV Sezisoni ndetse bakanamuhimba ‘Umwana Ugicigatiye’ kuko ngo byari bibaye ubugira gatatu kikurikiranya hima umwami utegekana na nyina kugeza akuze akabasha kwifatira ibyemezo. Yakomezanyije izina rya Sezisoni ariko nyuma aza kwiyita Rwabugili aryambuye muramu we Rwabugili mwene Gaceyeye wo mu Benegitore nk’uko Sezibera mwene Rutikanga rwa Nkurikiyingoma wari umwiru abivuga ndetse bikanashimangirwa n’inyandiko za Alexis Kagame wari waracengeye iby’ubwiru n’itonde ry’abami.

Uyu mwami wategetse kugeza atanze mu 1895 ntiyigeze ajya imbizi n’abakoloni uhereye umunsi amenyeraho ko bamaze kugera mu bihugu bikikije u Rwanda.

Mu gitabo, Ibitaramo ku Mateka y’u Rwanda cyanditswe na Kagiraneza Zéphrin, avuga ko ubwo Rwabugili yamaraga kumenya ko abakoloni bamaze gusesekara mu bihugu bituranyi yahise atuma kuri Gashururu, Umwami w’u Bujinja ati “Uzabanyoherereze mbahake bambohere imyenda“ maze abakoloni bakamusubiza bagira bati “Tuzashyira tuze.”

Mu 1894, Umudage witwa Graf Von Gotsën wayoboraga Afurika Ndage y’Uburasirazuba yaje mu Rwanda maze ajya kureba Rwabugili mu rugo rwe rw’i Kageyo ka Kingongo aherekejwe n’abandi bazungu babiri n’ingabo z’abirabura 620.

Ubwo uyu muzungu yasuhuzanyaga urugwiro Rwabugili maze akamucugusa ukuboko nk’uko mu muco wabo babigiraga ku muntu bishimiye, Rwabugiri ntiyabikunze.

Icyo gihe yahise agira ati ”Kino kigabo cyasuzugura ye! Uratinyuka ukantigisa wa kinyamaswa we mu gihugu cyanjye? ” Icyo gihe Gotsën n’abo bari kumwe bahise berekeza i Congo ariko ntibasiga beruye ko u Rwanda rwamaze guhabwa Abadage mu nama yari yarabereye i Berlin mu 1884-1885 igabagabanya abakoloni b’Abanyaburayi ibihugu bya Afurika harimo n’u Rwanda.

Uruhu rw’abazungu, imyambarire yabo ndetse no kuba hari ababaga bafite imbunda byatezaga ihubi no gukangarana mu Banyarwanda batari babamenyereye bakavuga ko ari impinja zavutse uwo munsi kubera uruhu rwabo, ntizigire amano kuko babaga bambaye inkweto kandi bakaba batwaye imyuko (imbunda) banitwikiriye ibyibo (ingofero).

Mu gihe cy’ubutware bwa Rwabugili ni we wenyine wari ufite iri zina kuko yiyumvaga nka nyiri ububasha nk’uko igisobanuro cy’ijambo ‘ubugiri’ ari ‘ububasha’. Undi wari ufite iryo zina yari mwene Kabindi ka Nyarwaya Nyamutezi ariko na we aza kuryamburwa ahabwa Nyamahe nk’uko byagiriwe mwene Gaceyeye wo mu Benegitore wari na muramu w’umwami kugira ngo adakomeza kwitiranwa na nyir’u Rwanda.

Umwami Rwabugili yasuzuguraga cyane abazungu kugeza ubwo avuze ko ashaka kubahaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .