Umucuruzi wahombye, bagenzi be bamuganuze bamuhe igishoro – Bamporiki asobanura uko umuganura ukwiriye kujyana n’ibihe

Yanditswe na Umwali Zhuri
Kuya 7 Kanama 2020 saa 09:45
Yasuwe :
0 0

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yatangaje ko kuba kuri iyi nshuro umuganura ugomba kwizihirizwa mu miryango mu kwirinda ikwirakwira ry’icyorezo cya Coronavirus, bitari kure y’umuco nyarwanda kuko na mbere imbuto zajyaga ibwami zivuye mu miryango.

Kuri uyu wa Gatanu wa mbere w’ukwezi kwa Kanama, nk’uko bisanzwe ni umunsi w’ikiruhuko aho hizihizwa umunsi w’umuganura. Umuganura ufite umwihariko mu mateka y’u Rwanda rwo hambere! Wari umuhango ukomeye kuko wari mu nzira z’ubwiru, ukagira intego yo kwibutsa Abanyarwanda ko bakwiye kuzirikana ko basangiye igihugu kimwe, umuco umwe n’indangagaciro zimwe.

Wizihizwaga abantu basangira amafunguro yabaga yeze, bagahurira hamwe buri wese akazana icyo yejeje maze bakishimira ibyiza bagezeho. Gusa kubera icyorezo cya Coronavirus, ntabwo imihango yari isanzwe ikorwa iza kubaho, ahubwo abantu barasabwa kuganurira mu miryango yabo.

Mu kiganiro yagiranye na RBA, Bamporiki yasobanuye ko abanyarwanda bakwiye kugumana indangagaciro z’umuganura mu nyito, bakaganurira mu miryango banabijyanisha no kwaguka kwawo, bakabikora bijyanye n’igihe.

Ati ”Buriya iyo u Rwanda rwanda [rwaguka], n’indangagaciro z’u Rwanda ziranda, zigakura. Abakurambere bacu baganuraga amasaka, bakaganura imbuto, umwero wo ku mbuto ndetse n’umusaruro wo ku nka ariko uyu munsi tumaze kugira ibintu byinshi cyane dushobora kuganura no kuganuza. Dukoreshe ikoranabuhanga dufite, naryo u Rwanda rwatuganuje nk’igihugu, tuganuze abacu mu mpande zose z’igihugu no hanze yacyo.”

Yakomeje asaba abanyarwanda ko uyu muganura wababera igihe cyo kuganira mu miryango, abakuru bakaganiriza abakibyiruka babaha impanuro z’ubuzima bakwiriye kugenderaho.

Bamporiki avuga ko muri iki gihe cyo kuganura, bahera ku mwero, ku byo bejeje ariko bakabijyanisha n’aho igihugu kigeze, yaba kwishimira ikoranabuhanga, umutekano, ubuzima n’ibindi.

Ati “Imirimo buri munyarwanda akora, buri wese ashobora kuganuza. Niba njye ndi umuhanzi, ntabwo nshobora kwivura ariko uko umuganga amvura ni ko nshobora gukora igihangano kimwizihiza aruhuka. Urwo ruhurirane rw’impano zishingiye ku bwenge bwo mu muryango cyangwa ku buhanga twahashye, ni byo bigera muri iki cyumweru cya mbere cy’ukwezi kwa munani, tugakora umuhango w’abakurambere bacu wo kuganuzanya.”

Yakomeje avuga ko umuganura ukwiriye kuba umuhigo w’umwaka utaha, kugira ngo niba hari utejeje, ahige ko nawe umwaka uzakurikiraho azakora iyo byabaga akagira ibyo ageraho.

Ati “Buriya iyo tuvuga ngo utarejeje aganuzwe n’abejeje, bigera no mu bindi bintu byose. Umucuruzi wahombye, abacuruzi bagenzi be bashobora kumuremera bakamuganuza bakamuha igishoro umwaka utaha akazaba ari mu ngamba neza [...] ntabwo dushobora kurebera umuganura mu buryo abakurambere bawufataga icyo gihe, ni byo byari bihari ariko umurage ukomeye baduhaye, ni ubumwe, ni umurimo, ni ugukunda igihugu.”

Bamporiki avuga ko bigendanye n’iterambere, umuganuro w’abanyarwanda ugifite umwimerere, kuko batigeze bananirwa kuvangura ibyazanywe n’abakoloni n’ibyari bisanzweho mu muco wabo.

Ati “Uyu munsi amasaka avanze n’amasakaramentu kandi ubuzima bugakomeza. Ntabwo umuntu ashobora kuvuga ngo turasenga gusa ntabwo dushaka gutera imbere. Byose turabijyanirana kandi bigakunda ntibigire ikibazo. Igikomeye ntabwo ari amasaka, ntabwo ari ibishyimbo ahubwo ni intekerezo zibiri inyuma, ni ubumwe bw’abanyarwanda, gukunda igihugu, gukunda umurimo byavuye mu mudiho, kuko nicyo abakoloni bashakaga bamaze guca umuganura. Bashakaga ko iby’iwacu bisigara mu mvugo udashobora kubibona mu ngiro.”

Kuva mu muco wa kera no mu mateka y’igihugu, Umuganura ni umunsi mukuru ukomeye kandi wubahwa, wahabwaga agaciro gakomeye ibwami no mu muryango Nyarwanda muri rusange.

Umuganura wari umusaruro wa mbere w’imbuto zahinzwe, wakorerwaga ku mbuto za Gihanga ari zo amasaka, uburo n’inzuzi.

Kuganura kwari ugusubira ku isoko nk’Abanyarwanda, abaturage bakiyibutsa ko bahuje gakondo n’ibyiza byayo Imana yabahaye, bakayishimira. Ni yo mpamvu bayituraga igitambo mu byo yabahaye bahereye ku mbuto nkuru bejeje.

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yasabye abanyarwanda kwizihiza umunsi w'umuganura babijyanisha n'igihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .