00:00:00 IGIHE NETWORK KN KINYARWANDA EN ENGLISH FR FRANCAIS

Umunsi w’ururimi kavukire ugiye kwizihizwa herekanwa ibyakozwe mu kubungabunga Ikinyarwanda

Yanditswe na Akayezu Jean de Dieu
Kuya 12 Gashyantare 2021 saa 05:54
Yasuwe :
0 0

Ubuyobozi bw’Inteko y’Umuco bwatangaje ko ibikorwa bijyanye no kwizihiza ku nshuro ya 18 Umunsi Mpuzamahanga w’Ururimi Kavukire uzaba ku Cyumweru tariki ya 21 Gashyantare 2021, bizaba hifashishijwe ikoranabuhanga bitandukanye n’uko byari bisanzwe bikorwa, mu rwego rwo kubahiriza ingamba zo kwirinda ikwirakwira rya COVID-19.

Insanganyamatsiko y’uyu mwaka igira iti ‘Ururimi rw’Ikinyarwanda, umusingi w’ubumwe n’agaciro by’Abanyarwanda’ mu gihe ku rwego rw’Isi, hatoranyijwe igira iti ‘Duharanire guteza imbere indimi nyinshi nta ruhejwe mu burezi no mu muryango’.

Itangazo ryashyizweho umukono n’Umuyobozi Mukuru w’Inteko y’Umuco, Ambasaderi Masozera Robert, rivuga ko mu gihe isi muri rusange yugarijwe n’icyorezo cya Covid-19, uyu munsi uzizihizwa hifashishijwe iyakure (Online).
Ibikorwa biteganyijwe

Ubuyobozi bw’Inteko y’Umuco kandi bwatangaje ko umunsi nyirizina uzabimburirwa n’icyumweru cyo kwizihiza Umunsi Mpuzamahanga w’Ururimi Kavukire 2021.

Muri icyo cyumweru hateganyijwe ibikorwa birimo kuba Minisiteri y’Urubyiruko n’Umuco ibinyujije mu Nteko y’Umuco izagaragariza Abanyarwanda ibyagezweho mu rwego rwo gusigasira no guteza imbere Ikinyarwanda nk’ururimi rw’Igihugu n’Ururimi rw’ubutegetsi.

Hazibandwa cyane ku ngamba zo gushishikariza abakoresha n’abahugura Ikinyarwanda nk’abarezi, abanyamakuru, abashakashatsi, abanyeshuri n’Abanyarwanda muri rusange gukoresha Ikinyarwanda kinoze no kugiha agaciro.

Iki cyumweru kandi kizarangwa n’ibiganiro bigenewe Abanyarwanda baba mu Gihugu n’ababa mu mahanga (Diaspora).

Ibiganiro bizagaruka ku guhuza imyigishirize y’Ikibonezamvugo cy’Ikinyarwanda mu mashuri, kizibanda ku ruhare rw’umuhanzi n’umunyamakuru mu gusigasira no guteza imbere Ikinyarwanda n’indangagaciro z’umuco w’u Rwanda.

Iki cyumweru kandi kizarangwa n’inama nyunguranabitekerezo izagaruka ku ngamba zo gukungahaza ururimi rw’Ikinyarwanda mu ngeri zose z’ubumenyi, izagaruka cyane cyane ku Kinyarwanda n’ikoranabuhanga, ubuhanzi n`ubuvanganzo, Ikinyarwanda n’itunganyandimi, amuga n’ikibonezamvugo by’Ikinyarwanda.

Umunsi nyirizina uzarangwa n’ibihangano gakondo bya muzika, ikinamico n’ubuvanganzo nyemvugo by’Abanyarwanda no gutangaza abatsindiye ibihembo bitandukanye.

Inteko y’Umuco ishishikariza Abanyarwanda kuzirikana ko Ikinyarwanda ari ingobyi y’umuco, kikaba ipfundo ry’ubumwe abenegihugu basangiye “n’ishingiro ry’isano dufitanye aho turi hose; kikaduha kugira icyerekezo kimwe.”

Abanyarwanda bafite amahirwe yo kuba bavuga ururimi rumwe rwabo kavukire rukabahuza n’umuco wabo ukabaranga. Ikinyarwanda kandi gifasha kwihutisha imigabo n’imigambi by’iterambere kuko ari umuyoboro w’ubumenyi, ikoranabuhanga n’ubuhanzi.

Kwizihiza Umunsi Mpuzamahanga w’Ururimi Kavukire bijyanye no kurushaho kwita ku Kinyarwanda, gutekereza ku kamaro kacyo, buri wese agahagurukira kugikoresha neza mu byo avuga no mu byo yandika.

Ishami ry’Umuryango w’Abibumbye ryita ku Bumenyi, Uburezi n’Umuco (UNESCO) niryo ryashyizeho Umunsi Mpuzamahanga w’Ururimi Kavukire mu mwaka w’i 1999.
Inama Rusange y’Umuryango w’Abibumbye na yo mu mwanzuro wayo A/RES/61/266 wo mu kwezi kwa Gicurasi 2000, yashyizeho itariki 21 Gashyantare kuba Umunsi Mpuzamahanga w’Ururimi Kavukire.

Mu Rwanda, Ikinyarwanda cyemewe n’Itegeko Nshinga nk’Ururimi rw’Igihugu ndetse n’Ururimi rw’Ubutegetsi.

Indirimbo yubahiriza Igihugu na yo irubona nk’umusingi w’ubumwe n’agaciro by’Abanyarwanda aho igira iti “Umuco dusangiye uraturanga, ururimi rwacu rukaduhuza”.

Leta y’u Rwanda yashyizeho Inteko y’Umuco nk’Ikigo cy’Igihugu gishinzwe kurengera, kubungabunga no guteza imbere ururimi rw’Ikinyarwanda nk’uko bigaragara mu Iteka rya Perezida no 082/01 ryo ku wa 28/08/2020 rishyiraho Inteko y’Umuco.

Iterambere ry'Ikinyarwanda rizaturuka ku ikoreshwa ryacyo haba mu mashuri, mu buhanzi n'ahandi
Inteko y'Umuco igaragaza ko ari byiza gutoza abakiri bato gukoresha Ikinyarwanda nka rumwe mu ndimi kavukire zikungahaye ku isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .