Abanditsi nyarwanda biyemeje gushyiraho ikigega giteza imbere ubwanditsi

Yanditswe na Ferdinand Maniraguha
Kuya 7 Kanama 2020 saa 10:25
Yasuwe :
0 0

Abanditsi bahuriye mu rugaga rw’abanditsi mu Rwanda, Rwanda Writers Federation biyemeje gushyiraho ikigega kizajya kibafasha gukemura bimwe mu bibazo by’amikoro bahura nabyo.

Akenshi abanditsi nyarwanda bagiye bataka ubushobozi buke butuma batabona uko basohora ibitabo byabo neza cyangwa ngo babigeze ku babikeneye bose.

Mu nama y’Inteko rusange y’urwo rugaga yateranye kuri uyu wa Kane, abagize urwo rugaga biyemeje gushyiraho ikigega kizajya gifasha abadafite ubushobozi buhagije no guterana inkunga mu gihe hari ikibazo.

Umuyobozi w’urugaga rw’abanditsi mu Rwanda, Hategekimana Richard yavuze ko icyo kigega nikiramuka kigiyeho kizafasha mu gukemura bimwe mu bibazo abanditsi bajyaga bahura nabyo.

Yagize ati “Iki kigega kigamije guhuza ubushobozi kugira ngo ibibazo by’amikoro make y’abanditsi gikemuke. Ni ikigega kizafasha kwimakaza umuco wo gusoma no kwandika ibitabo, gufasha abanditsi kunoza ibyo bakora, gufasha abanditsi kubabonera isoko ry’ibitabo, gufasha abanditsi gusohora ibitabo byabo no kongera ubumenyi bw’abanditsi.”

Nubwo nta gihe ntarengwa cyatanzwe cyo kuba icyo kigega cyagiyeho, hagaragajwe ko gikwiriye kujyaho vuba kugira ngo gifashe mu iterambere ry’abanditsi b’ibitabo mu Rwanda.

Umuyobozi ushinzwe Ikinyarwanda no guteza imbere ubwanditsi mu Nteko Nyarwanda y’Ururimi n’Umuco (RALC), Munyazikwiye Théogène, yavuze ko ku ruhande rwa Leta naho hari gahunda ziri kwigwaho zigamije gufasha abanditsi gutera imbere.

Yagarutse ku kibazo cy’uburyo gusohora ibitabo bihenda mu macapiro ndetse no kuba inzu zishinzwe gufasha abahanzi kwandika ibitabo (Publishing House) usanga zidafite ubushobozi bwo kubikorera ababyifuza bose.

Munyazikwiye yavuze ko hari gutekerezwa uko hashyirwaho inzu nyarwanda ifasha mu kwandika ibitabo (Rwanda Publishing House) izajya yorohereza abanditsi nyarwanda cyane cyane abari mu rugaga. Yavuze ko biri muri gahunda za vuba za Leta.

Hategekimana uyobora urugaga yasabye abafatanyabikorwa gushora imari yabo mu bwanditsi, kugira ngo abanditsi barusheho kwandika ibitabo biteza imbere kandi binasigasira amateka n’umurage by’u Rwanda, ari nako bibatunga.

Muri iyo nama hafatiwemo indi myanzuro itandukanye irimo kwemeza abanyamuryango b’icyubahiro barimo Ingabire Immaculee (Chairperson), Mugesera Antoine, Prof.Byanafashe Déo, Dr Ndushabandi Eric, Lt.Col Nyirimanzi Gerard, Kajuga Jérôme, Barore Cléophas, Mushimiyimana Eugenie,Munyazikwiye Théogene na Prof Kigabo Thomas.

Urugaga nyarwanda rw’abanditsi rugizwe n’imiryango irimo Rwanda Writers Organization, RwandaAuthors for Change Organization na Rwanda Young Writers Organization.

Bamwe mu banditsi n'abafatanyabikorwa babo bitabiriye inteko rusange y'urugaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .