CNLG yasohoye ibitabo bigaragaza ubugome Jenoside yakoranywe muri Cyangugu na Gitarama

Yanditswe na Habimana James
Kuya 28 Gashyantare 2020 saa 10:46
Yasuwe :
0 0

Komisiyo y’Igihugu yo kurwanya Jenoside, CNLG, yasohoye ibitabo bitatu bigaragaza amwe mu mateka mabi ya Jenoside yakorewe Abatutsi cyane cyane muri Perefegitura ya Gitarama n’iyahoze ari Cyangungu, harimo n’ubuhamya bw’uburyo abasirikare b’Abafaransa bafataga Abatutsi ku ngufu.

Kuri uyu wa Kane nibwo CNLG yagaragaje ibi bitabo, hakaba harimo kimwe gikubiyemo ubuhamya bw’uburyo Abatutsi batotojwe guhera mu 1973 bakanirukanwa mu mashuri.

Ubu bushakashatsi bwakozwe na CNLG ibifashijwemo n’abashakashatsi bayo barimo Mafeza Faustin wakoze ubushakashatsi kuri Jenoside yakorewe Abatutsi muri Perefegitura ya Gitarama, Nikuze Donatien, we yakoze ubushakashatsi kuri Jenoside yakorewe Abatutsi mu yahoze ari perefegitura ya Cyangungu, naho Ntashamaje Gérard we yashyize hamwe ubuhamya.

Nko muri Cyangungu, ubu bushakashatsi bugaragaza uburyo Ingabo z’Abafaransa zari muri ako gace zarebeyereye Interahamwe zicaga Abatutsi, ariko zinakora n’amahano yo gufata Abatutsi ku ngufu no kubakorera ibindi bikorwa bya kinyamanswa.

Uyu mushakashatsi agaragaza ko Abafaransa bageze mu Nkambi ya Nyarushishi aho bagomba kurinda impunzi z’Abatutsi, nyamara bakomeje gukorerwa ubwicanyi.

Agaragaza ko impunzi muri iyi nkambi zahabwaga ibiryo ariko nta nkwi zo kubitekesha, kandi ko byari ihame ko impunzi zijya hanze y’inkambi gushakisha inkwi, uwasohokaga wese Interahamwe zahitaga zimwica abasirikare b’Abafaransa bareba.

Abafaransa mu bikorwa byo gusambanya Abatutsi

Iki gitabo kigaragaza ko Abafaransa baje muri Opération Turquoise bageze i Nyarushishi, batambagijwe inkambi yose, ari nako bagenda bafata amafoto.

Bugaragaza ko nyuma y’iminsi igera kuri itatu, bari bamaze kumenya ahaherereye abagore n’abakobwa, maze batangira kujya baza kubatwara bakajya kubasambanya ku ngufu, mu gihe bari bashinzwe kubarinda.

Uwitwa Kambogo Constance watanze ubuhamya yagize ati “Abafaransa bafataga abakobwa ku manywa y’ihangu bakabasambanya, bazaga mu nkambi bakazenguruka, bakagenda basohora abakobwa muri za burende, maze bagatoranya abo bashaka, babeshya ko ari abo kujya kubakorera isuku.”

“Ibyo ariko twaje kumenya ko byabaga ari ibinyoma, ko ahubwo babaga bagiye kubasambanya ku ngufu. Mu kubatoranya bavugaga ko bakeneye abakobwa bafite mu nda hato n’amabere mato. Bamara gutoranya abo bishimiye, bahitaga babajyana mu mahema yabo, babagezayo bakabasambanya ku ngufu, abana bakagaruka bataye umutwe.”

Avuga ko mu basambanyijwe ku ngufu i Nyarushishi harimo uwitwa Claudine wari ufite hagati y’imyaka 14 na 15. Kumusambanya ku ngufu byamuviriyemo guhungabana kugera abaye nk’umusazi.

Bakorerwaga kandi ibikorwa by’ubunyamaswa birimo kubashyiramo urusenda, kubasambanya mu kanwa, mu kibuno, bakabafata amafoto babambitse ubusa n’ibindi.

Yagaragaje ko abarangije kubasambanya bahitaga babahererekanya biyamira ko ari beza, ko batandukanye n’abakobwa n’abagore b’iwabo.

Avuga ko uretse mu Nkambi ya Nyarushishi, Abafaransa basambanyije ku ngufu abagore n’abakobwa ku Kibuga cy’Indege cya Kamembe, kuri Stade Kamarampaka n’ahandi.

Uwitwa Habimana Jean Bosco wari Interahamwe, avuga yari asanzwe akorana bya bugufi n’abasirikare b’Abafaransa, dore ko bari baramuhaye n’imbunda.

Yavuze ko Abafaransa bari muri Stade bamusabye kubashakira abakobwa bo gusambanya.

Muri Perefegitura ya Gitarama, ubu bushakashatsi bugaragaza ko abatutsi benshi bahungiye i Kabgayi bazi ko ariho bazabona umutekano. Byaje kugaragara ko bahungiye ubwayi mu kigunda, kuko abari bagize komite y’umutekano muri Perefegitura ya Gitarama hamwe na ba Burugumesitiri bajyanaga lisiti y’Abatutsi bagomba kwicwa, bakabapakira amabisi bakajya kubicira muri Ngororero.

Guhera mu matariki ya 20 Mata 1994, buri munsi ngo hazaga amabisi yo gutwara Abatutsi bajyaga kwicirwa ku Cyome ku ruzi rwa Nyabarongo, ahahoze ari Komini Kibilira na Satinsyi.

Hari n’abandi Batutsi biciwe mu mashyamba yari hafi ya Kabgayi. Mu makomini ya Ntongwe na Mugina, Abatutsi baho bishwe n’Interahamwe zifatanije n’abasirikare baturutse mu kigo cya gisirikare i Gako n’impunzi z’Abarundi.

Bugaragaza ko bishwe urw’agashyinyaguro, kuko impunzi z’Abarundi zavanagamo imitima y’Abatutsi zimaze kwica zikayotsa.

Kwicwa urw’agashinyaguro byabereye ahantu hatandukanye, nko muri Komini Musambira, Segiteri ya Nyarubaka aho ababyeyi basabwe guhamba abana babo b’abahungu ari bazima, bikozwe n’uwari ukuriye Interahamwe y’umugore witwa Mukangango.

Umunyamabanga Nshingwabikorwa wa Komisiyo y’Igihugu Ishinzwe kurwanya Jenoside (CNLG), Dr Bizimana Jean Damascène, yavuze ko gukora ubu bushakashatsi bifasha cyane cyane abakiri bato kumenya amateka yaranze igihugu cyabo, no kumenya ko bafite inshingano yo guhangana n’abakomeje kubiba urwango.

Yagize ati “Icya mbere ubu bushakashatsi CNLG ikora bugaragaza uko Jenoside yateguwe ikanashyirwa mu bikorwa bifasha urubyiruko kumenya amateka kuko abenshi bari bataravuka cyangwa bakaba bari bakiri batoi”

“Bibafasha kumenya umwihariko wa buri karere, nubwo yateguwe mu gihugu cyose ariko usanga buri gace gafite ubugome bwahakorewe, ikindi ni ukugira ngo bamenye icyo leta y’ubumwe bw’abanyarwanda yakoze kandi bafate n’ingamba zo kubisigasira kuko haracyari abantu bakirangwa n’ingebitekerezo ya Jenoside batarava muri urwo rwango.”

CNLG yizeye ko ibi bitabo bizafasha kwerekana ko abahakana Jenoside yakorewe Abatutsi babeshya.

Abantu batandukanye bitabiriye imurikwa ry'ibi bitabo
Abashakashatsi batundukanye bafashije CNLG gushyira hanze ibi bitabo
Hgaragajwe igitabo kivuga kuri Jenoside yakorewe Abatutsi muri Cyangungu
Iki gitabo cyo kiravuga kuri Jenoside yakorewe Abatutsi muri Gitarama
Senateri Dr Emmanuel Havugimana yatanze ni umwe mu batanze ubuhamya bw uburyo bahohotewe bakanirukanwa mu mashuri
Umunyamabanga Nshingwabikorwa wa Komisiyo y'Igihugu Ishinzwe kurwanya Jenoside CNLG Dr Bizimana Jean Damascene yavuze ko ubu bushakashatsi bufasha cyane abakiri bato
Umunyamabanga wa leta muri Minisiteri y urubyiruko n'umuco Bamporiki Edouard yitabiriye imurikwa ry'ibi bitabo bya CNLG

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .