00:00:00 IGIHE NETWORK KN KINYARWANDA EN ENGLISH FR FRANCAIS

Inkovu y’umutwe mwasatuye si uburanga navukanye, ntimukadutoneke- Kayitesi Judence

Yanditswe na Karirima A. Ngarambe
Kuya 10 Gashyantare 2021 saa 11:17
Yasuwe :
0 0

Umwanditsi Kayitesi Judence yanditse igitabo kiva imuzi ubuzima busharira yanyuzemo muri Jenoside yakorewe Abatutsi mu 1994, yahitanye ubuzima bw’inzirakarengane zisaga miliyoni mu mezi atatu gusa.

Kayitesi wavukiye muri Rutongo muri Gasabo kuri ubu atuye mu Budage guhera mu mwaka wa 2010 aho yageze nyuma yo kurokoka Jenoside yakorewe Abatutsi mu 1994, yiciwemo ababyeyi be bombi n’abavandimwe babiri.

Uyu mubyeyi w’imyaka 38, afite abana batatu barimo abahungu babiri b’imyaka 13 na 12 n’umukobwa w’imyaka 15 arera nk’umwana we.

Mu kiganiro cyihariye IGIHE yagiranye na Kayitesi, yavuze ko yanyuze mu bihe bikomeye ari nabyo byashibutsemo icyemezo cyo kwandika ayo mateka.

Yagize ati ‘‘Ntabwo byoroshye kuvuga amateka twaciyemo ariko tuzajya tubikora kuko ni bwo buryo bwo gusubiza abadutse muri ibi bihe byo gupfobya Jenoside yakorewe Abatutsi. Ese iyi nkovu y’umutwe wanjye basatuye ni uburanga navukanye?’’

Aya mateka avuga ko yayashyize mu gitabo yise ‘‘Ein zebrochenes leben’’ mu Rurimi rw’Ikidage, ari byo ‘‘Broken life’’ mu Cyongereza, bikaba bisobanura ‘‘Inzira y’Inzitane’’.

Mu buhamya bwe yavuze ko muri Jenoside yakorewe Abatutsi bamutemye mu mutwe ata n’ubwenge bimuviramo kugira ubumuga bwo kuvuga igihe kirekire ariko nyuma aza gukira.

Yakomeje ati ‘‘Bakimara kuntema ubwo nari mfite imyaka 11 twari mu bihe bikomeye, sinigeze mvurwa, igisebe cyaje kumera nabi, kubera kutitabwaho, aho twari mu mpunzi n’abandi bana bakavuga ngo n’ubundi nzapfa simvurwe. Nyuma babonye nkomeje gukomeza umutsi nibwo banshyizeho igipfuko batangira kubona ko ntahise mpfa. Byanteye ubumuga kuko nagize ubumuga bwo kutavuga nkajya mvuga nkoresheje amarenga, nari mfite ubwoba bwo kutazabasha kuvuga ibyo nabonye.’’

‘‘Ni bwo ngize amahirwe mbishyira mu gitabo kugira ngo abana be batazajya babaza amateka y’iwabo. Bizaba n’uburyo bwo kwerekana ubukana bw’abateguye bakanashyira mu bikorwa Jenoside yakorewe Abatutsi.’’

Kayitesi yavuze ko ikintu kimubabaza cyane ari uko abishe abantu banajugunye amafoto kuko basazabe be babiri barokokanye bahora bamubaza uko ababyeyi babo basaga.

Ati ‘‘Duhora twibaza buri munsi uko babyeyi bacu basaga, ugasanga hari nka musaza wanjye muto ambwira ngo wowe uri nka Mama kuko numva musa n’ibindi byinshi twibaza tutajya tubonera ibisubizo.’’

‘‘Tukiva muri Jenoside, najyaga njya kwa Rubangura nkategereza Mama ko namubona asohotse muri bisi, ibyo nabikoraga ntawe mbwiye. Umugore wese nabonaga yambaye igitenge naramukurikiraga ngasanga si we, kuko numvaga ko Mama wanjye atapfa.’’

Mu kubara inkuru, yavuze ko yemeye ko umubyeyi we yishwe ubwo yabyaraga ntajye kumuhemba.

Akomeza ati ‘‘Byari bikomeye kuri njye kubyara imfura yanjye ntahabe. Kuva icyo gihe rero narabyemeye rwose.’’

Kayitesi yahisemo kwandika ashaka ko abana be bazamenya amateka ababyeyi babo banyuzemo ndetse n’igihugu.

Ati ‘‘Sinigeze nibaza ko nzamara iyi myaka 27 nyuma ya Jenoside yadukorewe, maze kubyara numva nkunze ubuzima, kubona abana banjye bakura nabo bakazabyara nibwo batangiye kujya bambaza amateka y’iwabo kwa ba se na sekuru na ba nyirakuru. Nafashe icyemezo cy’uko nta wundi wayababwira atari njye, ni ko kwandika iki gitabo kandi nari nsanzwe ntandika.’’

Yakomeje avuga ko nyuma yo kubyara abana bajyaga bamubaza ibibazo bikorogoshora ngo kuki batabona ba sekuru.

Ati “Na nyuma yaho ntangiye ubuhamya mu 2018 mu ruhame mu gihe cyo kwibuka, nahise mfata icyemezo byanyongereye imbaraga zo gukomeza kwandika igitabo.”

Kayitesi avuga ko kwandika igitabo byari ugutanga umusanzu we kugira ngo bitazongera kubaho ukundi haba mu Rwanda n’ahandi.

Yatangaje ko yifuza ko urubyiruko rwagisoma rukamenya amateka igihugu cyanyuzemo kugira ngo ntiruzagwe mu mutego nk’uwo bagenzi babo baguyemo.

Iki gitabo cyanditse mu buryo bworoheje kuko buri wese wagize ibihe bikomeye azibonamo.

Kayitesi avuga ko igitabo cye kizasohoka no mu Cyongereza hanyuma hagakurikiraho Igifaransa n’Ikinyarwanda

Umwanditsi Kayitesi Judence yanditse igitabo kiva imuzi ubuzima busharira yanyuzemo muri Jenoside yakorewe Abatutsi mu 1994
Kayitesi Judence asobanura ibyerekeye igitabo yanditse
Muri Jenoside yakorewe Abatutsi, Kayitesi Judence, yatemwe mu mutwe ata n’ubwenge bimuviramo kugira ubumuga bwo kutavuga igihe kirekire ariko nyuma aza gukira

[email protected].com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .