Manzi Rugirangoga yanditse igitabo La légende d’Havilah kivuga ku buzima bwe muri Jenoside yakorewe Abatutsi

Yanditswe na Karirima A. Ngarambe
Kuya 26 Ukuboza 2020 saa 08:44
Yasuwe :
0 0

Manzi Rugirangoga, umusore w’imyaka 28 utuye mu Bufaransa i Lyon yanditse igitabo yise ‘La légende d’Havilah, Œuvre Fantastique Afro-futuriste rwandaise’ kigaruka ku mateka yanyuzemo muri Jenoside yakorewe Abatutsi, aho benshi mu muryango we bishwe.

Iki gitabo cya Rugirangoga cyasohowe n’inzu ye itunganya ibitabo, Maison d’Edition Elimu. Cyanditse mu buryo bw’ibarankuru (fiction), aho avuga amateka ashaririye yanyuzemo by’umwihariko ajyanye na Jenoside yakorewe Abatutsi.

Mu kiganiro na IGIHE avuga ku mpamvu yanditse iki gitabo, Rugirangoga yagize ati “Nari mfite imyaka ibiri nibwo nabashije kurokoka mpungira mu Bufaransa, nkomeza kujya nibaza byinshi nti kuki ari twe byabayeho? Mu bitekerezo byanjye hakagarukamo kenshi kuki ? Kuki ari twebwe tugirirwa ubugome butagira ubutabera, ibi byose bigaragara mu gitabo cyanjye.”

Uyu musore wiciwe abarimo mama we muri Jenoside, yavuze ko yanditse iki gitabo ashaka gufasha abandi bari mu kigero cye gukunda gusoma no kwandika, gusobanukirwa amateka ariko by’umwihariko gushishikariza Abanyarwanda kwiyandikira amateka yabo.

Ati “ Njye n’urungano rwanjye twakuze tubona ibitabo by’amashusho n’amafilimi y’Abanyamerika n’Abayapani, kuburyo najyaga nibaza uko bo babigenza ngo basangize abandi umuco wabo gutyo bikatugiraho ingaruka, tukabikunda kandi turi Abanyarwanda cyangwa Abanyafurika muri rusange. Nibwo nagize nti natwe ibi twabikora kuko dufite amateka yo kuba twavuga iwacu tubwira Isi.”

Manzi Rugirangoga yavuze ko kwandika byamufashije kuruhuka mu mutwe, no kumva atari wenyine kuko ibimurimo aba abisangije abandi.

Yavuze ko Abanyarwanda n’Abanyafurika bakwiriye kwandika amateka yabo kandi ko bidakomeye nkuko bamwe babikeka.

Ati “ Ntibyoroshye ariko birashoboka kuko icya mbere ni ugutangira ukabishyira ku rupapuro. Nubwo wabikora ukajya ubyihorera ariko ukazagaruka kongera, ariko nturekere iyo. Nk’iki gitabo nacyanditse imyaka myinshi. Kwandika bisaba gukunda gusoma no kwandika kandi bifungura n’ibitekerezo. Kwandika ni ukwemera gukora amakosa kandi ugafata umwanya wo kuyakosora , ukagira ukwihangana muri wowe cyane.”

Manzi Rugirangoga yize amashuri yisumbuye mu Rwanda, ajya kwiga uburezi muri Kaminuza yo mu Bufaransa. Kubera inzu yandika ibitabo ‘Elimu’ yashinze mu Rwanda, bituma ahaza kenshi.

Yavuze ko yifuza ko inzu ye y’ibitabo yazaba inzu ikomeye kandi ifasha benshi mu bandika haba mu Rwanda no muri Afurika.
Yavuze ko nubwo La légende d’Havilah aricyo gitabo asohoye bwa mbere, atari cyo cya nyuma kuko azasohora ibindi byinshi.

Igitabo cya Manzi Rugirangoga uwagishaka yagisanga hano: La légende d’Havilah

Reba ikiganiro IGIHE yagiranye na Manzi Rugirangoga

Manzi yavuze ko kwandika igitabo bigamije gushishikariza Abanyarwanda kwandika amateka yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .