Mfuranzima yanditse igitabo ‘Speech demanding Future’, kigaruka ku byifuzo urubyiruko rwa Afurika rufite

Yanditswe na Ferdinand Maniraguha
Kuya 6 Kanama 2020 saa 05:12
Yasuwe :
0 0

Umwanditsi Mfuranzima Fred yanditse igitabo ‘Speech demanding Future’ kijya mu ntekerezo z’urubyiruko rwo muri Afurika n’ibyo rwifuza ngo ejo harwo habe heza.

Iki gitabo kiri mu buryo bw’ibarankuru, kikaba kivanze n’imivugo bikangura ibitekerezo by’urubyiruko, bikanatanga umukoro ku bashinzwe kureberera urubyiruko muri Afurika.

Mfuranzima yabwiye IGIHE ko ajya kwandika iki gitabo, nk’urubyiruko yihereyeho akareba ibyo urubyiruko rwifuza ngo ejo harwo habe heza akabihuza nuko abona urubyiruko rufatwa hirya no hino.

Yavuze ko kubera politiki ziriho muri Afurika, hari aho urubyiruko rugera rukiterera icyizere ari nayo ntandaro y’abafata inzira bakajya gushakishiriza ubuzima mu mahanga, bamwe bakanahura n’ingorane muri iyo nzira.

Ati “Iyo urebye Afurika, nabigereranya nuko abantu ba kera basa nk’abaharaniye kwigenga ariko ubu urubyiruko turi gusa nk’abaharanira kwigendera, tukava aha kubera ibibazo bareba bakabona gukemuka biravunanye.”

“Igitabo kigamije kwerekana ibyo urubyiruko rwifuza kugira ngo igihugu cyangwa umugabane wacu ubimenye kuko nitwe Rwanda cyangwa Afurika y’ejo.”

Mfuranzima yizeye ko igitabo cye kizakebura urubyiruko ndetse n'abarufite mu nshingano ku Mugabane wa Afurika

Mfuranzima yavuze ko igikenewe ari uko abayobozi bo muri Afurika bashyira urubyiruko muri gahunda zabo ku buryo narwo rugira uruhare mu birukorerwa.

Yavuze ko ibyo bizarurinda kwiyumvamo ko ibikorwa atari ibyabo ari nacyo gituma akenshi bashaka kwigendera.

Yasabye kandi ko uburezi bwo muri Afurika buvugururwa ku buryo urubyiruko rwigishwa ibigezweho, bizarufasha kwiteza imbere no guhangana n’abandi ku isoko mpuzamahanga.

Mfuranzima yavuze ko igitabo ‘Speech demanding Future’ gishyirwa mu nzu zicuruza ibitabo vuba hirya no hino mu gihugu.

Igitabo ‘Speech demanding Future’ cyanditse mu buryo bw'ibarankuru ariko havanzemo n'imivugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .