00:00:00 IGIHE NETWORK KN KINYARWANDA EN ENGLISH FR FRANCAIS

Mushikiwabo yashyikirije igihembo Mpuzamahanga umwanditsi Béata Umubyeyi Mairesse

Yanditswe na Karirima A. Ngarambe
Kuya 24 Werurwe 2021 saa 08:12
Yasuwe :
0 0

Tariki ya 20 Werurwe 2021, Umunyamabanga Mukuru w’Umuryango Mpuzamahanga w’Ibihugu bikoresha Igifaransa (OIF), Louise Mushikiwabo, yashyikirije Umwanditsi w’Ibitabo, Béata Umubyeyi Mairesse, igihembo cyiswe ‘‘Prix des Cinq Continents de la Francophonie’’ gihabwa umwanditsi wagaragaje umwihariko mu guteza imbere Igifaransa.

Umubyeyi yahawe iki gihembo abikesha igitabo cye yise ‘‘Tous tes enfants dispersés’’, bishatse kuvuga ‘‘Abana bawe bose batatanye’’.

Mu kiganiro cyihariye aherutse kugirana na IGIHE, Umubyeyi Mairesse yavuze ko yishimiye guhabwa igihembo kuko ari ingenzi mu mwuga we wo kwandika ibitabo.

Yavuze ko umuhango wo kumushyikiriza igihembo wagenze neza, by’umwihariko akaba yarashimishijwe n’ijambo rya Louise Mushikiwabo rijyanye n’insanganyamatsiko y’Umunsi w’Umuryango Mpuzamahanga w’ibihugu bikoresha Igifaransa (OIF) igira iti “Femmes résilientes”.

Umubyeyi yavuze ko yaboneyeho n’umwanya wo gusangiza abitabiriye ibice by’inyandiko zo mu gitabo cye ‘ Tous tes enfants dispersés ‘aherekejwe n’umunyeshuri Adrian Grosu wiga mu mashuri yisumbuye i Paris.

Louise Mushikiwabo yavuze ko iki gitabo kije gihurirana n’umunsi mpuzamahanga w’Umugore wizihirijwe hamwe n’uw’Umuryango Mpuzamahanga w’Ibihugu bikoresha Igifaransa (OIF).

Yavuze ko icyo gitabo cyandikanye ubuhanga mu Gifaransa harimo n’amateka yo mu Rwanda.

Ati “Ni igitabo gihuza Igifaransa ndetse usangamo n’amateka yo mu rurimi kavukire y’igihugu cyanjye kimwe na Umubyeyi wacyanditse. Kuri njye rwose iki gitabo ni cyiza cyane. Birashimishije kubona Ikinyarwanda kiri kumwe n’Igifaransa umujyo umwe birashimishije cyane. Nakunze uburyo izi ndimi zombi umwanditsi Umubyeyi yazisobanuye bijyanye n’umwimerere wa buri rurimi.”

Yongeyeho ati “Iki gitabo sinagisomye gusa ahubwo nariyongeje. Nari mu ndege mva i Bruxelles njya i Kigali, nkirangiza rwose tugeze mu kirere cya Sudan ndakeka, nari natwawe nacyo kuko ni igitabo cy’amateka y’ubuzima, ni amateka yo kwihagararaho, amateka yo gucika intege, ni amateka y’ibice byinshi by’Isi, amateka y’akababaro n’urukundo, ni igitabo nakunze.”

Mushikiwabo yavuze ko icyo gitabo cyamuhaye icyizere kuko gikungahaye kuri byinshi.

Uwo muhango kandi wabaye n’umwanya w’ibiganiro byayobowe na Nivine Khaled, Umuyobozi w’Ururimi rw’Igifaransa mu ruhurirane rw’imico y’ibihugu bigize OIF na Paula Jacques uhagarariye akanama gahitamo abahembwa.

Prix des Cinq Continents de la Francophonie ni igihembo gihabwa abagaragaje ubuhanga mu buvanganzo mu bihugu bigize OIF, cyatangiye gutangwa mu 2001 bigizwemo uruhare n’Umuryango Mpuzamahanga w’ibihugu bikoresha Igifaransa (OIF).

Gihabwa umwanditsi wagaragaje umwihariko mu guteza imbere Ururimi rw’Igifaransa.

Indi nkuru wasoma: Béata Umubyeyi Mairesse yahawe igihembo ‘‘Prix des Cinq Continents de la Francophonie’’ (Video)

Louise Mushikiwabo ashyikiriza igihembo Umubyeyi
Umwanditsi Béata Umubyeyi Mairesse yavuze ko yashimishijwe n'igihembo yahawe
Mushikiwabo yavuze ko igitabo "Tous tes enfants dispersés" kirimo ubuhanga buhambaye mu buvanganzo
Nivine Khaled ni we wayoboye ibiganiro
Paula Jacques ni we wari uhagarariye akanama gahitamo abahembwa
Umunyeshuri Adrian Grosu wafashije Umubyeyi gusoma bimwe mu byanditse mu gitabo
Mushikiwabo na Umubyeyi bari kumwe n'abayoboye umuhango wo gutanga igihembo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .