Yaramamaye none afitiye gahunda Urwamubyaye

Yaramamaye none afitiye gahunda Urwamubyaye


Yanditswe kuya 3-02-2012 - Saa 20:49'

Umunyarwanda Kashfa Gashamura w’imyaka 22 amaze kumenyekana cyane kuri Televiziyo NRK yo muri Norvège, aho azwi nka Kash King Gashamura.

Usibye kuba akora ibiganiro bitandukanye by’abana kuri iyo televiziyo ya Norvège, rimwe na rimwe anyuzamo akanakina sinema.

Kash King avuka kuri Nyakwigendera Mungarurire Paul wari mu ngabo zabohoye u Rwanda ndetse nawe yari n’umunyamuziki kuko yacurangaga ‘guitar’. Yavuye mu Rwanda afite imyaka 2 gusa.

Umunyamakuru wa IGIHE.com, Elisée Mpirwa yahuye nawe ubwo yiteguraga gusubira muri Norvège maze bagirana ikiganiro gikurikira :

IGIHE.com : Ese mu Rwanda waba uri kuhakora iki ?

Kash King : Ndi gukora ‘documentary’ hano mu Rwanda izaba ivuga ku buzima bwanjye muri rusange, nkaba maze icyumweru ino. Ni amahirwe kuri jye kuko turi batanu gusa batoranyijwe ngo bakorerwe filime y’amateka yabo kuri Televiziyo nkoraho. Uwadufashije gukora izi filime azi ibyabaye mu Rwanda, cyane ko namubwiye n’amateka y’umubyeyi wanjye wagize uruhare mu kubohora u Rwanda.

IGIHE.com : Hanyuma se ko wahuye na Perezida Paul Kagame, mwaba mwaraganiriye iki ?

Kash King : Perezida Kagame aziranye na data wambyaye. Usibye n’ibyo kandi tujya tuvugana ku rubuga rwa Twitter. Urebye twaganiriye nk’abantu baziranye, tuvugana kuri Football twese dukunda, cyane cyane ku ikipe ya Arsenal twese tubereye abafana. (Aseka) Twagombaga kuganira iminota 10 ariko yabaye 50.

Kash King Gashamura (ibumoso) yakiriwe na Perezida Kagame

Namugejejeho kandi imishinga y’ibyo nshaka kuzakora mu Rwanda ndetse no mu gihugu mbamo cya Norvège.

IGIHE.com : Iyo mishinga uteganya ni iyihe ?

Kash King : Natumiye Perezida Kagame mu irushanwa “Norway Cup” rizaba muri Kanama, rikaba rihuza abana bari hagati y’imyaka 6 na 18 ari naryo rushanwa ry’umupira w’amaguru ryo muri uru rugero rikomeye ku Isi hose. Yanyemereye ko azaryitabira.
Kuko ibiganiro nkora bireba abana, Perezida nawe yanyijeje ubufasha tukazajyana abana b’Abanyarwanda kugirango nabo bazarushanwe, n’iyo batatsinda nta kibazo.

Hari indi gahunda mfite yo kuzubaka inzu yo gukiniramo ikinamico (Theatre) izashobora kwakira abantu barenga 1000 bagashobora gutarama bakanaseka. Ahanini icyo ngamije ni ugukora ibishoboka ngo mu Rwanda haboneka ababigize umwuga mu gukina ikinamico kandi nzi ko bizagerwaho.

IGIHE.com : Ese waba waratangajwe n’iki mu Rwanda ?

Kash King : Oh !U Rwanda rurashimishije rwose. Ruratera imbere ubutitsa kandi rurakeye pe ! Abantu baho barakeye kandi bazi kwakira abashyitsi.

IGIHE.com : Urakoze cyane kandi ugire urugendo ruhire.

Kash King : Namwe musigare amahoro kandi nzagaruka tugere kuri byinshi.

Kash King Gashamura avuga ko ashaka kwiga Ikinyarwanda kuko avuga Icyongereza n’Ikinyanoruveje (Norwegian), bityo nanagaruka gutangiza imishinga ye mu Rwanda bizamworohere kujya aganiriza Abanyarwanda.

Foto : Urugwiro Village

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO