Piano ya mbere ikoze mu mbaho yatangiye kubakirwa i Kigali

Yanditswe na Kanamugire Emmanuel
Kuya 14 Werurwe 2018 saa 01:15
Yasuwe :
3 3

Hari ku wa Gatanu mu masaha asatira igicamunsi ubwo IGIHE yasangaga Desiré Mulumeoderwa mu ibarizo rye (atelier) riherereye mu Mujyi wa Kigali. Amaze imyaka igera kuri 20 mu mwuga w’ububaji bw’ibikoresho byo mu nzu, yemeza ko afitemo ubuhanga.

Akorera ahantu hisanzuye usanga ibikoresho birimo ameza, intebe, ibitanda n’ibindi yatangiye gukora bitaruzura, ibice by’imbaho mu bipimo bitandukanye bitewe n’ibyo zizakoreshwa, izasagutse n’ibindi yifashisha mu kazi ke ka buri munsi.

Mu gihe kitari kirekire gishize, Mulumeoderwa yatangiye umushinga wo gukora piano yifashishije imbaho, yizeye ko mu mpera z’uyu mwaka azakabya inzozi akayishyira ahagaragara.

Uyu mushinga awufatanyije n’Umwongerezakazi, Marion Grace Woolley urebwa no gukora ibijyanye no guhuza ibice by’imbere muri piano mu gihe we ibigizwe n’imbaho abigeze kure.

Piano yahawe ikirango cya Kigali Keys, niyuzura izaba ari iya mbere ikorewe mu Rwanda n’iya mbere ku mugabane wa Afurika nyuma y’aho sosiyete y’Abadage yitwa Dietmann, yazikoreraga muri Afurika y’Epfo ifunze imiryango mu 1989.

Mulumeoderwa avuga ko urwego bagezeho rutanga icyizere ko piano yabo bazayirangiza kandi igakora neza.

Yagize ati “Tugeze ahantu tubona ko bishoboka, tugeze ku rwego rwo guhuza insinga zayo; ibikoresho hafi ya byose birahari; iby’imbaho na byo birahari, imisumari yo gufata insinga yose turayifite, ubu ikintu gisigaye ni ubwenge dushyiraho kugira ngo tuyishyire ahagaragara.”

Umubaji, Desiré Mulumeoderwa avuga ko afite icyizere ko mu mpera z'uyu mwaka bazamurika piano yakorewe mu Rwanda

Nubwo bimeze bityo ariko uyu mubaji avuga ko bafite imbogamizi z’uko hari ibikoresho bakenera ntibahite babibona bakajya kubishakisha mu mahanga (nko muri Kenya, u Budage n’u Bwongereza) ndetse bikabatwara amafaranga menshi.

Ati “Tugura akantu kamwe kamwe; kuri ubu imaze gutwara amafaranga menshi nubwo ntaramenya umubare. Hari ibikoresho Marion agura nanjye nkagura ibindi by’imbaho ariko ntiturajya hamwe ngo tubihuze turebe urwego tugezeho n’agaciro k’umushinga wose tuzakamenya turangije ni na bwo tuzamenya igiciro zizajya zigurishwaho.”

Igitekerezo cyo gukora piano cyavuye he?

Mu kiganiro IGIHE yagiranye na Marion Grace Woolley wadukanye igitekerezo cyo gukora piano, yavuze ko yagikomoye ku buzima yabayemo akigera mu Rwanda mu 2007 akabura aho akura piano yari yaramenyereye kuva mu buto bwe.

Kubona piano ‘electrique’ byarashobokaga kuri we kuko zo mu Rwanda zihaboneka ahubwo we yashakaga ikoze mu mbaho ‘stinged piano’.

Agishakisha aho yayikura, yabonye iyakorewe mu Burusiya yiswe ‘Lirika’ mu 1968 yagurishwaga n’Umunya-Misiri w’umwimukira.

Yamamazwaga ku madolari 1610 yari arenze ubushobozi bwe ariko afatirana ayo mahirwe arayigura, abitewe n’uko yari azi ko ntaho azabona nka yo mu Rwanda.

Marion yazanye iyo piano mu Rwanda mu Ukuboza 2016 ariko kubera kudakora neza, atangira kuyikora yifashishije amashusho yo kuri youTube n’ubundi bushakashatsi kuri internet.

Yagize ati “ Nakuriye ahantu haba piano nkayifata nk’igikoresho cy’ingirakamaro. Ngeze mu Rwanda natekereje kuyigura ariko nta wazicuruzaga. Nifashishije Umwimukira w’Umunyamisiri wari usubiye iwabo arayimbonera ndayizana kuko hari bimwe (keys) bitakoraga neza; nasanze mu gihe nshaka ko piano iba nzima ngomba gutangira kwiga kuyikora (kuyisana) ubwanjye.”

“Narebye amashusho kuri YouTube, nsoma ibitabo byinshi, nganira n’abantu benshi kuri internet. Ubwo nayirangizaga ikongera gukora, niyumvishije ko byaba ari ikintu gitangaje tugerageje gukora piano mu Rwanda.”

Marion Grace Woolley wadukanye igitekerezo cyo gukora piano mu mbaho

Iki gitekerezo Marion yakigejeje kuri Mulumeoderwa, biyemeza guhambura Lirika ngo barebe ibice byose biyigize bityo babashe kuyigiraho.

Uko Mulumeoderwa na Marion bahuje umugambi wo gukora piano

Mulumeoderwa umaze imyaka igera kuri 20 mu mwuga w’ububaji ngo afite ubuhanga bwo kubona ikintu cyose gikoze mu rubaho akabasha kucyigana.
Yavuze ko yageze aho Marion yari atuye bwa mbere amushyiriye ibikoresho byo mu nzu yari yaramukoreye ari nab wo yamugejejeho igitekerezo cyo gukora piano.

Ati “Namenyanye na Marion bwa mbere mukorera ibikoresho byo mu rugo. Yangejejeho igitekerezo cy’uko ashaka gukora piano turicara turaganira ngo turebe niba dushobora kuyikora kuko (ububaji) ari umwuga menyereye, si ukuwiga.”

“ Ibijyanye n’imbaho mbirebye nsanga nabikora na we yari yanyeretse ko ibijyanye no ‘guhuza intsinga’ yabikora. Twashatse ibitabo tureba uburyo piano ikorwa, nsanga ni ibintu byoroshye bitewe n’uburyo nagiye nsoma uburyo abandi bagiye babigenza, dushyiramo imbaraga cyane dutangira kuyikora.”

Guhera ubwo batangiye gucurisha icyuma gifungirwaho ibice by’imbere muri piano bituma ishobora gutanga amajwi (string frame) kuko babonaga ari cyo gikomeye kandi cy’ingenzi mu bigize piano. Icya mbere cyakozwe cyasohotse kitameze neza, hacurwa icya kabiri cyakorewe mu Mujyi wa Kigali haboneka igipima ibiro 67 bingana n’iby’icyari mu yo bigiraho.

Mulumeoderwa yakomeje abaza ‘igisanduku’ n’ama-touche ya piano (keys) n’ibindi byose bikenewe, ibindi bigenda bigurwa gahoro gahoro ku buryo yiteze ko izashyirwa ahagaragara mu imurikagurisha rya Made in Rwanda rizaba mu mpera z’uyu mwaka.

Ati “Uyu mwaka uzarangira twayirangije ni bwo tuzaba dushobora kwigisha abandi uburyo piano zikorwa. Ni ikintu kizagira akamaro muri gahunda ya Made in Rwanda kubera ko nta handi piano zikorewa.”

Iri gerageza rya piano Marion na Mulumeoderwa nirigera ku musozo, rizaba ari uburyo bwo kwereka abanyarwanda ko gukora piano bishoboka bikazaba binashoboka gutangiza ishoramari muri uru rwego.

Kugeza ubu hatangijwe ubukangurambaga bwo gushaka inkunga zo gushyigikira umushinga wo gukora piano mu Rwanda binyuze ku rubuga Indiegogo; hagamijwe gukusanya 7500$ kuva muri Werurwe 2017.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza