Umwanditsi w’Umunyarwandakazi Mukasonga Scholastique yegukanye kuri uyu wa Gatatu igihembo cyitiriwe Renaudot kubera igitabo aherutse gushyira ahagaragara yise "Notre-Dame du Nil".

Nyuma y’igihembo cyitiriwe Ahmadou-Kourouma muri Mata mu muhango wabereye ahitwa Salon international du livre et de la presse de Genève (mu Busuwisi), Mukasonga yegukanye iki gihembo ku bw’igitabo cye "Notre-Dame du Nil" avugamo uko kwanga Abatutsi byagiye bifata intera bikaza kugeza kuri Jenoside yabakorewe mu 1994 ikanahitana umuryango we.

Muri bitabo bye nka "Inyenzi" cyangwa muri "les Cafards" byo mu 2006, "La Femme aux pieds nus" cyo mu 2008 ndetse na "L’Iguifou" cyo mu 2010, Mukasonga ntahwema kwibaza ku cyateye amacakuburi ashingiye ku moko yaranze u Rwanda mu bihe byashize.

Mukasonga Scholastique w’imyaka 56 yahunze kuva mu 1973 aho ubu atuye muri Normandie ho mu Bufaransa.

Mu kuvuga "Notre-Dame du Nil" yashakaga kugereranya u Rwanda nk’umukobwa w’isugi w’umwirabura, wagenewe isura n’umukoloni w’Umubiligi aherereye mu misozi y’u Rwanda ku isoko ya Nil.

Ariko ngo na none ni nk’ishuri ry’abakobwa ryagizwe umutako w’amahanga maze ubwoko bwari bugizwe n’abantu bake butsikamirwa n’ubwari bugizwe na benshi.

Jeune Afrique