Dusange no kuri
        
Uyu munsi mu Mateka

Tariki 22 Kanama ni umunsi wa Magana abiri na mirongo itatu n’itanu, hasigaye iminsi ijana na mirongo itatu uyu mwaka ukagera ku musozo.

Uyu munsi Kiliziya Gatolika yizihiza Mutagatifu Fabrice.

Bimwe mu byaranze uyu munsi mu mateka

1827 : José de La Mar yabaye Perezida wa mbere wayoboye igihugu cya Peru.

1848 : Leta ya New Mexico yongewe kuzigize Leta Zunze Ubumwe z’Amerika.

1902 : Hatangiye gukorwa imodoka z’ubwoko bwa Cadillac zizwiho kuba ari zimwe mu zihenze cyane.
Cadillac ni iy’uruganda rwa General Motors rwo muri Leta Zunze Ubumwe z’Amerika.

1902 : Theodore Roosevelt yabaye Perezida wa Mbere wa Leta Zunze Ubumwe z’Amerika watwawe mu modoka.

1910 : Ibihugu bya Koreya n’u Buyapani byashyize umukono ku masezerano yiswe the Japan–Korea Annexation Treaty, yahaga u Buyapani kuyobora Koreya nk’intara yayo ; ayo masezerano yarangiye nyuma y’igihe gito intambara ya kabiri y’isi yose irangiye.

1914 : Mu ntambara ya mbere y’isi yose, igihugu cy’u Bubiligi, u Bwongereza n’u Budage byatangiye gukozanyaho.

1926 : Bwa mbere mu gihugu cy’ Afurika y’Epfo havumbuwe zahabu.

1932 : BBC (British Broadcasting Corporation) yatangiye isuzuma rya mbere ku ikoreshwa rya televiziyo.

1942 : Mu ntambara ya kabiri y’isi yose igihugu cya Brazil cyatangaje ko kigiye kugaba ibitero ku Budage n’u Butaliyani.

1944 : Igihugu cya Canada cyibasiwe n’umutingito ukomeye mu mateka yacyo uzwi nka Queen Charlotte Earthquake wari ku gipimo kiri hagati y’umunani n’icyenda ugendeye ku bipimo bya Richter.

1950 : Althea Gibson yabaye umwirabura wa mbere washoboye kwitabira amarushanwa mpuzamahanga y’umukino wa Tennis.

Althea Gibson

1968 : Papa Paul VI yageze mu gihugu cya Colombia mu Mujyi wa Bogota, uru nirwo rugendo rwa mbere umupapa wa Kiliziya Gatolika yagiriye mu bihugu byo mu Majyepfo y’umugabane w’Amerika bizwi cyane nka Latin America cyangwa se Amérique Latine.

2006 : Indege ya kompanyi y’Abarusiya yitwa Pulkovo Aviation Enterprise yakoreye impanuka ikomeye hafi y’umupaka w’u Burusiya, mu Burasirazuba bwa Ukraine ihitana abantu 170.

Bamwe mu bavutse uyu munsi

1984 : Lawrence Quaye, umukinnyi w’umupira w’amaguru ukomoka mu gihugu cya Ghana.

1985 : Joshua Samuel Fatu, umusifuzi wo muri Amerika.

Bamwe mu batabarutse uyu munsi

1978 : Jomo Kenyatta, wayoboye igihugu cya Kenya.
Uyu mugabo yabaye minisitiri w’intebe kuva mu mwaka w’1963 kugera mu 1964, nyuma yabaye Perezida kuigera mu mwaka w’1978 ari nawo yatabarukiyemo. Ni umunyabigwi ukomeye mu mateka y’igihugu cya Kenya, aho afite byinshi yitiriwe mu rwego rwo kumuha icyubahiro birimo za Kaminuza nka Jomo Kenyatta University of Agriculture and Technology, ikibuga mpuzamahanga cy’indege Jomo Kenyatta International Airport, imihanda n’ibibuga by’imipira binyuranye.

Igihugu cya Kenya cyari cyarashyizeho itariki yo kumwibuka ya 20 Ukwakira buri mwaka mu rwego rwo kumuha icyubahiro, nyuma mu mwaka w’2010 itegeko nshinga ryasimbuje uyu munsi uhinduka uwa Mashujaa (intwari) ariwo munsi wibukwaho intwari muri iki gihugu.

2010 : Stjepan Bobek, wabaye umukinnyi w’umupira w’amaguru ukomoka mu cyahoze ari Yugoslavia.