Umukwe wa Kabuga Félicien ku buyobozi bwa RNC

Mu itangazo ryashyizwe ahagaragara n’ubuyobozi bw’ishyaka rya RNC (Rwanda National Congress), umukwe w’umunyemari Félicien Kabuga, Dr. Paulin Murayi niwe washyizwe mu buyobozi bwa RNC mu gihugu cy’u Bubiligi .

Itangazo ryagaragaje ko Dr. Paul Murayi yagizwe Uwungirije Umuhuzabikorwa mu Bubiligi bwose, akaba n’Umuhuzabikorwa by’agateganyo mu mujyi wa Buruseli.

Nk’uko tubikesha Ibiro Ntaramakuru by’u Rwanda (RNA), umutwe wa politiki utavugarumwe na Leta y’u Rwanda, ukorera hanze y’ u Rwanda, umukwe wa Félicien Kabuga, uhigwa n’Urukiko Mpuzamahanga Mpanabyaha rwashyiriweho u Rwanda rukorera Arusha ni we washyizwe mu buyobozi bwa RNC mu Bubiligi.

Nk’uko RNA ibyibutsa, Dr. Paulin Murayi yari n’umunyamuryango shingiro wa radiyo ya RTLM (Radio Television Libre des Milles colline), yagize uruhare mu gukwirakwiza amakuru ahamagarira abahutu gukora Jenoside yakorewe Abatutsi mu 1994.

Dr. Murayi ashyizwe mu buyobozi w’ishyaka rya RNC, mu gihe rimaze iminsi rivugwamo ubwumvikane buke ndetse bamwe bakanarisezeramo. Aje asanga mu buyobozi bw’iri shyaka Kayumba Nyamwasa, Patrick Karegeya bacumbikiwe mu gihugu cy’Afurika y’Epfo, na Gerald Gahima na Dr Theogene Rudasingwa baba muri Leta Zunze Ubumwe z’Amerika.

RNA igaragaza ko inzobere mu bya politiki zivuga ko imikoranire y’umuryango wa Kabuga n’inshyaka rya RNC atari iy’ubu, kuko zivuga ko uyu mutwe ariwe uwutera inkunga mu bikorwa byawo.

Ubyara umugore wa Dr. Paulin Murayi, ari we Félicien Kabuga amaze igihe kitari gito ashakishwa, Leta Zunze Ubumwe z’Amerika zanashyizeho igihembo cya miliyoni 5 z’amadorali y’Amerika ($5m ) ku muntu wese uzatanga amakuru y’aho yaba aherereye agafatwa, agashyikirizwa ubutabera kubera uruhare ashinjwa muri Jenoside yakorewe Abatutsi n’ibindi byaha byibasiye inyokomuntu.

Dr. Paulin Murayi yashakanye na Winnie Kabuga, umukobwa wa Félicien Kabuga, bakaba baba mu gihugu cy’Ububiligi.