Urukiko rwa La Haye rugiye gutanga impapuro zisaba ifatwa rya Sylvestre Mudacumura

Urukiko rwa La Haye rugiye gutanga impapuro zisaba ifatwa rya Sylvestre Mudacumura


Yanditswe kuya 15-05-2012 - Saa 06:30' na Kayonga J.

Umushinjacyaha w’Urukiko Mpuzamahanga Mpanabyaha rw’I La Haye kuri uyu wa mbere yatangaje ko ari gushakisha uko yatanga impampuro zisaba ifatwa rya Mudacumura Sylvestre, umuyobozi w’inyeshyamba za FDLR, ndetse n’ibirego bishya kuri Gen Bosco Ntaganda, bombi baregwa ibyaha byo kwibasira inyokomuntu bakoreye muri Congo Kinshasa.

Nk’uko tubikesha ishami rishinzwe gutangaza amakuru mu Muryango w’Ababibumbye, Umushijacyaha Luis Moreno-Ocampo mu kiganiro yagiranye n’abanyamakuru ku cyicaro gikuru cya Loni I New York yatangaje ko kongera ibyaha Ntaganda aregwa no gushyira ahagaragara impapuro zisaba ifatwa (arrest warrant) rya Mudacumura bizafasha kugarura amahoro n’umutekano mu karere k’ibiyaga bigari.

Yagize ati : “Ndizera ko izi mpapuro ebyiri zisaba ifatwa ry’aba bayobozi b’imitwe y’inyeshyamba…bizafasha guhosha ibyaha bikomeje gukorwa.”

Gen Bosco Ntaganda wahoze mu mutwe umwe na Thomas Lubanga wakatiwe n’urukiko rwa La Haye muri Werurwe, asanzwe ashakishwa n’urukiko rukiko, kuri ubu ibyaha yaregwaga bikaba bishobora kwiyongera.

Mu mwaka wa 2006, Urukiko Mpuzamahanga Mpanabyaha rwa La Haye rwatanze impapuro zisaba itabwa muri yombi rya Gen Ntaganda kuri ubu uri gushakishwa uruhindu n’ingabo za Leta ya Congo Kinshasa FARDC, nyuma yo kumara imyaka ari mu buyobozi bwazo, icyo gihe akaba yararegwaga kugira uruhare mu bikorwa by’iyicarubozo byakorewe abasivili mu gace ka Ituri muri Congo Kinshasa hagati y’umwaka wa 2002 na 2003.

Umushinjacyaha Moreno yatangaje ko nyuma yo gusuzuma ibimenyetso byagaragaye mu rubanza rwa Lubanga, ibiro bye byifuje ko ibyaha Gen Ntaganda aregwa byakwiyongera ; ibi birimo ubwicanyi, ubwicanyi bushingiye ku bwoko, gufata ku ngufu igitsinagore, ubucakara bushingiye ku gitsina, guhohotera abasivile ndetse no gusahura.

Moreno usigaje ukwezi kumwe ku buyobozi bw’Urukiko rw’I La Haye yagize ati : “Abayoboke ba Ntaganda na Mudacumura bakwiye kumva ko igihe kigeze kuri bo ngo bahagarike ibikorwa by’ubwicanyi n’iyicarubozo bakomeje gukora, ndetse bakanagira uruhare mu ifatwa ry’abayobozi babo.”

Yongeyeho ko ari ngombwa ko imigambi mishya yo kurwanya izi nyeshyamba yashyirwa mu bikorwa hatekerezwa cyane ku kuba ibikorwa nk’ibyo mu gihe gishize byaragiye bikomeretsa abasivili. Ati : “Turizera ko igisirikare cya Congo ndetse n’icy’u Rwanda, kiramutse kibigizemo uruhare, byahindura ibi bikorwa bya gisirikare ibigamije guta muri yombi Ntaganda na Mudacumura.”

Urukiko Mpuzamahanga Mpanabyaha rw’I La Haye (ICC), ni rwo rukiko mpuzamahanga rwa mbere rwashyiriweho kuburanisha abantu ku giti cyabo bagize uruhare muri jenoside, ibyaha bigamije kwibasira inyokomuntu, ibyaha by’intambara ndetse n’ubugizi bwa nabi.

Uru rukiko rushobora kuburanisha ibyaha byakoze guhera mu mwaka wa 2002 nyuma y’aho rwashyiriweho.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO